එලෝන් මස්ක් ට්‍රම්ප් පරිපාලනයෙන් ඉවත් වෙයි
Shehan
එක්සත් ජනපද ජනාධිපති ඩොනල්ඩ් ට්‍රම්ප් ප්‍රකාශ කර ඇති ආකාරයට, ව්‍යවසායක එලෝන් මස්ක් ඉදිරියේදී රජයේ කාර්යක්ෂම පාලනය සඳහා වූ දෙපාර්තමේන්තුවේ ප්‍රධාන තනතුරෙන් ඉවත් වීමට නියමිත බව තොරතුරු හෙළිදරව් වී ඇත.
එලෝන් මස්ක් යනු ජනාධිපති ට්‍රම්ප්ගේ ඉතා සමීප මිතුරෙකි. ඔහු ලොව ප්‍රධානතම ධනපතියෙකි. ස්පේස් එක්ස්, ටෙස්ලා සහ එක්ස් සමාජ මාධ්‍ය වේදිකාවේ ප්‍රධාන විධායක නිලධාරියා ලෙස ඔහු සේවය කරයි.
පසුගිය වසරේ පැවති එක්සත් ජනපද ජනාධිපතිවරණයේදී ඔහු ට්‍රම්ප් වෙනුවෙන් දැඩි ප්‍රචාරක ව්‍යාපාරයක නිරත විය.
ට්‍රම්ප් ජනාධිපති ධුරයට පත් වූ පසුව, එලෝන් මස්ක්ව රජයේ කාර්යක්ෂම පාලනය සඳහා වූ දෙපාර්තමේන්තුවේ ප්‍රධානියා ලෙස විශේෂ තනතුරකට පත් කළේය. රජයේ වියදම් කප්පාදු කිරීම සහ ආයතන ප්‍රතිව්‍යුහගත කිරීම වැනි වගකීම් ඔහුට භාර කෙරිණි.
මස්ක් මෙම තනතුරේ දින 130ක් කටයුතු කිරීමට එකඟ වී තිබූ අතර, ඔහුගේ ධුර කාලය මැයි මස අවසන් වනු ඇත.
කෙසේ වෙතත්, ඊට පෙරම ඔහු එම තනතුරෙන් ඉවත් වන බව ට්‍රම්ප් තම අමාත්‍යවරුන්ට දන්වා ඇති බව ආරංචි වී තිබේ. තම සමාගම්වල වැඩකටයුතු කෙරෙහි සම්පූර්ණ අවධානය යොමු කිරීමට මස්ක් මෙම තීරණය ගෙන ඇති බව පැවසේ.
