විදුලිය, ඉන්ධන සහ ගෑස් මිල ගැන බැසිල් හදිසියේ තීරණයක් ගනී..එම තීරණය මෙන්න..

විදුලි ගාස්තු, ගෑස් මිල සහ ඉන්ධන මිල මේ මොහොතේ වැඩි කිරීමක් සිදු නොකරන බව රජය පවසනවා.

මේ බව මුදල් අමාත්‍ය බැසිල් රාජපක්ෂ මහතා විසින් කැබිනට් මණ්ඩල රැස්වීමේදී සඳහන් කර තිබේ.

මේ අතර ලිට්‍රෝ ගැස් සමාගම විසින් පාරිභෝගිකයන්ට බෙදා හැරිම සඳහා නිකුත් කරනු ලබන ගෘහස්ථ ගෑස් සිලින්ඩර්, හැටන් ප්‍රදේශයේ ඇතැම් ලිට්‍රෝ ගෑස් අලෙවි නියෝජිතයන් විසින් පාරිභෝගිකයන්ට ලබා නොදෙන බවට ලද පැමිණිල්ලක් මත පාරිභෝගික සේවා අධිකාරියේ නිලධාරින් සහ හැටන් පොලිසියේ නිලධාරින් එක්ව ඊයේ (28) දින සෝදිසි මෙහෙයුමක් දියත් කළා.

ලිට්‍රෝ ගෑස් සමාගම විසින් (28) දින හැටන් ප්‍රදේශයේ අලෙවි නියෝජිතයන්ට ගෘහස්ථ ගැස් සිලින්ඩර් 350 පමණ නිකුත් කර ඇති අතර, එම ගෘහස්ථ ගෑස් සිලින්ඩර් ඇතැම් අලෙවි නියෝජිතයන් විසින් පාරිභෝගිකයන්ට ලබා නොදෙන බවට පාරිභෝගිකයන්ගෙන් නුවරඑලිය පාරිභෝගික සේවා අධිකාරියේ නිලධාරින්ට ලද පැමිණිල්ලක් මත මෙම සෝදිසි මෙහෙයුම දියත් කෙරුණා.

ලිට්‍රෝ ගෑස් සමාගම විසින් හැටන් ප්‍රදේශයේ ගැස් අලෙවි නියෝජිතයන්ට අලුයම් කාලයේ ගැස් තොග ලොරි රථ මගින් බෙදා හැරිම සිදු කරන අතර, ඇතැම් ගැස් අලෙවි නියෝජිතයන් එම ගැස් තොග ඉතා සුක්ෂම ලෙස ඉන් ඉවත්කරගෙන වෙනත් ස්ථානයක සගවා ගෘහස්ථ ගැස් සිලින්ඩර් සමාගමේ අනුමත මිලට වඩා අධික මිලකට අලෙවි කරන බවයි හැටන් ප්‍රදේශයේ ගෑස් පාරිභෝගිකයන් කියා සිටින්නේ.

මහජනතාවගෙන් ලැබෙන පැමිණිලි සම්බන්ධයෙන් මෙවැනි වැටලිම් අඛණ්ඩව සිදු කරන බව නුවරඑලිය පාරිභෝගික සේවා අධිකාරි කාර්යාලයේ ස්ථානාධිපති රංග කරුණාරත්න මහතා කියා සිටියේ.

මේ අතර ලිට්ට්‍රෝ ගෑස් සිලින්ඩර වැඩි මිලට අලෙවි කිරීමේ ජාවාරමක යෙදී සිටී අඹුසැමි යුවළක් ඇතුළු තිදෙදෙනකු පිළියන්දල විශ්ව කලා ප්‍රදේශයේදී අත්අඩංගුවට ගත් බව පිළියන්දල පොලිසිය පවසනවා. එම සැකකරුවන් සමඟ කිලෝග්‍රෑම් 12.5 ගෑස් සිලින්ඩර විස්සක් හා කිලෝග්‍රෑම් 5 ගෑස් සිලින්ඩරයක් පොලිසිය භාරයට ගෙන තිබෙනවා.

ගෑස් සිල්වර් වෙළඳපොලේ නියමිත මිලට වඩා රුපියල් පන්සියයක් වැඩියෙන් කාන්තාවක් ඇතුළු තිදෙනෙකු අලෙවි කරන බවට පිලියන්දල පොලිසියේ ස්ථානාධිපති ප්‍රධාන පොලිස් පරීක්ෂක සනත් රංජිත් මහතාට ලද තොරතුරක් අනුව අපරාධ අංශයේ ස්ථානාධිපති පොලිස් පරීක්ෂක දිනේෂ් හෙට්ටිආරච්චි මහතා ඇතුළු කණ්ඩායමක් වැටලීම සිදුකර තිබුණා.

විශ්ව කලාව ප්‍රදේශයේ ගෑස් අලෙවි නියෝජිතයකු ගෙන් ගෑස් සිලින්ඩර ලබාගෙන එම වෙළඳ සැල ඉදිරිපිටම තබාගෙන මෙම කූට ජාවාරම සිදුකරමින් සිටි බව වැටලීම සිදුකළ බවයි පොලිස් නිලධාරියෙක් පැවසුවේ.

වැටලීම සිදු කළ ස්ථානයේ තිබූ ගෑස් සිලින්ඩර වලට අමතරව සැකකරුවන්ගේ නිවස තුළ ද තවත් ගෑස් සිලින්ඩර පහක් තිබී පොලිස් බරයට ගත් බව වැටලීම සිදු කළ පොලිස් නිළධාරියෙක් පැවසුවා.