චීන තරුණ සමුළුවට ගිය පිරිස ගැන පාර්ලිමේන්තුව උණුසුම් වෙයි -අමාත්‍යාංශයේ සහ නියෝජ්‍ය අමාත්‍යවරුන්ගේ පෞද්ගලික කාර්ය මණ්ඩලයේ අයට විතරද අවස්ථාව දයාසිරි උදේම ගේම ඉල්ලයි

චීනයේ පැවති ජාත්‍යන්තර තරුණ සමුළුවක් සඳහා ශ්‍රී ලංකාව නියෝජනය කරමින් සහභාගී වූ පිරිස තෝරාගැනීම සම්බන්ධයෙන් පාර්ලිමේන්තු මන්ත්‍රී දයාසිරි ජයසේකර මහතා දැඩි විවේචන එල්ල කළේය.

අදාළ සමුළුව සඳහා සුදුසු වයස් කාණ්ඩයේ තරුණ තරුණියන්ට ප්‍රමුඛතාව ලබාදිය යුතුව තිබුණද, එවැනි සැබෑ තරුණ නියෝජනයක් දක්නට නොලැබුණු බව මන්ත්‍රීවරයා පාර්ලිමේන්තුවේදී පෙන්වා දුන්නේය.

විශේෂයෙන්ම ජාතික තරුණ සේවා සභාවේ ක්‍රියාකාරී තරුණ තරුණියන්ට මෙම ජාත්‍යන්තර අවස්ථාව ලබාදී නොමැති බවට ඔහු චෝදනා කළේය. ඒ වෙනුවට අමාත්‍යාංශයේ සහ නියෝජ්‍ය අමාත්‍යවරුන්ගේ පෞද්ගලික කාර්ය මණ්ඩලවලට සම්බන්ධ පුද්ගලයන් පිරිසක් සමුළුවට සහභාගී කරවාගෙන ඇති බවද ඔහු සඳහන් කළේය.

එමෙන්ම ජාතික තරුණ සේවා සභාව තුළ දේශපාලන මැදිහත්වීම් සිදුවන බවටද දයාසිරි ජයසේකර මහතා චෝදනා කළේය.

මහරගම පිහිටි ජාතික තරුණ සේවා සභා මධ්‍යස්ථානය තුළ පවා දේශපාලන පන්ති පැවැත්වෙන බව ඔහු ප්‍රකාශ කළේය.

අතීතයේදී කිසිදු දේශපාලන පක්ෂයකට තරුණ සේවා සභාව තම දේශපාලන කටයුතු සඳහා භාවිත කිරීමට ඉඩ ලබා නොදුන් බව සිහිපත් කළ මන්ත්‍රීවරයා, වර්තමානයේ එම තත්ත්වය වෙනස් වී ඇති බවද අවධාරණය කළේය.

ජාත්‍යන්තර තරුණ වැඩසටහන් සඳහා පුද්ගලයන් තෝරාගැනීමේදී දේශපාලන හිතවත්කම් හෝ පවුල් සබඳතා සැලකිල්ලට නොගෙන, අදාළ සුදුසුකම් සහිත පුද්ගලයන්ට අවස්ථාව ලබාදිය යුතු බවද ඔහු වැඩිදුරටත් පෙන්වා දුන්නේය.

කෙසේ වෙතත්, මන්ත්‍රීවරයාගේ චෝදනාවලට ප්‍රතිචාර දක්වමින් පාර්ලිමේන්තුවේදී සඳහන් වූයේ චීනයේ පැවති සමුළුවට සහභාගී වූ පිරිස අතර අමාත්‍යාංශයේ සහ ජාතික තරුණ සේවා සභාවේ සේවය කරන නිලධාරීන් ද සිටින බවයි.

එම නිලධාරීන් ද අදාළ වයස් කාණ්ඩයට අයත් තරුණ පිරිසක් බවද එහිදී පෙන්වා දෙනු ලැබීය.

මෙම කරුණු හුවමාරුවත් සමඟ ජාත්‍යන්තර වැඩසටහන් සඳහා ශ්‍රී ලංකා නියෝජිතයන් තෝරාගැනීමේ ක්‍රමවේදය සහ ජාතික තරුණ සේවා සභාවේ ක්‍රියාකාරීත්වය පිළිබඳව පාර්ලිමේන්තුවේ අවධානය යොමුවිය.

එළඹෙන 20 වෙනි දිනත් බන්ධනාගාර භාරයේ සිටී නම්.. රටම බලන් ඉද්දි නාමල්ට අද අධිකරණයෙන් දුන් නියෝගය