රැකියා රැසක් අනතුරේ! වසංගතය මැද ආර්ථිකය දණගස්සන තවත් ගැටළුවක්!

පහතරට තේ වගාව විනාශ වෙමින් පවතින බවට එම වගාකරුවන් මැසිවිළි නගනවා. පවතින පොහොර හිඟය හේතුවෙන් මෙම තත්ත්වය උදා වී ඇති බවයි ඔවුන් පවසන්නේ. වගාකරුවන් ප්‍රකාශ කරන්නේ නියමිත පොහොර නොමැති වීම නිසා තේ ශාක කහැපැහැ ගැන්වී ඇති බවයි.

එමෙන්ම රජයෙන් ලබා දෙනවැයි කියන කොම්පෝස්ට් පොහොර තේ වගාවට නොගැලපෙන බවයි ඔවුන් පෙන්නා දෙන්නේ. පොහොර නොමැතිව සිව්වැනි මාසය මේවන විට ගෙවෙමින් පවතින බව පෙන්වා දෙන වගාකරුවන් අවධාරණය කරන්නේ තේවගාකරුවන්ට පමණක් නොව දළු නෙළන්නන්, තේ කර්මාන්තශාලාවල සේවකයින් ආදී තේ කර්මාන්තය ආශ්‍රිත රැකියා රැසක් අහිමි වෙමින් පවතින බවයි.

මේවන විටත් මෙරට සියළුම ප්‍රදේශවල පාහේ තේ වගාවේ ගුණාත්මකබව පහළ වැටී ඇති බවත්, මේ ආකාරයෙන් දිගින් දිගටම පැවතුනොත් තේ කර්මාන්තය සම්පූර්ණයෙන්ම බිඳවැටෙන බවත්, ඉන් මෙරට ආර්ථිකයට සිදුවන බලපෑම සුළුපටු නොවනු ඇති බවත් ඔවුන් සඳහන් කරනවා.

මේ අතර, කාබනික පොහොර විදේශයන්ගෙන් ආනායනය කරන බවට පැවසෙන පුවත සම්බන්ධයෙන් අදහස් දැක්වූ මහාචාර්ය සී.එස්. විජේරත්න මහතා ප්‍රකාශ කළේ එලෙස පිටරටවල්වලින් ගෙනෙන කාබනික පොහොරවල විවිධ ක්ෂුද්‍ර ජීවීන් සිටින බවයි. එම ජීවීන් මෙරට ශාකයන්ට ඉතා අහිතකර ලෙස බලපෑමේ ඉඩ කඩ පවතින බව ඔහු පෙන්වා දෙනවා.

මෙරට කෝපි වගාව සම්පූර්ණයෙන්ම බිඳවැටුණේ දිලීරයක් නිසා බවත් කාබනික පොහොර ආනයනයෙන් අනෙකුත් වගාවන්ට ද එවැනිම ඉරණමක් අත්විය හැකි බවත් ඔහු පවසනවා.

මේ පිළිබඳව අදහස් පළ කළ රජයේ වෛද්‍ය නිලධාරීන්ගේ සංගමයේ සහකාර ලේකම් වෛද්‍ය නවීන් ද සොයිසා ද පැවසූවේ කාබනික පොහොර පිටරටින් ගෙන්වීම භයානක බවයි. එමගින් මෙරට ජෛව පද්ධතිය වෙනස්විය හැකි බවත්, එලෙස වෙනස් වුවහොත් එය යළි හැරවිය නොහැති බවත් ඔහු පෙන්වා දෙනවා.

You may like this video