වාහන ආනයනයේදී රජය පැන වූ අලුත්ම කොන්දේසි 9 මෙන්න.(සම්පූර්ණ විස්තරය සහිතයි)
Wayomi
ඊයේ(01) සිට බලපැවැත්වෙන පරිදි වාහන ආනයනය කිරීම සඳහා පනවා තිබූ සීමා අදියර 3 යටතේ කොන්දේසි සහිතව ඉවත් කරනු ලැබූ අතර වාහන ආනයනය කිරීමේදී ඊට අදාළව කොන්දේසි 9 ක් රජය විසින් පනවා තිබෙනවා.
තෙවන අදියර යටතේ මෝටර් රථ, විදුලි මෝටර් රථ සහ දෙමුහුම් මෝටර් රථ සඳහා වන ආනයන සීමා කොන්දේසි සහිතව ඊයේ(01) සිට ඉවත් කරමින් මුදල් අමාත්‍යවරයා ලෙස ජනාධිපති අනුර කුමාර දිසානායක පෙරේදා(31) අති විශේෂ ගැසට් පත්‍රයක් නිකුත් කළ අතර ඉන් පසුව වාහන ආනයනය කිරීමේදී පනවා ඇති කොන්දේසි 9 සඳහන් කරමින් මුදල් අමාත්‍යාංශය මාධ්‍ය නිවේදනයක් නිකුත් කරනු ලැබුවා.
1.මෝටර් රථ ප්‍රවාහන දෙපාර්තමේන්තුවේ ලියාපදිංචි ආනයනකරුවන් සහ රාජ්‍ය ආයතන විසින් මින් පනවනු ලබන රෙගුලාසි වලට යටත්ව අවශ්‍ය වාහන ප්‍රමාණය ආනයනය කළ හැක.
2.ඉහත (i) ඡේදයේ සඳහන් ආනයනකරුවන් හැර අනෙකුත් ආනයනකරුවන්ට මාස දොළහක (12) කාලසීමාවක් තුළ එක් මෝටර් වාහනයක් (01) ආනයනය කළ හැක.
3.ආනයනය කරනු ලබන ඕනෑම මෝටර් වාහනයක් ගැනුම්කරුගේ නමට (ලියාපදිංචි ආනයනකරුවෙකුගෙන් මිලදී ගන්නා අවස්ථාවකදී) හෝ ආනයනකරුගේ නමට එකී මෝටර් වාහනයට අදාළ ආයාත බිල් පත්‍රයේ/රේගු සටහන් කරයේ (CUSDEC) දිනයේ සිට දින 90ක් ඇතුළත මෝටර් රථ ප්‍රවාහන දෙපාර්තමේන්තුවේ ලියාපදිංචි කළ යුතුය.
4.මෝටර් වාහන ලියාපදිංචි කිරීම සඳහා ආනයනකරු හෝ ගැනුම්කරු විසින් දේශීය ආදායම් දෙපාර්තමේන්තුවේ විසින් නිකුත් කරනු ලබන බදු ගෙවන්නා හඳුනාගැනීමේ අංකය (TIN) ඇතුළත් දිවුරුම් ප්‍රකාශයක් සමඟින් අනෙකුත් අවශ්‍ය සියලු ලේඛන මෝටර් රථ ප්‍රවාහන කොමසාරිස් ජනරාල්වරයා වෙත ඉදිරිපත් කළ යුතුය. තවද, ඉහත (i) ඡේදයේ සඳහන් ආනයනකරුවන් හැර අනෙකුත් ආනයනකරුවන් විසින් සිය දෙවන වාහනය ආනයනය කිරීමේදී, තම ප්‍රථම වාහනය ආනයනය කළ දින සිට (රේගු සටහන් කරයේ දින සිට) මාස දොළහක කාලයක් ඇතුළත වෙනත් වාහනයක් ආනයනය නොකළ බවද එකී දිවුරුම් ප්‍රකාශයේ සඳහන් කළ යුතුය.
5.යම් ආනයනකරුවෙකු දින 90ක් ඇතුළත ආනයනික මෝටර් වාහනයක් ලියාපදිංචි කිරීමට අපොහොසත් වුවහොත්, එම මෝටර් වාහනය ලියාපදිංචි කරන අවස්ථාවේදී, මෝටර් වාහනයේ පිරිවැය, රක්ෂණ හා නැව් ගාස්තු අගයෙන් සියයට 45 ක උපරිම සීමාවකට යටත්ව, මාසිකව එම අගයෙන් සියයට 3 බැගින් අය කරනු ලබන ප්‍රමාද ගාස්තු ගෙවීමට එකී ආනයනකරුට සිදුවේ.
6.කිසිදු අවස්ථාවකදී, මාසික ප්‍රමාද ගාස්තුව ගෙවීම සම්බන්ධයෙන් ගාස්තු අත්හැරීමක් ප්‍රධානය කරනු නොලැබේ.
7.මෝටර් වාහනේ වයස නිර්ණය කිරීමේදී, එකී මෝටර් වාහනේ නිෂ්පාදිත දිනය සහ නෞභාර පත්‍රයේ/ගුවන් භාර පත්‍රයේ දිනය අතර කාලය ගණනය කළ යුතුය.
8.සහනදායී බදු අනු ප්‍රමාණ යටතේ මෝටර් වාහන ආනයනය කිරීම සඳහා නිකුත් කරන බලපත්‍ර භාවිතා කරමින් කිසිදු මෝටර් රථයක් ආනයනය කිරීම සඳහා හෝ රේගුවෙන් නිදහස් කිරීම සඳහා අවසර ලබා දෙනු නොලැබේ.
9.දැනට ක්‍රියාත්මක රීති සහ රෙගුලාසි උල්ලංඝනය කරමින් යම් මෝටර් වාහනයක් ආනයනය කළහොත් එකී මෝටර් වාහනය (වාහන) රේගු සටහන් කරයේ දින 90ක් ඇතුළත අදාල ආනයනකරු විසින් ප්‍රති අපනයනය කරනු ලැබිය යුතුය.
You may like this video
