සමාජ මාධ්‍ය කළඹපු දන්සැලක් ළග පහරදීමේ සිද්ධියේ සැකකරුවන් පස් දෙනෙකු කොටු

පොසොන් පොහොය දින (29) මාලඹේ නගරයේ දන්සලක් අසලදී තරුණයෙකුට සිදු වූ පහරදීමක් සම්බන්ධයෙන් වයස අවුරුදු 16 සහ 17 හැවිරිදි සැකකරුවන් පස් දෙනෙකු පොලීසිය විසින් අත්අඩංගුවට ගෙන තිබේ.

මෙම සිද්ධිය සමාජ මාධ්‍ය ඔස්සේද වේගයෙන් සංසරණය වූ වීඩියෝවක් මගින් අනාවරණය වීමත් සමඟ මාලඹේ පොලිසිය වෙත ලැබුණු පැමිණිල්ලක් අනුව විමර්ශන ආරම්භ කර ඇත. පොලිස් වාර්තා අනුව, ඊයේ දිනයේ සිදුකළ මෙහෙයුමකදී මෙම සැකකරුවන් අත්අඩංගුවට ගෙන ඇති අතර, ඔවුන් කොතලාවල ප්‍රදේශයේ පට්ටියවත්ත පාරේ පදිංචිකරුවන් බවද සඳහන් වේ.

අත්අඩංගුවට ගත් සියලුදෙනා එදිනම පොලිස් භාරයට ගෙන වැඩිදුර විමර්ශන සඳහා යොමු කර ඇත. සමාජ මාධ්‍යවල සංසරණය වූ වීඩියෝ දර්ශනවලදී තරුණයෙකුට හිස්වැසුම් භාවිත කරමින් පහර දෙන ආකාරය, පයින් ගැසීම් සහ තවත් ප්‍රචණ්ඩ ක්‍රියා කිහිපයක් පැහැදිලිව දැකගත හැකි බව පොලීසිය පවසයි.

සුගීෂ්වර අධිකරණයට රැගෙන එයි

මෙම දර්ශන පදනම් කරගෙන සිදුකළ විමර්ශන මගින් සැකකරුවන් හඳුනා ගැනීමට හැකිවී ඇත. මූලික පරීක්ෂණවලදී අනාවරණය වී ඇත්තේ එදින මාලඹේ දන්සලක බත් පෝලිමකදී ඇති වූ සුළු ආරවුලක් මෙම ප්‍රචණ්ඩ සිද්ධියට මුල්වූ බවයි.

පෝලිමේ සිටි පුද්ගලයන් අතර ඇති වූ වාදයක් ක්‍රමයෙන් උග්‍ර වී ගැටුමක් දක්වා වර්ධනය වී ඇති බවද පොලිස් විමර්ශන පෙන්වා දෙයි.

විශේෂයෙන්ම, වින්දිතයා විසින් පෝලිමේ ඉදිරියට යාමට උත්සාහ කළ පුද්ගලයන් දෙදෙනෙකුට නිසි පරිදි පෝලිම අනුගමනය කරන ලෙස ඉල්ලා සිටීමෙන් පසුව මෙම ආරවුල තවත් උණුසුම් වී ඇති අතර, එය අවසානයේ ප්‍රචණ්ඩ පහරදීමක් දක්වා පත්ව ඇති බව සඳහන් වේ. අත්අඩංගුවට ගත් සැකකරුවන් අද (01) දින කඩුවෙල මහේස්ත්‍රාත් අධිකරණය වෙත ඉදිරිපත් කිරීමට නියමිත බව පොලිසිය වැඩිදුරටත් පවසයි.

ඒ අතර, මෙම පහරදීමට සම්බන්ධ තවත් පුද්ගලයින් සිටීද යන්න සොයා බැලීම සඳහා වැඩිදුර විමර්ශන ක්‍රියාත්මක කරමින් පවතින බවද මාලඹේ පොලිසිය සඳහන් කරයි.

සිද්ධිය සම්බන්ධයෙන් සමාජයේ දැඩි අවධානය යොමුව ඇති අතර, නීතිය අනුව අවශ්‍ය සියලු පියවර ගන්නා බවද පොලිස් ආරංචි මාර්ග වැඩිදුරටත් ප්‍රකාශ කර ඇත.