වසර 8කට පසු යළි කරළියට ආ ‘සෑන්ඩ්පේපර් ගේට්’ ගිනි පුපුර - අත්දැකීම් බහුල ඕස්ට්‍රේලියානු පන්දු යවන්නන්ට පන්දුවේ වෙනස නොපෙනී ගියේ කොහොමද කියා වසීම් අක්‍රම් ප්‍රශ්න කරයි

2018 වසරේදී ලෝක ක්‍රිකට් ක්‍රීඩාවම ආන්දෝලනයට ලක් කළ ඕස්ට්‍රේලියානු කණ්ඩායමේ පන්දුවේ ස්වභාවය වෙනස් කිරීමේ සිද්ධිය හෙවත් ‘සෑන්ඩ්පේපර් ගේට්’ මතභේදය යළි කරළියට පැමිණ තිබේ.

මෙම සිද්ධිය සම්බන්ධයෙන් අදහස් දක්වමින් පාකිස්තාන ක්‍රිකට් කණ්ඩායමේ හිටපු නායක සහ ප්‍රවීණ වේග පන්දු යවන ක්‍රීඩක වසීම් අක්‍රම් ප්‍රශ්න කර ඇත්තේ, අත්දැකීම් බහුල ඕස්ට්‍රේලියානු පන්දු යවන්නන්ට පන්දුවේ ස්වභාවය වෙනස් කර ඇති බව හඳුනා ගැනීමට නොහැකි වූයේ කෙසේද යන්නයි.

මෙම සිද්ධිය ක්‍රිකට් ක්‍රීඩාවේ සිදුවූ විශාලතම අපකීර්තිමත් සිදුවීම් අතරින් එකක් බව පෙන්වා දුන් අක්‍රම්, ඕස්ට්‍රේලියානු ක්‍රිකට් ක්‍රීඩකයින්ගේ අවංකභාවය සම්බන්ධයෙන් ද සිය අදහස් පළ කළේය.

"ඕස්ට්‍රේලියානුවන් ඔවුන්ගේ සෘජු බව, ක්‍රීඩා පිටිය තුළ සහ ඉන් පිටත දක්වන දැඩි ස්වභාවය මෙන්ම වඩාත්ම වැදගත් ලෙස ඔවුන්ගේ අවංකභාවය වෙනුවෙන් ප්‍රසිද්ධයි," යනුවෙන් ඔහු සඳහන් කළේය.

ශ්‍රී ලංකා - පාකිස්තාන පළමු ටෙස්ට් තරගය ජය පරාජයෙන් තොරව නිමවෙයි - කණ්ඩායම වෙනුවෙන් උපරිමය කිරීමට උත්සාහ කළ බව කුසල් මෙන්ඩිස් කියයි

ඕස්ට්‍රේලියානු කණ්ඩායමේ හිටපු ක්‍රීඩක උස්මාන් කවාජා සිය ස්වයං චරිතාපදානයේ සඳහන් කර තිබුණේ, පන්දුවේ ස්වභාවය වෙනස් කිරීමේ සැලසුම පිළිබඳව කණ්ඩායමේ ක්‍රීඩකයින් රැසක් දැනුවත්ව සිටි බවයි. කෙසේ වෙතත්, එම ප්‍රකාශය ඕස්ට්‍රේලියානු නායක පැට් කමින්ස් විසින් දැඩි ලෙස ප්‍රතික්ෂේප කර තිබේ.

මෙල්බර්න් නුවර සිට සමාජ මාධ්‍ය වෙත නිකුත් කළ වීඩියෝවකින් අදහස් දක්වමින් අක්‍රම් පෙන්වා දුන්නේ, පන්දුවක් ස්වභාවිකව ගෙවී යාමෙන් ඇතිවන වෙනස්කම් සහ වැලි කඩදාසියක් භාවිතයෙන් සිදුකරන වෙනස්කම් අතර පැහැදිලි වෙනසක් පවතින බවයි.

"පන්දු යවන්නෙකු ලෙස පන්දුව දෙස බැලූ සැණින් එහි යම් අසාමාන්‍ය වෙනසක් සිදුවී ඇති බව මට හඳුනාගත හැකියි," යනුවෙන් ඔහු පැවසීය.

පන්දු යවන්නන් ඉනිම පුරාම පන්දුවේ තත්ත්වය පිළිබඳව දැඩි අවධානයෙන් පසුවන බැවින්, එහි ඇති අසාමාන්‍ය සීරීම් හෝ සලකුණු නොදැක සිටීම පහසු නොවන බව ද අක්‍රම් අවධාරණය කළේය.

විශේෂයෙන්ම වියළි තණතීරුවක පන්දුව ගැටීමෙන් ඇතිවන සලකුණු සහ වැලි කඩදාසියක් මගින් ඇතිකරන සලකුණු එකිනෙකට වෙනස් බව ඔහු පෙන්වා දුන්නේය.

කෙසේ වෙතත්, මෙම මතභේදයේදී තමන් කිසිදු පාර්ශ්වයක් වෙනුවෙන් පෙනී නොසිටින බව ද අක්‍රම් පැවසීය. පැට් කමින්ස් තම සමීප මිතුරෙකු මෙන්ම ක්‍රිකට් ක්‍රීඩාවේ සිටින ප්‍රමුඛ පෙළේ නායකයෙකු බව ද ඔහු සඳහන් කළේය.

එමෙන්ම ඕස්ට්‍රේලියානු කණ්ඩායමේ සෙසු ක්‍රීඩකයින් මෙම සැලසුම පිළිබඳව නොදැන සිටීමට ද ඉඩ ඇති බව පිළිගත් අක්‍රම්, තම අදහස් පළ කිරීම වේග පන්දු යවන්නෙකු ලෙස ලද පෞද්ගලික අත්දැකීම් මත පදනම් වූවක් බව පැහැදිලි කළේය.

මේ අතර, උස්මාන් කවාජා විසින් තමන් සහ තවත් ක්‍රීඩකයින් පන්දුවේ ස්වභාවය වෙනස් කිරීමේ සැලසුම සකස් කිරීමට දායක වූ බවට කරන ප්‍රකාශ අක්‍රම් විසින් දැඩි ලෙස විවේචනය කර තිබේ. එම ප්‍රකාශ "සම්පූර්ණයෙන්ම විකාරයක්" ලෙස ඔහු හඳුන්වා දී ඇත.

හිටපු ඕස්ට්‍රේලියානු උප නායක ඩේවිඩ් වෝනර් මේ වන විට කවාජාගේ ප්‍රකාශයට ප්‍රසිද්ධියේ සහාය පළ කර ඇති අතර, එය ඕස්ට්‍රේලියානු ක්‍රීඩකයින් අතර නව මතභේදයක් ඇති කිරීමට හේතු වී තිබේ.

2018 සෑන්ඩ්පේපර් ගේට් සිද්ධිය

2018 මාර්තු මාසයේදී කේප් ටවුන්හිදී දකුණු අප්‍රිකාවට එරෙහිව පැවැති තුන්වැනි ටෙස්ට් තරගයේදී කැමරන් බැන්ක්‍රොෆ්ට් වැලි කඩදාසියක් භාවිත කරමින් පන්දුවේ ස්වභාවය වෙනස් කිරීමට උත්සාහ කරන ආකාරය රූපවාහිනී කැමරාවල සටහන් වීමත් සමඟ මෙම සිද්ධිය ලොව පුරා දැඩි ආන්දෝලනයකට තුඩු දුන්නේය.

ඉන් අනතුරුව ක්‍රිකට් ඕස්ට්‍රේලියා ආයතනය විසින් එවකට නායක ස්ටීව් ස්මිත් සහ උප නායක ඩේවිඩ් වෝනර්ට මාස 12 බැගින් තරග තහනමක් පැනවූ අතර, කැමරන් බැන්ක්‍රොෆ්ට්ට මාස නවයක තහනමක් පැනවීමට පියවර ගෙන තිබිණි.

කෙසේ වෙතත්, පැට් කමින්ස්, මිචෙල් ස්ටාර්ක්, ජොෂ් හේසල්වුඩ් සහ නේතන් ලයන් ඇතුළු එවකට ඕස්ට්‍රේලියානු පන්දු යැවීමේ බලඇණියේ ක්‍රීඩකයින් පන්දුවේ ස්වභාවය වෙනස් කිරීමේ සිද්ධිය පිළිබඳව තමන් දැනුවත්ව නොසිටි බව ප්‍රකාශ කර තිබේ.

වසර අටකට පසුව යළිත් කරළියට පැමිණ ඇති මෙම චෝදනා හේතුවෙන් ඕස්ට්‍රේලියානු ක්‍රිකට් ක්‍රීඩාවේ කීර්ති නාමය සම්බන්ධයෙන් නැවතත් ප්‍රශ්න මතුව ඇති බව අක්‍රම්ගේ අදහස්වලින් පැහැදිලි වේ.

කෙසේ වෙතත්, අලුත් චෝදනා සහ මතභේද මතුව තිබුණ ද, 2018 වසරේ සිදුවූ සෑන්ඩ්පේපර් ගේට් සිද්ධිය සම්බන්ධයෙන් සිදුකළ විමර්ශනය නැවත ආරම්භ කිරීමට ක්‍රිකට් ඕස්ට්‍රේලියා ආයතනය මෙතෙක් පියවර ගෙන නොමැත.

LAUGFS සමාගම ඊ ගෑස් මිල ඉහළ දැමීමට පියවර ගෙන ඇති පසුබිමක ලිට්‍රෝ සමාගමෙන් නිවේදනයක්