ශ්‍රීලංකා දකුණු අප්‍රිකා තරගයේ කාසිය වාසිය පිළිබඳ තීරණය

අද දින ශ්‍රී ලංකාව සහ දකුණු අප්‍රිකාව සමග පළමු 2020 තරගය කීමට ඉතිරිව තිබෙන්නේ තව සුළු මොහොතක් පමණයි.

මීට සුළු වේලාවකට පෙර  කාසිය වාසිය තීරණය උරගා බැලූ අතර  එහිදී කාසිය වාසිය හිමිකරගත් දකුණු අප්‍රිකා කණ්ඩායම ප්‍රථමයෙන් පන්දුවට පහරදීමට තීරණය කර තිබේ.

සංචාරක දකුණු අප්‍රිකානු කණ්ඩායම සහ ශ්‍රී ලංකා කණ්ඩායම අතර පන්දුවාර විස්සයි විස්ස ක්‍රිකට් තරගාවලිය අද ආරම්භ වනවා. තරගාවලියට තරග 3 ක් ඇතුළත්. ශ්‍රී ලංකා - දකුණු අප්‍රිකා පළමු පන්දුවාර විස්සයි විස්ස ක්‍රිකට් තරගය අද රාත්‍රී 7 ට කොළඹ ආර් ප්‍රේමදාස ක්‍රීඩාංගණයේදී පැවැත්වීමට නියමිතයි.

එක්දින තරගාවලියට එක් නොවූ කුසල් ජනිත් පෙරේරා බොහෝ විට අද තරගයේදී ශ්‍රී ලංකා ආරම්භ පිතිකරු ලෙස එක්වනු ඇති. 3 වන එක්දින තරගයේදී ඉවත් කළ භානුක රාජපක්‍ෂටද අද තරගයේදී යළි අවස්ථාවක් හිමිවනු ඇති බවටයි වාර්තා වන්නේ. අවසන් ජයග්‍රාහී එක්දින තරගයට එක් වූ ශ්‍රී ලංකා පන්දු යැවීමේ බලඇණිය මෙම තරගයටද එක්වීමට නියමිත අතර එසේ වුවහොත් මහේෂ් තීක්‍ෂණ අද පන්දුවාර විස්සයි විස්ස ජාත්‍යන්තර ක්‍රිකට් වරම් දිනාගනු ඇති.

එක්දින තරගාවලියට එක් නොවූ දකුණු අප්‍රිකානු ප්‍රබල පිතිකරුවන් වන ක්වින්ටන් ඩී කොක් සහ ඩේවිඩ් මිලර් අද තරගයට එක්වීමට නියමිතයි. ලොව හොදම පන්දුවාර විස්ස පිතිකරුවන් දස දෙනා අතර සිටින රසී වැන් ඩර්සන් දකුණු අප්‍රිකානු කණ්ඩායමට අයත්. එමෙන්ම මෙවර තරගාවලිය ලොව හොදම පන්දුවාර විස්සයි විස්ස පන්දු යවන්නන් දෙදෙනා එකම තරගයකදී මුණ ගැසෙන තරගාවලියක්වීම විශේෂත්වයක්.

ඒ, අංක එකේ සිටින ටැබ්රිස් ෂැම්සි සහ අංක දෙකේ සිටින වනිදු හසරංග අතරයි. එළඹෙන ලෝක කුසලාන ක්‍රිකට් තරගාවලියට පෙර දෙපිළම සහභාගි වන අවසන් පන්දුවාර විස්සයි විස්ස ක්‍රිකට් තරගාවලිය මෙයයි. ඒ අනුව ශ්‍රී ලංකාවට සහ දකුණු අප්‍රිකාවට එළඹෙන ලෝක කුසලාන ක්‍රිකට් තරගාවලිය සදහා ප්‍රධාන කණ්ඩායමකට එරෙහිව තරඟ වැද සිය කණ්ඩායමේ සංයුතිය තීරණය කිරීමට ලැබෙන අවසන් අවස්ථාවද මෙය වනු ඇති. මේ අතර ශ්‍රී ලංකාව සහ දකුණු අප්‍රිකානු කණ්ඩායම අතර පැවැත්වීමට නියමිත තරග තුනකින් සමන්විත පන්දුවාර 20 තරග ආරම්භ වන වේලාවන්හි සංශෝධනයක් සිදු කිරීමට ශ්‍රී ලංකා ක්‍රිකට් ආයතනය තීරණය කර තිබෙනවා. ක්‍රිකට් ආයතනය මීට පෙර නිවේදනය කර තිබුණේ දෙරට අතර පන්දුවාර 20 තරග රාත්‍රී 8 ට ආරම්භ වන බවටයි.

කොළඹ ආර් ප්‍රේමදාස ක්‍රීඩාංගනයේදී විදුලි ආලෝක මධ්‍යයේ පැවැත්වෙන මෙම තරග රාත්‍රී 7ට ආරම්භ වන බව ශ්‍රී ලංකා ක්‍රිකට් ආයතනය නිවේදනයක් නිකුත් කරමින් සඳහන් කරනවා. තරගයේ කාසිය වාසිය උරගා බැලීම සවස 06.30ට සිදුකෙරෙන අතර මෙම තරග පැවැත්වෙන්නේ ද කෝවිඩ් 19 නීතිරීති අනුව සම්පූර්ණ ප්‍රේක්ෂක සහභාගිත්වයෙන් තොරවයි. දෙරට අතර තරග තුනකින් සමන්විත පන්දුවාර 20 තරගාවලියේ පළමු තරගය හෙට පැවැත්වෙනු ඇති.