ගුවන් මගී තදබදයට විසදුම් ....

 ගුවන් මගී තදබදය අවම කිරීම සදහා කටුනායක ගුවන්තොටුපළේ ආගමන හා විගමන පහසුකම් පුළුල් කළ බව සංචාරක ඇමති ප්‍රසන්න රණතුංග මහතා පවසයි.

මේ යටතේ පැමිණි විගමන කවුළු සංඛ්‍යාව 18 සිට 23 දක්වා වැඩි කර තිබේ. ආගමන කවුළු සංඛ්‍යාව 25 සිට 31 දක්වා ද වැඩි කිරීමට කටයුතු කරමින් සිටින බව ද ඇමතිවරයා කියයි.

මෙම ආගමන හා විගමන කවුළු නවීන තාක්ෂණයෙන් ද සමන්විතයි.මේ වන විට කටුනායක ගුවන් තොටුපළේ ඉදිකර ඇති නව විගමන කවුළු පසුගිය දා ඇමතිවරයාගේ නිරීක්ෂණයට ලක්විය. කටුනායක ගුවන් තොටුපළේ විගමන කටයුතු සදහා වෙන් වු ප්‍රදේශය පහසුකම් සහිතව වැඩි දියුණු කිරීම, ආගමන කටයුතු සදහා පහසුකම් සහිත නව ප්‍රදේශයක් වෙන්කිරීම හා තිරුබදු රහිත සාප්පු සංකීර්ණයක් ඉදිකිරිමට ද කටයුතු කෙරෙමින් පවතින බව ඇමතිවරයා මෙහි දී කීවේය.

නව ආගමන ගුවන් බඩු පර්යන්තයක් ද අදියර කීපයක් යටතේ ඉදි කිරීමට සැලසුම් කර තිබේ. කටුනායක ගුවන් තොටුපළේ වාර්ෂික මගී ධාරිතාව ගුවන් මගීන් මිලියන 06 කි. මේ වන විට කටුනායක ගුවන් තොටුපළ වාර්ෂිකව මිලියන 10 ක මගී මෙහෙයුම් සිදුකරනු ලබයි. ක්‍රියාත්මක කටුනායක ගුවන් තොටුපළ පුළුල් කිරීමේ ව්‍යාපෘති යටතේ වාර්ෂික ගුවන් මගීන් ධාරිතාව මිලියන 15 ක් දක්වා වැඩි කිරීමට හැකියාව ලැබෙන බව ද ඇමතිවරයා කියයි.

පවතින මගී පර්යන්තයන්හි මගී ධාරිතාව වැඩි කිරීම සදහා ප්‍රතිව්‍යුහගත කිරීම් හා ප්‍රතිසංස්කරණ කටයුතු ද මේ වන විට ආරම්භ කර තිබේ. ගුවන් තොටුපළේ රැදී සිටින කාලය තුළ විවේකාගාර පහසුකම් ඉල්ලා සිටින මගීන්ට එම සේවාව ලබා දීම සදහා දැනට ඇති විවේකාගාර අදියර කිපයක් යටතේ නවීකරණයට සැලසුම් කර ඇතැයි ද ඇමතිවරයා කියයි.