රත්රන් නිසා තැන් දෙකක දී අමානුෂික ලෙස මනුෂ්‍ය ඝාතන දෙකක් !

දිවයිනේ ස්ථාන දෙකක දී රන් භාණ්ඩ කොල්ලකෑම් සඳහා සිදුකරන ලද මනුෂ්‍ය ඝාතනයන් වාර්තා වේ.

ඊයේ(16) උදෑසන මාලඹේ පොලිස් වසමේ තලාහේන ප්‍රදේශයේ නිවසකට පැමිණි පුද්ගලයින් දෙදෙනෙක් විසින් නිවසේ සිටි කාන්තාවක් ගැට ගසා ඇගේ ස්වාමි පුරුෂයා ඝාතනය කර රන් භාණ්ඩ කොල්ලකා ඇති බවට මාලඹේ පොලීසියට පැමිණිල්ලක් ලැබී තිබේ.

ඝාතනයට ලක්ව ඇත්තේ, අවුරුදු 80ක පුද්ගලයෙකි. මෘත ශරීරිය කොළඹ ජාතික රෝහලේ තැන්පත් කර ඇත. සැකකරුවන් අත්අඩංගුවට ගැනීම සඳහා මාලඹේ පොලීසිය වැඩිදුර විමර්ශන සිදුකරයි.

මේ අතර, පොලිස් මාධ්‍ය ඒකකය සඳහන් කළේ, ඊයේ (16) අලුයම කාලයේ දී සීදුව මුකලන්ගමුව ප්‍රදේශයේ, නිවසක කාන්තාවක් ඝාතනය කර දේපළ සොර ගෙන යෑමක් සම්බන්ධයෙන් විමර්ශන ආරම්භ කර ඇති බවය.

ඝාතනයට ලක්ව ඇති කාන්තාව අවුරුදු 73ක් වූ එම ප්‍රදේශයේ ම පදිංචිකාරියකි. මෘත ශරීරය මීගමුව රෝහලේ තැන්පත් කර ඇති අතර, සැකකරු අත්අඩංගුවට ගැනීමට සීදුව පොලීසිය පරීක්ෂණ පවත්වයි.