පාසල් ආරම්භ කරන දිනය මෙන්න.

දිවයින පුරා තෝරාගත් පාසල් ඔක්තෝබර් 21 දා නැවත විවෘත කිරීමට තීරණය කර තිබෙනවා.

ඒ අනුව පළාත් සභා යටතේ පාලනය වන ළමයින් 200ට අඩු පාසල්වල ප්‍රාථමික අංශයේ අධ්‍යාපන කටයුතු මෙලෙස ලබන ඔක්තෝබර් 21 වනදා සිට ආරම්භ කිරීමට තීරණය කර ඇත.

පළාත් ආණ්ඩුකාරවරු විසින් ඊට අදාළ තීරණය ගෙන ඇති බවයි වාර්තා වන්නේ.

මේ අතර ලෝක ගුරු දිනය අදට (05) යෙදී තිබේ.

යුනෙස්කෝව ලෝක ගුරු දිනය ප්‍රකාශයට පත් කළේ 1994 ඔක්තෝම්බර් 5 වනදාය.

ලෝක ගුරු දිනයට සමගාමීව ශ්‍රී ලංකාව ගුරු දිනය සමරනු ලබන්නේ හෙටය.

සිය ගෞරවාන්විත සේවාව නිසා සමාජයේ වන්දනීයත්වයට භාජනය වන එකම තැනැත්තා ද ගුරුවරයා වෙයි.

මේ අතර අදට යෙදී ඇති ලෝක ගුරු දිනය වෙනුවෙන් ජනාධිපති ගෝඨාභය රාජපක්ෂ මහතා සිය ෆේස්බුක් පිටුව ඔස්සේ සටහනක් තබා තිබුණි.

එහි දැක්වෙන්නේ, "ගුරුවරයා යනු සුපැහැදිලි අනාගතයක් උදෙසා දරුවාට මඟ පෙන්වන්නා ය.

දෙමව්පිය ඇසුරෙන් පසු ගුරු ඇසුරට පත් වන දරුවා හික්මවමින් ගුණවත්, විනයගරුක හා දැනුමින් සපිරි දරුවකු බවට පරිවර්තනය කර සමාජගත කරන්නේ ගුරුවරයා ය.

එවැනි අභිමානවත් හා ගෞරවනීය වෘත්තියක නියැලෙන ඔබ සැමට සුබ ගුරු දිනයක් වේවා යි අද දින මාගේ සුභාශිංසන එක් කරන අතර ම තවත් සුවහසක් දරු පිරිසක් දැනුමින්, නුවණින් හා විනයෙන් පෝෂණය කිරීමට හැකි වේවා යි මම ප්‍රාර්ථනා කරමි."