ගැටලුවලට විසඳුම් නැත්නම් දැඩි වෘත්තීය සමිති ක්‍රියාමාර්ගයකට - දුම්රිය ස්ථානාධිපති සංගමයෙන් රතු එළියක්

දුම්රිය සේවයේ පවතින පරිපාලනමය, සේවාමය හා විගණන ක්‍රියාවලියට අදාළ ගැටලු රැසකට බලධාරීන් මෙතෙක් නිසි විසඳුම් ලබා දී නොමැති බව පවසමින් ශ්‍රී ලංකා දුම්රිය ස්ථානාධිපති සංගමය විසින් මාධ්‍ය නිවේදනයක් නිකුත් කර තිබේ.

ඔවුන් එමඟින් වැඩිදුරටත් අනතුරු අඟවා ඇත්තේ අදාළ ඉල්ලීම් සඳහා සාධාරණ කාලසීමාවක් තුළ ප්‍රායෝගික විසඳුම් ලබා නොදුනහොත්, සහෝදර දුම්රිය වෘත්තීය සමිති සමඟ සාකච්ඡා කර දැඩි වෘත්තීය සමිති ක්‍රියාමාර්ගවලට එළඹෙන බවයි දුම්රිය ස්ථානවල පැමිණීම හා පිටවීම පරීක්ෂා කිරීම විගණන ක්‍රියාවලියක එක් කොටසක් පමණක් බව පෙන්වා දෙන සංගමය, වසර ගණනාවක් තිස්සේ නිසි විගණනයකට ලක් නොවූ දුම්රිය ස්ථාන පවතින බව සදහන් කර තිබේ.

එසේම, විභාග හා සම්මුඛ පරීක්ෂණ පවත්වා තිබියදීත් දිස්ත්‍රික් ප්‍රවාහන පරීක්ෂක තනතුරු සඳහා පත්වීම් වසර දෙකකට අධික කාලයක් ප්‍රමාද කිරීම නිසා විනය පරීක්ෂණ ඇතුළු අත්‍යවශ්‍ය පරිපාලන කටයුතු ගොඩගැසී ඇති බව එම සංගමය චෝදනා කර ඇත.

මෙම දුම්රිය ස්ථානාධිපති සේවයට සෘජුව බලපාන සේවා ව්‍යවස්ථාව සහ බඳවාගැනීමේ පටිපාටියට අදාළ අන්තර්කාලීන විධිවිධාන තවදුරටත් ප්‍රමාදවීම බරපතළ ගැටලුවක් බවත්, සේවා වාර කප්පාදුව වැනි ක්‍රියාමාර්ගවලදී දුම්රිය ස්ථානාධිපති සේවය පමණක් අසාධාරණ ලෙස ඉලක්ක කිරීම පිළිගත නොහැකි බවත් ඔවුන් අවධාරණය කරයි.

සංගමයේ දැඩි අවධානය යොමුවී ඇත්තේ දිනෙන් දින අඩාල වන දුම්රිය ධාවනය, යටිතල පහසුකම්වල පවතින ගැටලු, භාවිතයට ගත නොහැකි දුම්රිය සම්පත්, සේවා අවශ්‍යතා සඳහා ප්‍රමාණවත් ප්‍රතිපාදන නොලැබීම සහ දෙපාර්තමේන්තුව සතු ඉංජිනේරු හා තාක්ෂණික සම්පත් නිසි ලෙස යොදා නොගැනීම පිළිබඳවයි මෙම පවතින ගැටලු පිළිබදව සාකච්ඡා මාර්ගයෙන් විසඳුම් ලබාගැනීම සඳහා අමාත්‍යාංශ ලේකම්වරයා ඇතුළු වගකිවයුතු බලධාරීන්ගෙන් අවස්ථා ගණනාවකදී සාකච්ඡා ඉල්ලා සිටියද, මෙතෙක් ප්‍රමාණවත් ප්‍රතිචාරයක් ලැබී නොමැති බව ශ්‍රී ලංකා දුම්රිය ස්ථානාධිපති සංගමය දැඩි කනගාටුවෙන් යුතුව ප්‍රකාශ කරයි.

විනිසුරු වයස් සීමා ලිපියට ජනපතිගෙන් පිළිතුරක් නැහැ - මල්වතු මහ නාහිමියන්ගෙන් දැඩි කණගාටුව

මහජනතාවට විශ්වාසනීය හා කාර්යක්ෂම දුම්රිය සේවාවක් පවත්වාගෙන යාම සඳහා අවශ්‍ය පරිපාලන හා සේවාමය තීරණ කඩිනමින් ලබාගැනීම තම එකම අරමුණ වන බවද එම නිවේදනයේ තව දුරටත් ප්‍රකාශ කර ඇත