වාද්දුවෙන් ඇසුණු කඳුළු සලන පුවතක් - ඩෙංගු හැදී මාස 7ක ගැබිනි මව සහ නූපන් දරුවා ජීවිතක්ෂයට

ශ්‍රී ලංකාවේ අඛණ්ඩව ව්‍යාප්ත වන ඩෙංගු රෝගයේ බරපතල තත්ත්වය තවත් ඛේදනීය සිදුවීමකින් අනාවරණය වී තිබේ. වාද්දුව ප්‍රදේශයේ ගැබිනි මවක් සහ ඇගේ මාස හතක නූපන් දරුවා ඩෙංගු ආසාදනය හේතුවෙන් මියගොස් ඇති බව වාර්තා වේ.

දරුණු ලෙස රෝගාතුර වූ මෙම කාන්තාව ප්‍රතිකාර සඳහා රෝහල්ගත කිරීමෙන් අනතුරුව දැඩි සත්කාර ඒකකයට ඇතුළත් කර තිබුණද, වෛද්‍යවරුන්ගේ දැඩි උත්සාහය මධ්‍යයේ මව සහ නූපන් දරුවාගේ ජීවිත බේරා ගැනීමට නොහැකි වී ඇත. නිල දත්තවලට අනුව, 2026 වසරේ මේ දක්වා ශ්‍රී ලංකාවෙන් ඩෙංගු රෝගීන් 86,386ක් වාර්තා වී ඇති අතර, මරණ සංඛ්‍යාව 62ක් දක්වා ඉහළ ගොස් තිබේ.

මරණ අනුපාතය 0.07%ක් ලෙස දැක්වේ. ජූලි මාසයේදී පමණක් රෝගීන් 30,000කට ආසන්න සංඛ්‍යාවක් හඳුනාගෙන ඇති අතර, අගෝස්තු මාසයේ දැනටමත් රෝගීන් 1,000කට වැඩි පිරිසක් වාර්තා වී ඇත.

වසර 16කට පස්සේ පේරාදෙණියෙන් දැකබලා ගන්න ලැබෙන අපූරු අත්දැකීම- ලොව විශාලතම යෝධ උඩවැඩියා මල පිපෙයි

පළාත් අනුව වැඩිම රෝගීන් වාර්තා වී ඇත්තේ බස්නාහිර පළාතෙන් වන අතර, ගම්පහ දිස්ත්‍රික්කයෙන් රෝගීන් 18,321ක් සහ කොළඹ දිස්ත්‍රික්කයෙන් 17,101ක් වාර්තා වී තිබේ.

එම පළාතෙන් සමස්ත රෝගීන් 45,675ක් වාර්තා වී ඇති අතර, දකුණු පළාතෙන් රෝගීන් 12,969ක් සහ මධ්‍යම පළාතෙන් 7,567ක් හඳුනාගෙන ඇත. මෝසම් වැසි අඛණ්ඩව පවතින බැවින් මදුරු බෝවන ස්ථාන විනාශ කිරීම, නිවාස හා පරිසරය පිරිසිදුව තබා ගැනීම සහ ඩෙංගු මර්දන වැඩසටහන් සඳහා සක්‍රීයව සහාය ලබා දෙන ලෙස සෞඛ්‍ය බලධාරීන් ජනතාවගෙන් ඉල්ලා සිටියි.

''තවත් දරාගන්න බෑ" සුපිරි ගායිකා අරියානා ග්‍රාන්ඩේ සංගීත ක්ෂේත්‍රයෙන් තාවකාලිකව ඉවත් වීමට තීරණය කරයි