ඉල්ලුම අඩුවෙද්දී තෙල් මිලත් බැස යයි - ලෝක තෙල් වෙළඳපොළේ අලුත්ම පෙරළිය මෙන්න

ඉරානයට එරෙහි එක්සත් ජනපද–ඊශ්‍රායල ගැටුම හේතුවෙන් ගෝලීය ඉන්ධන ඉල්ලුමට බලපෑම් එල්ල වෙමින් පවතින අතර, 2026 වසර සඳහා තෙල් ඉල්ලුම් වර්ධන පුරෝකථන පහත හෙළීමත් සමඟ බ්‍රහස්පතින්දා ලෝක වෙළඳපොළේ තෙල් මිල ඩොලර් 1කට වැඩි ප්‍රමාණයකින් පහත වැටුණි.

කෙසේ වෙතත්, මැද පෙරදිග සැපයුම් සීමා පිළිබඳ අවදානම මිල තවදුරටත් පහත වැටීම වළක්වන සාධකයක් විය. GMT 0100 වන විට බ්‍රෙන්ට් අනාගත තෙල් බැරලයක මිල ඩොලර් 1.29කින් හෙවත් 1.5%කින් පහත වැටී ඩොලර් 87.69ක් විය.

එක්සත් ජනපදයේ West Texas Intermediate (WTI) බොරතෙල් මිල ද ඩොලර් 1.30කින් හෙවත් 1.6%කින් පහත වැටී බැරලයකට ඩොලර් 81.97ක් දක්වා පැමිණියේය.

ධන භාවය මත සඳු ගෝචර වන අද දිනය මේ ලග්න හිමියන්ට මුදල් කටයුතු හා පවුලේ සමගිය කෙරෙහි සුබවාදී බලපෑමක්

ඛනිජ තෙල් අපනයන රටවල සංවිධානය (OPEC) බදාදා නිකුත් කළ මාසික තෙල් වෙළඳපොළ වාර්තාවෙන් 2026 වසර සඳහා ගෝලීය තෙල් ඉල්ලුම් වර්ධන පුරෝකථනය දිනකට බැරල් 580,000ක් දක්වා පහත හෙළීය. එමෙන්ම ජාත්‍යන්තර බලශක්ති ඒජන්සිය (IEA) ද මේ වසරේ ගෝලීය තෙල් පරිභෝජනය දිනකට බැරල් මිලියන 1.6කින් අඩුවනු ඇතැයි පුරෝකථනය කළේය. එය පෙර මාසයේ පුරෝකථනය කළ දිනකට බැරල් මිලියනයක අඩුවීමට වඩා සැලකිය යුතු පහළ යාමකි.

සීමිත ඉන්ධන සැපයුම සහ ඉහළ මිල ගණන් හේතුවෙන් ඉල්ලුම දුර්වල වී ඇති බව IEA පෙන්වා දෙයි. මේ අතර, එක්සත් ජනපදයේ වාණිජ බොරතෙල් තොග විශාල ලෙස ඉහළ යාමද තෙල් මිලට පීඩනයක් එල්ල කර තිබේ. එක්සත් ජනපද බලශක්ති තොරතුරු පරිපාලනය (EIA) සඳහන් කළේ අගෝස්තු 7 වැනිදායින් අවසන් වූ සතිය තුළ බොරතෙල් තොග බැරල් මිලියන 17.4කින් ඉහළ ගොස් බැරල් මිලියන 424.4ක් වූ බවයි.

එය ජුනි 5 වැනිදායින් පසු වාර්තා වූ ඉහළම තොග මට්ටමයි.

කෙසේ වෙතත්, ගල්ෆ් කලාපයේ ගැටුම අවසන් කිරීම සම්බන්ධයෙන් ඉරානය සහ එක්සත් ජනපදය අතර පැවැත්වෙන සාකච්ඡාවල ප්‍රගතියක් නොමැතිවීම තෙල් මිලට යම් සහායක් ලබා දෙයි.

ජූනි මාසයේදී එකඟ වූ අන්තර්වාර ගිවිසුම යළි ක්‍රියාත්මක කිරීම සහ එය ක්‍රියාත්මක කිරීම සඳහා කාලසටහනක් සකස් කිරීම සම්බන්ධයෙන් සාකච්ඡාවල ප්‍රගතියක් නොමැති බව ඉරාන ජ්‍යෙෂ්ඨ මූලාශ්‍රයක් බදාදා ප්‍රකාශ කළේය. මැද පෙරදිග තෙල් හා ගෑස් ප්‍රවාහනය සඳහා අතිශය වැදගත් මාර්ග වන හෝමූස් සමුද්‍ර සන්ධිය සහ බබ් එල්-මැන්ඩෙබ් සමුද්‍ර සන්ධිය ආශ්‍රිතව අඟහරුවාදා සිදුවූ ප්‍රහාරද කලාපයෙන් ගෝලීය වෙළඳපොළට සිදුවන තෙල් සැපයුම පිළිබඳ පවතින අවදානම තවදුරටත් ඉස්මතු කර තිබේ.

Haitong Futures විශ්ලේෂකයන් සඳහන් කළේ මෙම මුහුදු මාර්ගවල යාත්‍රා කිරීමේ ආරක්ෂාව තවදුරටත් පිරිහී ඇති අතර, සමහර යාත්‍රාවලට තම සංඥා අක්‍රිය කිරීමට සිදුවීම හේතුවෙන් නැව් ගමනාගමනයේ විනිවිදභාවය අඩුවී ඇති බවයි.

එම තත්ත්වය වෙළඳපොළට සැබෑ සැපයුම් මට්ටම් නිරීක්ෂණය කිරීම හා තක්සේරු කිරීම වඩාත් දුෂ්කර කරයි.