ඊශ්‍රායලයේ ගාසා ප්‍රහාරයකින් 18ක් මරුට – ලේ වතුර වුනු වෙළඳපොල

මධ්‍යම ගාසාවේ ඩෙයිර් අල්-බලා නගරයේ මහජන වෙළෙඳපොළකට එල්ල වූ ඊශ්‍රායල ඩ්‍රෝන ප්‍රහාරයකින් පාලස්තීනුවන් 18 දෙනෙකු මිය ගොස් ඇති බව වාර්තා වේ.

මෙම ප්‍රහාරය සිදුව ඇත්තේ වෙළෙඳපොළ තුළ ජනතාව රැස්ව සිටි අවස්ථාවකදීය. හමාස් පොලිස් ඒකකයක් පිරිස පාලනය කිරීමට උත්සාහ කරමින් සිටි අවස්ථාවේ එම ඒකකය ඉලක්ක කර ඊශ්‍රායල ඩ්‍රෝන ප්‍රහාරය එල්ල වූ බව විදෙස් මාධ්‍ය වාර්තා කරයි.

වෛද්‍යවරයෙකු ඇතුළු සාක්ෂිකරුවන් බීබීසී වෙත පවසා ඇති පරිදි, අවම වශයෙන් පාලස්තීනුවන් 18 දෙනෙකු මිය ගොස් ඇත.

සිවිල් ඇඳුමින් සැරසී, මුහුණු ආවරණ පැළඳ සිටි හමාස් පොලිස් සාමාජිකයින්, මිල ඉහළ නැංවීම සහ ආධාර ලොරිවලින් සොරකම් කළ භාණ්ඩ විකිණීමේ චෝදනා ලැබූ වෙළෙන්දන්ට එරෙහිව මැදිහත් වූ අවස්ථාවේදී ඊශ්‍රායල ඩ්‍රෝන යානා ඔවුන්ට වෙඩි තැබීය.

හමාස් පාලනයේ පවතින අභ්‍යන්තර කටයුතු අමාත්‍යාංශය මෙම ප්‍රහාරය හෙළා දකිමින්, "මහජන ගැටලුවක් විසඳමින් සිටි පොලිස් ඒකකයකට එරෙහි අපරාධයක්" ලෙස ඊශ්‍රායලයට චෝදනා කළේය. ප්‍රහාරයෙන් පසු ලබාගත් වීඩියෝ දර්ශනවල බිම විසිරී ඇති මෘත දේහ, තුවාලකරුවන්ට ප්‍රතිකාර කිරීමට ගිලන් රථ ඉක්මනින් පැමිණෙන අයුරු සහ බියට පත් වෙළෙන්දන් කෑ ගසන අයුරු දැක්වේ.

ඩෙයිර් අල්-බලා හි අල්-අක්සා රෝහලට අනුව, මෘත දේහ 18ක් ගෙන එන ලදි. මියගිය අය අතර පොලිස් නිලධාරීන් කීදෙනෙකු සිටින බව තවමත් තහවුරු වී නැත.