ඉන්දියාව - ජපානය අතර ක්‍රිකට් ඉතිහාසයේ අලුත් පිටුවක් - පළමු වතාවට T20 තරගයකට සූදානමින්

ආසියානු ක්‍රීඩා උළෙලට පෙර ඉන්දියාව සහ ජපානය අතර ඉතිහාසයේ පළමු විස්සයි විස්ස ක්‍රිකට් තරගය සැප්තැම්බර් 22 වැනිදා පැවැත්වීමට නියමිතය. ඒ අනුව දෙරටේ ජාතික කණ්ඩායම් පළමු වරට ක්‍රිකට් තරගයකදී එකිනෙකා හමුවන්නේ ජපානයේ ටොචිගි ප්‍රාන්තයේ පිහිටි Sano International Cricket Ground ක්‍රීඩාංගණයේදීය.

කෙසේ වෙතත්, මෙම ඓතිහාසික තරගය සඳහා රූපවාහිනී විකාශන අයිතිය සම්බන්ධයෙන් මේ වන විට ගැටලුකාරී තත්ත්වයක් මතුව ඇති බව වාර්තා වේ. Cricbuzz වාර්තාවකට අනුව, ජපාන ක්‍රිකට් සංගමය (JCA) තරගයේ විකාශන අයිතිය සම්බන්ධයෙන් ITW Universe ආයතනය සමඟ සාකච්ඡා කරමින් සිටී.

ආසියානු ක්‍රීඩා උළෙල ආරම්භ වීමට දින දෙකකට පෙර මෙම තරගය පැවැත්වීම හේතුවෙන් විකාශන කටයුතු සම්බන්ධයෙන් ප්‍රායෝගික හා සැපයුම් ගැටලු මතුව ඇති බවද සඳහන් වේ. රූපවාහිනී විකාශන ගිවිසුම මෙතෙක් අවසන් කර නොමැති අතර, තරගය YouTube ඔස්සේ සජීවීව විකාශය කිරීමට ඉඩ ඇති බවද වාර්තා වේ.

ඉන්දියාව තුළ තරගයේ විකාශන කටයුතු සඳහා FanCode ද සම්බන්ධ වී සිටින අතර, එම ආයතනය මීට පෙර ජපාන ක්‍රිකට් සංගමය සමඟ පුළුල් ලෙස කටයුතු කර තිබේ. මේ අතර ITW Universe ආයතනය Star, Sony සහ Zee ආයතන සමඟද සාකච්ඡා පවත්වමින් සිටින බව සඳහන්ය.

යෝධ කැරිබියානුවන්වරු අභිබවා ගිය දසුන්ගේ වේගවත්ම ශතකය [HILIGHT

කෙසේ වෙතත්, මෙම තරගයේ විකාශනය තවත් අභියෝගයකට මුහුණ දිය හැකි තත්ත්වයක් පවතී. ඉන්දීය පිරිමි කණ්ඩායම සහ ජපානය අතර තරගය ආරම්භ වී පැයකට පමණ පසු, ඉන්දීය කාන්තා කණ්ඩායම සහභාගී වන ආසියානු ක්‍රීඩා උළෙලේ කාන්තා ක්‍රිකට් අවසන් තරගය ජපානයේ Aichi ප්‍රාන්තයේ Nisshin City හි Korogi Athletic Park ක්‍රීඩාංගණයේදී පැවැත්වීමට නියමිතව තිබීම ඊට හේතුවයි.

ඉන්දීය කාන්තා කණ්ඩායම ආසියානු ක්‍රීඩා උළෙලේ රන් පදක්කම දිනා ගැනීමට ප්‍රබල අපේක්ෂකයන් ලෙස සැලකෙන බැවින්, තරග දෙකම එකවර ආසන්න කාලසීමාවක විකාශය කිරීම විකාශන ආයතන සඳහා සැලකිය යුතු අභියෝගයක් විය හැකිය.

ජපානය සමඟ පැවැත්වෙන තරගයට දින දෙකකට පෙර ඉන්දීය කණ්ඩායම Sano හිදී පුහුණු සැසියකටද එක්වීමට නියමිතය. මේ අතර, මෙම ඓතිහාසික තරගයට ක්‍රීඩාමය වැදගත්කමට අමතරව රාජ්‍යතාන්ත්‍රික වැදගත්කමක්ද හිමිව තිබේ.

ඉන්දියාව සහ ජපානය අතර රාජ්‍යතාන්ත්‍රික සබඳතාවල 75 වැනි සංවත්සරය සනිටුහන් කිරීම වෙනුවෙන් ක්‍රියාත්මක වන ‘Sport 75’ වැඩසටහන නිල වශයෙන් ආරම්භ කිරීමේ අවස්ථාවක් ලෙසද මෙම තරගය පැවැත්වේ.

‘Suzuki Cup’ වෙනුවෙන් පැවැත්වෙන මෙම තරගය හරහා නැගෙනහිර ආසියාව තුළ ක්‍රිකට් ක්‍රීඩාවේ ව්‍යාප්තිය පුළුල් කිරීම මෙන්ම ඉන්දියාව සහ ජපානය අතර ද්විපාර්ශ්වික සබඳතා තවදුරටත් ශක්තිමත් කිරීමද අපේක්ෂා කෙරේ.

එමෙන්ම, 2036 ඔලිම්පික් ක්‍රීඩා උළෙල පැවැත්වීම සඳහා ඉන්දියාව ඉදිරිපත් කර ඇති ලංසුවට පෙර, මෙම තරගය දෙරට අතර ක්‍රීඩා සබඳතා වර්ධනය කිරීමේ වැදගත් පියවරක් ලෙසද සැලකේ.

බංග්ලාදේශය පරදා ශ්‍රී ලංකා කාන්තා ක්‍රිකට් කණ්ඩායම ආසියානු කුසලාන අවසන් පූර්ව වටයට [HILIGHT