දෙසැම්බර් වන විට බරපතල ප්‍රතිවිපාකවලට මුහුණ දෙන්න ලේස්ති වෙන්න - එජාපය කියයි

එක්සත් ජාතික පක්ෂ (එජාප) සභාපති හිටපු අමාත්‍ය වජිර අබේවර්ධන මහතා පවසන්නේ, ආර්ථික හා දේශපාලන ප්‍රතිසංස්කරණ ක්‍රියාත්මක කිරීමේ ප්‍රමාදයන් හේතුවෙන් 2025 දෙසැම්බර් වන විට ශ්‍රී ලංකාව බරපතල අර්බුදවලට මුහුණ දෙනු ඇති බවයි.

ඔහු මේ බව ප්‍රකාශ කළේ ඊයේ (11) කොළඹ මල් පාරේ පිහිටි එජාප කාර්යාලයේ පැවති මාධ්‍ය හමුවකදීය.

ශ්‍රී ලාංකික තරුණයෙක් මැලේසියාවේදී මිය ගිය අයුරු

“ජනාධිපති, අගමැති ඇතුළු තනතුරු ලබා ගැනීම සඳහා ජනතාවට තවදුරටත් බොරු කීමෙන් වළකින්න. එසේ කිරීමෙන් සිදුවන්නේ ඔබේම විනාශය පමණයි,” යැයි ඔහු අවධාරණය කළේය.

දූෂණ විරෝධී පනත සහ රනිල්ගේ භූමිකාව

වජිර අබේවර්ධන මහතා වැඩිදුරටත් පැවසුවේ, පසුගිය වසර දෙකහමාර තුළ රනිල් වික්‍රමසිංහ ජනාධිපතිවරයා රටේ ආර්ථික යථා තත්ත්වයට පත් කිරීම සඳහා ගත් පියවර ශ්‍රී ලාංකික ජනතාව විසින් තේරුම් ගත යුතු බවයි.

“උදාහරණයක් ලෙස, අයථා ලෙස උපයාගත් දේපළ අත්පත් කර ගැනීමේ පනතක් පාර්ලිමේන්තුවට ඉදිරිපත් කරමින් රනිල් වික්‍රමසිංහ ජනාධිපතිවරයා විශාල හඩක් නැගුවා. මෙම කැබිනට් පත්‍රිකාව 2024 ජුලි 16 වැනිදා ඉදිරිපත් කළේ ඔහු බව මතක තබා ගත යුතුයි. ජාත්‍යන්තර මූල්‍ය අරමුදල (IMF) සමඟ එකඟ වූ කරුණු අනුව මෙම පනත ඉදිරිපත් කෙරුණි. එය ‘දූෂණ විරෝධී ජාතික න්‍යාය පත්‍රය’ ලෙස නම් කර පිටු 8කින් සමන්විත ය. මෙහි පළමු පියවර ලෙස දූෂණ විරෝධී පනත නීතිගත කළ නමුත්, එය තවමත් නිසි ලෙස ක්‍රියාත්මක වන බවක් නොපෙනේ,” යැයි ඔහු පැවසීය.

අලුත් අවුරුද්දට මුදල් දෙන අසත්‍ය ප්‍රචාරයකට ඔබත් රැවටුනාද?

ක්ලීන් ශ්‍රී ලංකා ආරම්භය

“ක්ලීන් ශ්‍රී ලංකා වැඩසටහන ආරම්භ කළේ වත්මන් රජය නොව, රනිල් වික්‍රමසිංහ ජනාධිපතිවරයා ය. මෙම කැබිනට් පත්‍රිකාවේ 1(3) වගන්තිය යටතේ, එක්සත් ජාතින්ගේ දූෂණ විරෝධී සම්මුතියට සහ මූල්‍ය ක්‍රියාකාරී කාර්ය සාධන බලකායේ (FATF) ප්‍රමිතිවලට අනුකූලව, වත්කම් අයකර ගැනීමේ පනත් කෙටුම්පතක් සකස් කිරීමට අමාත්‍ය මණ්ඩලය අනුමැතිය ලබා දුන්නා. එය 2024 ජුලි 16 වැනිදා අනුමත වුණි. මෙම පනත් කෙටුම්පත නීති කෙටුම්පත් සම්පාදකවරයාගේ අවසන් ලේඛනය ලෙස ඉදිරියේදී ගැසට් පත්‍රයේ පළ කෙරෙනු ඇත,” යැයි ඔහු පැවසීය.   

ප්‍රමාදයන්ගේ ප්‍රතිවිපාක

වජිර අබේවර්ධන මහතා අවධාරණය කළේ, ජාත්‍යන්තර මූල්‍ය ආයතන සමඟ එකඟ වූ කරුණු ඉටු නොකිරීම හේතුවෙන් IMF මුදල් ලැබීම ප්‍රමාද වී ඇති බවයි. “පසුගිය රජයේ සිට වත්මන් රජයට බලය හුවමාරු වීමත් සමඟ මෙම ප්‍රමාදයන් උද්ගත වුණා. මෙයින් රටේ ආර්ථිකයට නියමිත වේලාවට ඉටු කළ යුතු ප්‍රතිසංස්කරණ ක්‍රියාත්මක නොවීම නිසා දිනෙන් දින බරපතල අවාසනාවන්ත තත්ත්වයන්ට රට තල්ලු වෙමින් තිබෙනවා,” යැයි ඔහු පැවසීය.

රනිල්ගේ පනත් 92 සහ ජාතික එකඟතාව  

“රනිල් වික්‍රමසිංහ ජනාධිපතිවරයා අටවැනි විධායක ජනාධිපති ලෙස පත්වීමෙන් පසු, ජාතියේ යහපත සඳහා පනත් 92ක් පාර්ලිමේන්තුවට ඉදිරිපත් කළා. මෙම පනත් හරහා ස්ථාවර ආර්ථිකයක් ගොඩනැගීම ඔහුගේ අරමුණ වුණා. ඔහු සියලු දේශපාලන පක්ෂවලට ජාතික ප්‍රතිපත්ති රාමුවකට එකඟ වන ලෙස ආරාධනා කළා. ඒ සඳහා පාර්ලිමේන්තු කමිටු ගණනාවක් පත් කළ නමුත්, සමහර දේශපාලනඥයින් පටු අරමුණු සඳහා ඒවාට සහභාගී නොවුණා,” යැයි ඔහු සඳහන් කළේය.

“රනිල් වික්‍රමසිංහ ජනාධිපතිවරයා ජාතික එකඟතාවයකට එළඹීමට උත්සාහ කළේ ජාතියක් ලෙස ශක්තිමත්ව ඉදිරියට යාමටයි. දේශපාලන ස්ථාවරත්වයක් නොමැති නම්, පසුගිය වසර 77 තුළ ප්‍රජාතන්ත්‍රවාදයේ අභියෝග හමුවේ ආර්ථිකව ශක්තිමත් ජාතියක් ගොඩනැගීමට අපට බාධා ඇති වුණා. එයින් රට මුදවා ගැනීමට ඔහු උත්සාහ කළා,” යැයි ඔහු පැවසීය.

අධි වේගයේ යන හැමෝටම විශේෂ පණිවිඩයක්

විදෙස් ආයෝජකයින්ගේ විශ්වාසය බිඳවැටීම   

“ආණ්ඩුවෙන් ආණ්ඩුවට වෙනස් වන ප්‍රතිපත්ති නිසා විදෙස් ආයෝජකයින්ගේ විශ්වාසය බිඳවැටිලා. එක් ආණ්ඩුවකින් ගෙන එන ආයෝජන ඊළඟ ආණ්ඩුව විසින් වෙනස් කරනවා. මෙය ශ්‍රී ලංකාව කෙරෙහි ආයෝජක විශ්වාසය අඩු කරනවා,” යැයි ඔහු පෙන්වා දුන්නේය.

ජනතාවට බොරු නොකරන ලෙස ඉල්ලීම

“මේ අලුත් අවුරුද්දේ සියලු දේශපාලන පක්ෂවලින් මම ඉල්ලන්නේ, ජනතාවට බොරු කියමින් ජනාධිපතිකම, අගමැතිකම, හෝ මන්ත්‍රී ධුර ලබා ගැනීමට උත්සාහ නොකර, සත්‍ය කථා කරන ලෙසයි. එසේ කිරීමෙන් ඔවුන් තමන්ගේම අනාගතය විනාශ කර ගනීවි. සත්‍ය ප්‍රකාශ කිරීමෙන් ශ්‍රී ලංකාවට දියුණුව කරා යාමට අවස්ථාව ලැබෙනවා,” යැයි වජිර අබේවර්ධන මහතා අවසන් කළේය.