රාජ්‍ය සේවය අලුත් කරයි - ශ්‍රී ලාංකික රාජ්‍ය නිලධාරීන්ට පුහුණුව සහ සීමාවාසික පුහුණුවක්
රටේ රාජ්‍ය සේවය නවීකරණය කිරීමේ ප්‍රයත්නයන්හි කොටසක් වශයෙන් ශ්‍රී ලංකා රාජ්‍ය නිලධාරීන් සඳහා පුහුණු වැඩසටහන් සහ සීමාවාසික පුහුණු අවස්ථා ලබා දීමට ශ්‍රී ලංකාව සහ අසර්බයිජානය අවබෝධතා ගිවිසුමකට අත්සන් තබා ඇති බව වාර්තා වේ.
ඒ අනුව රාජ්‍ය පරිපාලන, පළාත් සභා සහ පළාත් පාලන අමාත්‍යාංශයට අනුව, ඉකුත් නොවැම්බර් 7 වන දින අමාත්‍යාංශය සහ අසර්බයිජානයේ ASAN සේවා ආයතනය අතර මෙම ගිවිසුම අත්සන් කර තිබෙනවා.
ශ්‍රී ලංකාව වෙනුවෙන් රාජ්‍ය පරිපාලන, පළාත් සභා සහ පළාත් පාලන අමාත්‍ය චන්දන අබේරත්න මහතා මෙම ගිවිසුමට අත්සන් තැබූ බව සඳහන්.
එසේම ගිවිසුම යටතේ, රාජ්‍ය සේවා සැපයීමට අදාළ අංශවල සේවය කරන ශ්‍රී ලාංකික රාජ්‍ය නිලධාරීන්ට පුහුණුව සහ සීමාවාසික පුහුණුව ලබා දෙනු ඇති බව වාර්තා වේ.
ඒ අනුව මෙම මුලපිරීම මඟින් අසර්බයිජානයේ තෝරාගත් ශ්‍රී ලාංකික පුහුණුකරුවන් සඳහා පුහුණුව ලබා දීමට ද පහසුකම් සපයනු ඇති අතර, අනතුරුව ඔවුන් ශ්‍රී ලංකාවේ රාජ්‍ය නිලධාරීන් සඳහා පුහුණු වැඩසටහන් සංවර්ධනය කර පවත්වයි.
එසේම අමාත්‍යාංශය පැවසුවේ ඉදිරි වසර තුන තුළ ශ්‍රී ලංකාවේ රාජ්‍ය පරිපාලන අංශයේ සහ රාජ්‍ය සේවා සැපයුම් යාන්ත්‍රණයන්හි සැලකිය යුතු දියුණුවක් වෙනුවෙන් මෙම ගිවිසුම දායක වනු ඇති බව අපේක්ෂා කරන බවයි.
ඉකුත් නොවැම්බර් 5 සහ 6 යන දිනවල අසර්බයිජානයේ බකු හි ගුලුස්තාන් මාලිගයේ පැවති එක්සත් ජාතීන්ගේ රජයේ නවෝත්පාදන සමුළුවට සමගාමීව මෙම අවබෝධතා ගිවිසුමට අත්සන් තබා ඇත.
එසේම සමුළුවේ පැවති විද්වත් සාකච්ඡාවක් අමතමින් අමාත්‍ය අබේරත්න මහතා, මහජන විශ්වාසය ශක්තිමත් කරන අතරම, ශ්‍රී ලංකාවේ රාජ්‍ය සේවය ප්‍රතිසංස්කරණය කිරීමේ සහ ඩිජිටල්කරණය කිරීමේ වැදගත්කම ද අවධාරණය කළ බව සඳහන්.
තවද ඔහු සියලුම ප්‍රජාවන්ට, විශේෂයෙන් ග්‍රාමීය ජනගහනයට සහ අවදානමට ලක්විය හැකි කණ්ඩායම්වලට පොදු සේවාවන් පහසුවෙන් ලබා ගත හැකි බව සහතික කිරීමේ අවශ්‍යතාව ද අවධාරණය කර ඇත.
මෙම සමුළුව එක්සත් ජාතීන්ගේ ආර්ථික හා සමාජ කටයුතු දෙපාර්තමේන්තුව (UN DESA) සහ අසර්බයිජානයේ ASAN සේවය එක්ව සංවිධානය කරන ලද අතර, නවෝත්පාදනය, ඩිජිටල් පරිවර්තනය සහ රාජ්‍ය සේවා සැපයීමේ වැඩිදියුණු කිරීම් පිළිබඳව සාකච්ඡා කිරීම වෙනුවෙන් රටවල් 100කට අධික සංඛ්‍යාවක නියෝජිතයින් එක්රැස් විය.
