හිටපු රාජ්‍ය අමාත්‍ය පිල්ලෙයාන්ගේ තොණ්ඩුව තවත් හිර වෙයි - යළිත් රිමාන්ඩ්
මඩකලපුව ප්‍රදේශයේ ඉකුත් 2008 වසරේ T-56 වර්ගයේ ගිනිඅවියකින් වෙඩි තබා පුද්ගලයින් පස් දෙනෙකු ඝාතනය කිරීමේ සිද්ධිය සම්බන්ධයෙන් අත්අඩංගුවට ගත් හිටපු රාජ්‍ය අමාත්‍ය විනායගමූර්ති මුරලිදරන් හෙවත් පිල්ලෙයාන් ඇතුළු තිදෙනා එළඹෙන 23 වැනි දින තෙක් රක්ෂිත බන්ධනාගාර ගත කිරීමට මඩකලපුව මහේස්ත්‍රාත් අධිකරණය අද (10) දින නියෝග කළ බව සඳහන්.
මෙසේ විමර්ශනයට ලක්ව ඇත්තේ 2008 වසරේදී කල්ලඩි ප්‍රදේශයේදී පොලිස් නිලධාරියෙකු ඇතුළු දෙදෙනෙකු වෙඩි තබා ඝාතනය කිරීම, කාත්තන්කුඩි ප්‍රදේශයේදී TMVP පක්ෂයේ සාමාජිකයෙකු ඇතුළු දෙදෙනෙකු වෙඩි තබා ඝාතනය කිරීම සහ වවුනතීවු කරෙයියක්කන්තීවු ප්‍රදේශයේ ව්‍යාපාරිකයෙකු පැහැරගෙන ගොස් ඝාතනය කිරීම යන සිදුවීම් සඳහායි.
එසේම මෙම ඝාතන සිදුවීම්වලට අදාළව, 2025 වසරේ අප්‍රේල් මාසයේදී ත්‍රස්තවාදය වැළැක්වීමේ පනත යටතේ අත්අඩංගුවට ගැනුණු'පිල්ලෙයාන්' වශයෙන් හැඳින්වෙන හිටපු රාජ්‍ය අමාත්‍ය සිවනේසතුරෙයි චන්ද්‍රකාන්තන් සහ කාත්තන්කුඩි ප්‍රදේශයේ පදිංචි හමුදා බුද්ධි තොරතුරුකරුවන් වන මොහොමඩ් සිෆාන් සහ මොහොමඩ් සකීද් යන අය 2025 නොවැම්බර් මාසයේදී අපරාධ පරීක්ෂණ දෙපාර්තමේන්තුව (CID) විසින් අත්අඩංගුවට ගෙන ඇත.
එමෙන්ම මෙම සිදුවීම් සම්බන්ධයෙන් පිල්ලෙයාන්, හමුදා බුද්ධි තොරතුරුකරුවන් දෙදෙනා සහ දැනට ලන්ඩන් නුවර සිටින 'පොලිස් පායිස්' වශයෙන් හැඳින්වෙන මොහොමඩ් පායිස් යන සිව්දෙනාට එරෙහිව අපරාධ පරීක්ෂණ දෙපාර්තමේන්තුව මඟින් 2026 ජූනි 17 වන දින මඩකලපුව මහේස්ත්‍රාත් අධිකරණයේ නඩු පවරන ලද අතර එතැන් සිට ඔවුන් රක්ෂිත බන්ධනාගාරගත කර සිටියි.
එම නඩුව අද (10) දින විවෘත අධිකරණයේදී කැඳවූ අවස්ථාවේදී රක්ෂිත බන්ධනාගාරගත කර සිටි සැකකරුවන් වන මොහොමඩ් සිෆාන් සහ මොහොමඩ් සකීද් අධිකරණයට ඉදිරිපත් කළ අතර, පිල්ලෙයාන් වීඩියෝ තාක්ෂණය හරහා අධිකරණයට ඉදිරිපත් කර සිටියා.
ඒ අනුව එහිදී සැකකරුවන් තිදෙනා එළඹෙන 23 වන දින දක්වා තවදුරටත් රක්ෂිත බන්ධනාගාරගත කිරීමට නියෝග කෙරුණා.
