'ජපන් බාබා වැන්ගා' නාගනී? අනාවැකිය වැරදෙයි - ජපානය විනාශ වන බව කී දිනය පහුවෙයි

‘ජපන් බාබා වැන්ගා’ යන අන්වර්ථ නාමයෙන් ප්‍රසිද්ධ චිත්‍ර ශිල්පිනී රියෝ තත්සුකි තම ‘මා දුටු අනාගතය’ (The Future I Saw) නමැති චිත්‍රකතා ග්‍රන්ථය ඔස්සේ ජුලි 5 වැනිදා දැවැන්ත භූමිකම්පාවක් සහ සුනාමියක් ඇතිවිය හැකි බවට කළ අනාවැකියක් හේතුවෙන් ලොව පුරා දැඩි කතාබහක් සහ කනස්සල්ලක් ඇතිව තිබේ. 

කෙසේ වුවත්, ජපානය මේ වන විට ජුලි 5 පසුකර ජුලි 6 වැනිදාට ඇතුළත් වී ඇති අතර, මෙතෙක් කිසිදු භූමිකම්පාවක් හෝ සුනාමි අනතුරක් වාර්තා වී නොමැත.

මෙම ග්‍රන්ථය ඇගේ සිහින මත පදනම් වූ ප්‍රබන්ධ නිර්මාණයක් වුවත්, 2011 වසරේ ජපානයේ තොහොකු භූමිකම්පාව සහ සුනාමිය පිළිබඳ නිවැරදි අනාවැකියක් කිරීම හේතුවෙන් රියෝ තත්සුකි ලොව පුරා ප්‍රසිද්ධියට පත්වූවාය. එමෙන්ම, ඩයනා කුමරියගේ මරණය, කොවිඩ්-19 වසංගතය ඇතුළු ගෝලීය සිදුවීම් රැසක් පිළිබඳ ඇය සාර්ථක අනාවැකි පළ කළ බව ඇගේ රසිකයන් විශ්වාස කරති.

සාමාන්‍ය පෙළ විභාගය ප්‍රතිඵල 2024 - නිකුත්වෙන දිනය මෙන්න

එම චිත්‍රකතා ග්‍රන්ථයට අනුව, 2025 වසරේදී ‘සැබෑ ව්‍යසනයක්’ ඇතිවන බවත්, ජපානය සහ පිලිපීනය අතර මුහුදු පතුල බිඳී යාමෙන් 2011 තොහොකු ව්‍යසනයටත් වඩා බිහිසුණු, දැවැන්ත සුනාමි රළක් ඇතිවනු ඇති බවත් පුරෝකථනය කර ඇත. මෙම අනාවැකිය හේතුවෙන් ජපානයේ පමණක් නොව, හොංකොං, තායිවානය වැනි රටවල සංචාරකයින් ඇතුළු බොහෝ දෙනෙක් තම ජපාන සංචාර අවලංගු කිරීමට පෙළඹී ඇත.

එහෙත්, ජපාන කාලගුණ විද්‍යා ඒජන්සිය ඇතුළු විද්‍යාඥයින් සහ විශේෂඥයින් තරයේ ප්‍රකාශ කරන්නේ, මෙම අනාවැකියට කිසිදු විද්‍යාත්මක පදනමක් නොමැති බවයි. නිශ්චිත දිනයක්, වේලාවක් හෝ ස්ථානයක් සඳහන් කරමින් භූමිකම්පාවක් හෝ සුනාමියක් පිළිබඳ අනාවැකි පළ කිරීම විද්‍යාත්මකව කළ නොහැකි බව ඔවුන් අවධාරණය කරති.

දිනෙන් දින රන් මිල අඩුවෙයි - ඔබේ අවස්ථාව දැන්ම!

මෙම කතාබහ මධ්‍යයේ, රියෝ තත්සුකි විසින්ම ප්‍රකාශ කර ඇත්තේ, තමන් අනාගතවක්තෘවරියක නොවන බවත්, ජනතාව අනවශ්‍ය බියක් ඇති කර නොගෙන විද්‍යාඥයින්ගේ මතයන් කෙරෙහි විශ්වාසය තැබිය යුතු බවත්ය. ඇය තම චිත්‍රකතා ග්‍රන්ථය ප්‍රබන්ධ නිර්මාණයක් ලෙස සලකන බවත්, එය බිය ඇති කිරීමේ අරමුණකින් ලියන ලද්දක් නොවන බවත් පවසා ඇත.

කෙසේ වුවත්, ජපානය භූගෝලීය වශයෙන් ‘ගිනි වළල්ල’ (Ring of Fire) ලෙස හඳුන්වන අතිශය ක්‍රියාකාරී භූමිකම්පා කලාපයේ පිහිටා ඇති බැවින්, මහා භූමිකම්පාවක අවදානම පිළිබඳව විද්‍යාඥයින් දිගින් දිගටම අනතුරු ඇඟවීම් නිකුත් කරති. මෙම පසුබිම තුළ, රියෝ තත්සුකිගේ අනාවැකි ජනතාව අතර සැලකිය යුතු බලපෑමක් ඇති කර ඇතත්, ඒවාට විද්‍යාත්මක පදනමක් නොමැති බව විශේෂඥයින් නැවත නැවතත් පෙන්වා දෙති.

EPF ගැන ළඟදිම සුබ ආරංචියක්