ධනපති බිරියගේ නැති වූ වළල්ල... දක්ෂින අධිවේගයේ සිදු වු අරුම පුදුම මනුස්සකම
Sewvandhi
දක්‍ෂිණ අධිවේගී මාර්ගයේ වැලිපැන්න, සේවා පෙදෙසේ වැටී තිබූ දියමන්ති සහ මුතු ඇල්ලූ වළල්ලක කොටසක් එහි සේවිකාවක් විසින් ඇහිඳ අයිතිකරු වෙත භාරදීමේ පුවතක් ඊයේ වාර්තා වුණා. මෙම දියමන්ති සහ මුතු සහිත වළල්ලේ කොටස ලෝක බැංකු උප සභාපතිවරයාගේ බිරිඳට අයත් එකක් යැයි දක්‍ෂිණ අධිවේගී මාර්ගයේ වැලිපැන්න සේවා පියයේ සහකාර ඉංජිනේරු සිදත් බණ්ඩාර ඒකනායක පවසනවා.
ඉකුත් සෙනසුරාදා (06වැනිදා) මාර්ග 1500ක් ජනතා අයිතියට පත් කිරීමේ අවස්ථාවට සහභාගි වීම සඳහා ලෝක බැංකු උප සභාපතිවරයා සහ ඔහුගේ බිරිඳ දක්‍ෂිණ අධිවේගී මාර්ගය ඔස්සේ ගමන් කර තිබේ. එහිදී වැලිපැන්න සේවා පෙදෙසට ඇතුළු වී ඇති මොවුන් මඳක් විවේක ගෙන නැවත සිය ගමනාන්තය වෙත ගමන් ආරම්භ කර ඇත.
මෙම සිද්ධිය පිළිබඳව වැඩිදුරටත් අදහස් දැක්වූ වැලිපැන්න සේවා පියයේ සහකාර ඉංජිනේරු සිදත් බණ්ඩාර ඒකනායක මෙසේ පැවසීය.
‘‘දක්‍ෂිණ අධිවේගී මාර්ගයේ වැලිපැන්න, සේවා පෙදෙසට අයත් ආයතනයේ සේවිකාවක් විසින් බිම වැටී තිබූ යමක් ඇහිඳලා තියෙනවා. මේ පිළිබඳව වැඩි තැකීමක් නොකර ඇය එය සිය කාර්යාලයේ ලාච්චුවකට දාලා තියලා. අදාළ කටයුතු අවසන් කර ලෝක බැංකු උප සභාපතිවරයා ඇතුළු පිරිස නැවත කොළඹ බලා ගමන් කිරීමේදී අස්ථානගත වූ දියමන්ති සහ මුතු ඇල්ලූ වළල්ලේ කොටස පිළිබඳව වැලිපැන්න සේවා පෙදෙසේ කාර්යාලයෙන් විමසීමක් කර ඔවුන් කොළඹ බලා පිටත්ව ගිහින් තියෙනවා.
මෙම සිද්ධිය වැලිපැන්න සේවා පෙදෙසේ සේවය කරන අය වෙත සැලවීමෙන් පසු අප කාර්යාලයට පැමිණි සේවිකාවක් විසින් තමන් යම්කිසි දෙයක් ඇහිඳ තම කාර්යාලයේ ලාච්චුවේ තබා ඇති බව පැවසුවා. ඉන්පසු අප විසින් එය පරීක්‍ෂා කර බැලීමේදී ලෝක බැංකු උප සභාපතිවරයා පැවසූ ආභරණ කොටස බව තහවුරු වුණ අතර අප ඒ පිළිබඳව ඔවුන්ව දැනුවත් කිරීමට කටයුතු කළා.
ඒ අනුව මෙය ලෝක බැංකු උප සභාපතිවරයාගේ බිරිඳට අයත් වළල්ලක කොටස බව ඔවුන් අප වෙත දැන්වීමෙන් අනතුරුව ඊයේ ඔවුන්ගේ නියෝජිත මහත්මයෙක් අප කාර්යාලයට පැමිණ එය භාරගනු ලැබුවා’’ යැයි ඉංජිනේරු සිදත් බණ්ඩාර වැඩිදුරටත් සඳහන් කළේය. දිවයින
සිව්දෙසින් ගලා එන තොරතුරු සැමට කලින්, එසැනින් දැන ගන්න ගගන whatsApp,වෙත පිවිසෙන්න.... |
