තෙල් මිල යළි නගියි” අලුත් මිල ගණන් මෙන්න!

නැවත වතාවක් ලෝක වෙළෙඳපොළෙහි බොරතෙල් මිලෙහි යළිත් සැලකිය යුතු ඉහළ යෑමක් සිදුව ඇති බව වාර්තා වනවා.

මේ අනුව පසුගිය දිනවල ඇමරිකානු ඩොලර් 98ක් පමණ පහතට ගිය බ්‍රෙන්ට් වර්ගයේ බොර තෙල් මිල පෙරෝදා (21) වන විට ඇමරිකානු ඩොලර් 111ක් පමණ දක්වා ඉහළ ගොස් තිබේ.

විශේෂයෙන් පෙරේදා (21) දිනයේදී පමණක් බ්‍රෙන්ට් බොර තෙල් මිල ඇමරිකානු ඩොලර් 3.4කින් පමණ ඉහළ ගොස් ඇති බව පැවසේ.

ඇමරිකාව මෙන්ම යුරෝපීය රටවල්ද රුසියාවේ ඉන්ධන සඳහා සම්බාධක පැනවීමට ඉඩ ඇති බව වාර්තා වීමත් සමග මෙසේ පෙරේදා (21) දිනයේ බොර තෙල් මිලෙහි සැලකිය යුතු ඉහළ යෑමක් සිදුවූ බව විදෙස් මාධ්‍ය වාර්තා කරයි.

කෙසේවෙතත් ඉදිරියේදී මෙරට ඉන්ධන මිල විශාල වශයෙන් අඩු කිරීමට හැකියාවක් ලැබිය හැකි බව බලශක්ති අමාත්‍ය ගාමිණී ලොකුගේ මහතා පවසනවා.

අමාත්‍යවරයා මේ බව පැවසුවේ, ඊයේ (22) පාර්ලිමේන්තුවේදී ප්‍රශ්නයකට පිළිතුරු දෙමින්.

ලෝක වෙළෙඳපොළේ ඉන්ධන මිල අඩුවෙමින් පවතින බැවින් මෙරට ජනතාවට එහි වාසිය ලබාදිය හැකි බවයි අමාත්‍යවරයා සදහන් කළේ.

“තෙල් මිල අඩුවෙලා නෑ. තෙල් මිල වැඩි කිරීමේදී අපි ගණනය කළේ පෙබරවාරි මිල ගණන්.

මාර්තු මාසයේ තමයි බැරල් එකක් මිල ‌ඩොලර් 130 දක්වා වැඩි වුණේ. යුද්ධය නිසා.

දැන් ඒක 98ට බැහැලා තියෙනවා.” “නමුත් ඉදිරියේදී තෙල් මිල විශාල වශයෙන් අඩු වුණොත් අපි එය අඩු කරන්න ලෑස්තියි.”

“මේ මාසේ අවසන් වෙනකොට බොර තෙල් ලංකාවට ගෙන්වා ගැනීමට සාකච්ඡා කරගෙන යනවා.

ටොන් 90,000ක නැවක් දෙකක් ගෙන්වා ගන්න පුළුවන් වෙයි.

සිංහල අලුත් අවුරුද්දට තදබල තෙල් හිඟයක් ඇතිවෙන්නෙ නෑ.”