පිට පිට වාර්තාවෙන රෝගීන් ගණන වැඩිවීමත් සමඟම ජාතික ඩෙංගු මර්දන ඒකකයේ දත්ත පද්ධතිය අක්‍රිය වේ

සෞඛ්‍ය අමාත්‍යාංශය යටතේ පවතින ජාතික ඩෙංගු මර්දන ඒකකයේ නිල දත්ත පද්ධතිය ඊයේ (25)වැනිදා පෙරවරුවේ සිට සම්පූර්ණයෙන්ම අක්‍රිය වී යාම හේතුවෙන් දිවයින පුරා පවතින ඩෙංගු රෝගී දත්ත යාවත්කාලීන කිරීමේ සමස්ත ක්‍රියාවලිය මුළුමනින්ම ඇනහිට තිබේ.

කිසිසේත් බලාපොරොත්තු නොවූ පරිදි ඉතාමත් විශාල ඩෙංගු රෝගීන් ප්‍රමාණයක් දෛනිකව දිවයිනේ විවිධ ප්‍රදේශවලින් වාර්තාවීම හේතුවෙන් දත්ත පද්ධතියේ ධාරිතාව ඔරොත්තු නොදී මෙලෙස අක්‍රිය වූ බව ජාතික ඩෙංගු මර්දන ඒකකයේ වැඩබලන අධ්‍යක්ෂ වෛද්‍ය කපිල කන්නන්ගර මහතා නිල වශයෙන් පැවසීය.

පවතින නිල සංඛ්‍යාලේඛනවලට අනුව ජුනි මාසයේදී පමණක් මෙරටින් ඩෙංගු රෝගීන් 14446 ක් වාර්තා වී ඇති අතර ඉකුත් සඳුදා 22 වැනිදා දිනය තුළ පමණක් ඩෙංගු රෝගීන් 1069 ක් වැනි ඉහළ අගයක් වාර්තා විය.

මීට අමතරව ඉකුත් සති දෙකක පමණ කාලයේ සිට මෙරටින් දිනකට හමුවන ඩෙංගු රෝගීන් ගණන 500 සීමාව ඉක්මවා යමින් දෛනිකව රෝගීන් 750 ත් 1000 ත් අතර විශාල ප්‍රමාණයක් අලුතින් හමුවී තිබේ.

රෝගීන් ප්‍රමාණය මෙලෙස ශීඝ්‍රයෙන් ඉහළ යාමත් සමග මධ්‍යම දත්ත පද්ධතියේ පවතින තාක්ෂණික ධාරිතාව ඊට කිසිසේත්ම ඔරොත්තු නොදීම මෙම හදිසි බිඳ වැටීමට ප්‍රධානතම හේතුව වී ඇත.

ඒ අනුව ඊයේ 25 වැනිදා පෙරවරුව වන විට මෙරටින් වාර්තා වී ඇති සමස්ත ඩෙංගු රෝගීන් සංඛ්‍යාව 49000 ක් දක්වා ඉහළ ගොස් තිබිණි.

දිවයින පුරා පවතින ඩෙංගු රෝගීන්ගේ නිල දත්ත එක්රැස් කරනු ලබන මෙම ප්‍රධාන පරිගණක පද්ධතිය අක්‍රියවීම හේතුවෙන් ඊයේ 25 වැනිදා දිනය පුරාම ප්‍රාදේශීය සෞඛ්‍ය නිලධාරි කාර්යාලවලින් නවතම රෝගී දත්ත පද්ධතියට නිවැරදිව යාවත්කාලීන කිරීමට නොහැකි වූ බවද වෛද්‍ය කපිල කන්නන්ගර මහතා කියා සිටියේය.

පවතින අධික රෝගීන් සංඛ්‍යාව හමුවේ මෙම පද්ධතියේ ධාරිතාව තවදුරටත් පුළුල් කළ යුතුව ඇති බවත් සෞඛ්‍ය අමාත්‍යාංශයේ තොරතුරු තාක්ෂණය පිළිබඳ විශේෂඥ නිලධාරීන්ට එම හදිසි තාක්ෂණික කටයුතු මේ වන විට පවරා ඇති බවත් ඔහු සඳහන් කළේය.

පද්ධතියේ පවතින මෙම බිඳවැටීමේ තත්ත්වය හමුවේ අද 26 වැනිදා දෛනික ඩෙංගු රෝගී දත්ත නිල වශයෙන් යාවත්කාලීන කිරීම තවදුරටත් සැලකිය යුතු මට්ටමකින් පමාවීමට ඉඩ ඇති බව ද සෞඛ්‍ය අංශ නිවේදනය කරයි.

පවතින කාලගුණයේ වෙනසක් - පාසල් වසා තැබීමට රජයෙන් තීරණයක්

අත්අඩංගුවට පත් චරිත් අබේසිංහගේ පට්ටම ගැලවෙයි - වහාම ක්‍රියාත්මක වන පරිදි ධූරයෙන් නෙරපීමට නිවේදනයක්