“මේ ජයග්‍රහණය මගේ පවුල වෙනුවෙන් කැප කරනවා” - ලොවම වසඟ කළ මන්දනා සුපිරි ශතකයෙන් පසු කියයි

ආසියානු කුසලාන කාන්තා ක්‍රිකට් තරගාවලියේ හොංකොං කණ්ඩායමට එරෙහිව වාර්තාගත ශතකයක් රැස් කළ ඉන්දීය ආරම්භක පිතිකාරිනී ස්මෘති මන්දනා සිය විශිෂ්ට ඉනිම සිය පවුල වෙනුවෙන් කැප කරන බව ප්‍රකාශ කර තිබේ.

ඩුබායි ජාත්‍යන්තර ක්‍රිකට් ක්‍රීඩාංගණයේ පැවති ‘A’ කාණ්ඩයේ තරගයකදී මන්දනා පන්දු 64කදී ලකුණු 124ක් රැස් කරමින් ඉන්දියාවට ලකුණු 137ක දැවැන්ත ජයක් ලබාගැනීමට ප්‍රධාන දායකත්වයක් ලබා දුන්නාය.

මන්දනාගේ ප්‍රවේගවත් ඉනිම හේතුවෙන් ඉන්දියාව නියමිත පන්දුවාර 20 අවසානයේ කඩුලු 5ක් දැවී ලකුණු 193ක් රැස් කළේය. පිළිතුරු ඉනිම ක්‍රීඩා කළ හොංකොං කණ්ඩායමට පන්දුවාර 16.2කදී සියලු දෙනා දැවී ලබාගත හැකි වූයේ ලකුණු 56ක් පමණි.

ඉන්දීය පන්දු යැවීමේදී දීප්ති ශර්මා පන්දුවාර 3කදී ලකුණු 9කට කඩුලු 3ක් දවාගත් අතර, ශ්‍රී චාරානි කඩුලු 2ක් සහ ප්‍රේමා රාවත් කඩුලු 2ක් දවා ගත්හ.

මධ්‍යම වේග පන්දු යවන නන්දනී ශර්මාද පන්දුවාර 3කදී ලකුණු 6කට කඩුලු 2ක් දවා ගැනීමට සමත් වූවාය. තරගයෙන් අනතුරුව අදහස් දක්වමින් මන්දනා සඳහන් කළේ, හොංකොං කණ්ඩායම පිළිබඳව වැඩි තොරතුරු තමන් සතුව නොතිබූ බැවින් තරගයේ වේගයට ඉක්මනින් අනුවර්තනය වීම කෙරෙහි අවධානය යොමු කළ බවයි.

“මේ ශතකය මගේ පවුල වෙනුවෙන් කැප කිරීමට මම කැමතියි. අපි ඔවුන් ගැන එතරම් දැනුවත් වී සිටියේ නැහැ. අපි දැක තිබුණේ වීඩියෝ කිහිපයක් පමණයි. ඒ නිසා තරගයේ වේගයට අනුවර්තනය වීම ගැන වැඩි අවධානයක් යොමු කළා,” යනුවෙන් මන්දනා පැවසුවාය.

මෙම ශතකයත් සමඟ මන්දනා කාන්තා ජාත්‍යන්තර ක්‍රිකට් පිටියේ වැඩිම ශතක සංඛ්‍යාවක් රැස් කළ ක්‍රීඩිකාව බවට පත්ව ඇති අතර, එහිදී ඕස්ට්‍රේලියානු හිටපු නායිකා මෙග් ලැනිං අභිබවා යාමටද ඇය සමත් වී තිබේ.

විරාට් කෝලිගේ අකායි බබාගේ “මාමා” ශුබ්මන් ගිල් වෙයි - ඉන්දීය සමාජ මාධ්‍ය කැළඹූ අපූරු පුවතක්

එමෙන්ම, මෙම ඉනිමත් සමඟ හිටපු ඉන්දීය නායිකා මිතිලි රාජ් අභිබවා යමින් කාන්තා ජාත්‍යන්තර ක්‍රිකට් පිටියේ වැඩිම ලකුණු රැස් කළ ක්‍රීඩිකාව බවට පත්වීමටද මන්දනා සමත් වූවාය. ජයග්‍රහණයෙන් අනතුරුව අදහස් දැක්වූ ඉන්දීය නායිකා හර්මන්ප්‍රීට් කෞර්, මන්දනා සහ ෂෆාලි වර්මාගේ විශිෂ්ට පිතිහරඹය අගය කළාය.

කෙසේ වෙතත්, මැදපෙළ පිතිකරුවන්ට තවත් වැඩි කාලයක් පිටියේ රැඳී සිටිමින් පිතිහරඹයේ නිරත වීමට අවස්ථාව ලබාදිය යුතු බවද ඇය සඳහන් කළාය. “මම මුලින්ම ධනාත්මක කරුණු ගැන කියන්නම්.

ස්මෘති සහ ෂෆාලි ඉතා හොඳින් ක්‍රීඩා කළා. මැදපෙළට තවත් පිතිහරඹ අවස්ථා අවශ්‍යයි. පන්දු යවන්නන් විශිෂ්ට කාර්යයක් කළා. අපි මේ වනවිට හොඳ තත්ත්වයක ඉන්නවා,” යනුවෙන් කෞර් පැවසුවාය.

එමෙන්ම, දීප්ති ශර්මාගේ දායකත්වයද ඇය විශේෂයෙන් අගය කළ අතර, හොංකොං ක්‍රීඩිකාවන් තරගය අතරතුර දැක්වූ උද්යෝගයද ඇය පැසසුමට ලක් කළාය.

''2027 ලෝක කුසලානයට පෙර රෝහිත් ෂර්මා විශ්‍රාම ගනීවිද?'' - කෝලි සහ ජඩේජා ගැනත් කතාබහක්