හදිසි ආපදා සහ අසාමාන්‍ය ස්වභාවික තත්ත්වයන්ට මුහුණදීමට සූදානමින් සිටිය යුතුයි - අගමැති රටටම සූදානම් වන්නැයි දන්වයි
අද(10) දින නාරාහේන්පිට නිල මැදුරේ පැවති කොළඹ දිස්ත්‍රික් සම්බන්ධීකරණ කමිටුවේදී අග්‍රාමාත්‍ය ආචාර්ය හරිනි අමරසූරිය විසින් දේශගුණික විපර්යාස හමුවේ ඇතිවන හදිසි ආපදා සහ අසාමාන්‍ය ස්වභාවික තත්ත්වයන්ට මුහුණදීමට මෙන්ම, ඒවායින් සිදුවිය හැකි හානි අවම කර ගැනීමට ද සූදානම්ව වී සිටිය යුතු බවත්, ආපදා කළමනාකරණයට එක් අංශයකට පමණක් සීමා නොවුණු විවිධ ක්ෂේත්‍ර ඔස්සේ ඒකාබද්ධ මැදිහත්වීමක් අත්‍යවශ්‍ය බවත් සඳහන් කළා.
ඒ අනුව අග්‍රාමාත්‍යතුමියගේ සහභාගීත්වයෙන් සහ සම්බන්ධීකරණ කමිටු සභාපති පාර්ලිමේන්තු මන්ත්‍රී ලක්ෂ්මන් නිපුණාරච්චිගේ ප්‍රධානත්වයෙන් පැවති මෙම සාකචඡාවේදී, ඉකුත් නොවැම්බර් 06 වැනි දින අධික වර්ෂාව නිසා කොළඹ දිස්ත්‍රික්කයේ ඇතිවූ හදිසි ජල ගැලීම් සහ ආපදා තත්වය පිළිබඳව විශේෂ අවධානය යොමුව ඇත.
එහිදී අග්‍රාමාත්‍යතුමිය වර්තමානයේ සිදුවන දේශගුණික විපර්යාස හමුවේ මෙවැනි හදිසි ආපදා සහ අසාමාන්‍ය ස්වභාවික තත්ත්වයන්ට මුහුණදීමට මෙන්ම, ඒවායින් සිදුවිය හැකි හානි අවම කර ගැනීමට ද සූදානමින් සිටිය යුතු බව පෙන්වා දුන්නා.
එසේම ආපදා කළමනාකරණය එක් අංශයකට පමණක් සීමා නොවී විවිධ ක්ෂේත්‍ර ඔස්සේ ඒකාබද්ධව ක්‍රියාත්මක කිරීමේ අවශ්‍යතාව ද අවධාරණය කර ඇත.
එසේම කොළඹ දිස්ත්‍රික්කය සහ කොළඹ නගරය සුවිශේෂී භූගෝලීය හා නාගරික ලක්ෂණ සහිත ප්‍රදේශයක් වන බවත්, වත්මනේ මුහුණදීමට සිදුව ඇති ගංවතුර හා ජල ගැලීම් තත්ත්වයන් දිගු කාලයක් තිස්සේ නිසි විසඳුම් නොලැබුණු ගැටලු රැසක ප්‍රතිඵලයක් බවත් පෙන්වා දුන් අග්‍රාමාත්‍යතුමිය, කසළ කළමනාකරණයේ සිට අපද්‍රව්‍ය බැහැර කිරීම, ජල මාර්ග නිසි ලෙස පවත්වාගෙන යාම සහ පහත් බිම් සංරක්ෂණය කිරීම දක්වා වන පුළුල් වැඩපිළිවෙළක් යටතේ මෙම ගැටලුවලට විසඳුම් සෙවිය යුතු බවත් ප්‍රකාශ කළා.
එසේම මේ වන විටත් කොළඹ දිස්ත්‍රික්කයේ ගංවතුර සහ වැසි ජලය පාලනය කිරීමට ආරම්භ කර ඇති ප්‍රධාන ව්‍යාපෘති කිහිපයක් පිළිබඳ විස්තර, කොළඹ දිස්ත්‍රික් ලේකම් ගිනිගේ ප්‍රසන්න ජනක කුමාර විසින් ඉදිරිපත් කර ඇත.
එබැවින් කැලණි ගං මිටියාවතේ ගංවතුර පාලනය කිරීමේ ව්‍යාපෘතියට සමඟාමීව කොළොන්නාව ප්‍රදේශයේ ගංවතුර පාලනය සඳහා, රුපියල් මිලියන 15 000ට වැඩි මුදලක් වෙන් කොට මේ වනවිටත් ආරම්භ කොට ඇති ව්‍යාපෘතිය, කඩුවෙල සියලුම ජල මාර්ග පවිත්‍ර කොට සංවර්ධනය කිරීම සඳහා මිලියන 450ක වියදමින් ආරම්භ කොට ඇති ව්‍යාපෘතිය, කොළොන්නාවේ ප්‍රධාන ඇළ මාර්ග 4ක් පිරිසිඳු කොට සංවර්ධනය කිරීම සඳහා ආරම්භ කොට ඇති ව්‍යාපෘතිය සහ වාරිමාර්ග දෙපාර්තමේන්තුව මඟින් කැලණි ගඟේ ඉවුරු සංවර්ධනය කිරීමට ආරම්භ කර ඇති ව්‍යාපෘතිය ඇතුළු දිස්ත්‍රික් ලේකම්වරයා විසින් විස්තර ඉදිරිපත් කළ ව්‍යාපෘති පිළිබඳව මෙහී දී අග්‍රාමාත්‍යතුමියගේ විශේෂ අවධානය යොමුව ඇත.
එම ව්‍යාපෘතිවලට අමතරව අනාගතයේදී යළිත් මෙවැනි ආපදා තත්ත්වයන් ඇතිවීමේ අවදානම අවම කිරීමට ප්‍රමුඛතාව ලබාදිය යුතු ක්‍රියාමාර්ග පිළිබඳව ද මෙම සම්බන්ධීකරණ කමිටුවේදී සාකච්ඡා වූ අතර එහිදී වසර ගණනාවක් තිස්සේ නිසි තීන්දු තීරණ නොගෙනීම නිසා උග්‍ර වී ඇති ගැටලු සඳහා තවදුරටත් ප්‍රමාද නොවී අවශ්‍ය නිවැරදි තීරණ ගනිමින් කටයුතු කළ යුතු බව අග්‍රාමාත්‍යතුමිය අවධාරණය කර තිබෙනවා.
එසේම ඇළවේලි සහ ජල මාර්ග පිරිසිදු කිරීම ආපදා තත්ත්වයක් ඇති වූ විට පමණක් සිදුකරන කාර්යයක් නොව, අඛණ්ඩව සිදුකරන, නිරන්තර නඩත්තුවක් සහිතව පවත්වාගෙන යා යුතු ක්‍රියාවලියක් බව ද අග්‍රාමාත්‍යතුමිය විසින් මෙහිදී පෙන්වා දුන් අතර ඊට අමතරව කොළඹ දිස්ත්‍රික්ය තුළ ක්‍රියාත්මක සංවර්ධන වැඩසටහන්වල මෙතෙක් අත්කරගෙන ඇති ප්‍රගතිය, දිස්ත්‍රික්කය තුළ සිදුවන ග්‍රාමීය මාර්ග සංවර්ධන ව්‍යාපෘති සහ ප්‍රජා ශක්ති වැඩසහන පිළිබඳවද අග්‍රාමාත්‍යතුමියගේ විශේෂ අවධානය යොමු වුණා.
ඒ අනුව මෙම සම්බන්ධීකරණ කමිටුවට ශ්‍රී ලංකා පාර්ලිමේන්තුවේ නියෝජ්‍ය කතානායක වෛද්‍ය රිස්වි සාලි, බස්නාහිර පළාත් ආණ්ඩුකාර හනීෆ් යුසුෆ්, ආරක්ෂක නියෝජ්‍ය අමාත්‍ය විශ්‍රාමික මේජර් ජෙනරාල් අරුණ ජයසේකර, නාගරික සංවර්ධන නියෝජ්‍ය අමාත්‍ය එරංග ගුණසේකර ඇතුළු කොළඹ දිස්ත්‍රික් පාර්ලිමේන්තු මන්ත්‍රීවරුන් සහ පළාත් පාලන ආයතන සභාපතිවරුන් ද බස්නාහිර පළාත් ප්‍රධාන ලේකම් ප්‍රදීප් පුෂ්පකුමාර ඇතුළු කොළඹ දිස්ත්‍රික් රාජ්‍ය නිලධාරීන් පිරිසක් ද එක් වූ බව අග්‍රාමාත්‍ය මාධ්‍ය අංශය සඳහන් කළා.
![අනුරාධපුර රඹෑව බිහිසුණු අනතුර ඇසින් දුටු සාක්ෂිකරුවෙකුගේ හෙළිදරවිව - ''බස් එක සම්පූර්ණයෙන් ගිනි ගන්න දුම දැම්මා'' [VIDEO]](https://cdn.ibcstack.com/article/0f95cf61-48f8-41f2-ab5e-0f9800977d5e/26-6af301dab8170-sm.webp)
