වනඅලියා පිලිස්සීමේ සැකකරුවන් රිමාන්ඩ් භාරයට

අනුරාධපුර මිහින්තලය සීප්පුකුලම ප්‍රදේශයේදී වන අලියෙකුට ගිනි පන්දම් භාවිතා කර පිලිස්සීමේ සිද්ධියට සම්බන්ධ සැකකරුවන් තිදෙනෙකු මේ මස 24 වැනිදා දක්වා රක්ෂිත බන්ධනාගාර ගත කරන ලෙස අනුරාධපුර මහේස්ත්‍රාත් අධිකරණය නියෝග කර ඇත.

මිහින්තලය පොලිසිය විසින් අත්අඩංගුවට ගත් සැකකරුවන් තිදෙනා අවුරුදු 42, 48 සහ 50 වයස්වල පදිංචිකරුවන් වෙති. ඔවුන් සත්ව හිංසා චෝදනා මත අද (18) අධිකරණයට ඉදිරිපත් කෙරුණි.

සිද්ධිය සම්බන්ධයෙන් සමාජ මාධ්‍යවල සංසරණය වූ වීඩියෝ පටයක දර්ශනවලින් පෙනෙන්නේ පුද්ගලයන් කිහිපදෙනෙකු ගිනි පන්දම් දල්වා අලියාට පහරදෙන ආකාරයයි. මෙම හිංසාවට ලක්වූ අලියා දැනටමත් වම් ඉදිරි පාදයේ වෙඩි තුවාලයකින් පීඩාවට පත්ව සිට තිබූ අතර, පිලිස්සුම් තුවාල සහිතව ගෙවත්තක වැටී සිටියදී දෙසැම්බර් 16 වැනිදා මියගොස් තිබේ.

හිතක් පපුවක් නැතුව සද්ධන්තයට ගිනි තියපු සැකකරුවන් තිදෙනෙකු අත්අඩංගුවට

පශ්චාත් මරණ පරීක්ෂණයේදී හෙළිවූයේ වකුගඩු සහ අක්මාවේ රෝගී තත්ත්වය මෙන්ම පිලිස්සීමෙන් ඇතිවූ භීතිකාව  මරණයට හේතුවූ බවයි.

මෙම සිද්ධිය මානුෂීය-වනජීවී ගැටුමේ බරපතල උදාහරණයක් ලෙස සමාජයේ දැඩි කෝපයක් ඇති කර තිබේ. වනජීවී නිලධාරීන් සහ පරිසරවේදීන් මෙය අමානුෂික අපරාධයක් ලෙස හඳුන්වා, සැකකරුවන්ට දැඩි දඬුවම් ලබාදෙන ලෙස ඉල්ලා සිටිති.

මිහින්තලය පොලිසිය සහ වනජීවී දෙපාර්තමේන්තුව විමර්ශන අඛණ්ඩව සිදුකරමින් පවතින අතර, සිද්ධියට සම්බන්ධ වෙනත් පුද්ගලයන්ද හඳුනාගැනීමට උත්සාහ දරයි.

මිහින්තලේ අලි ඝාතනයට සම්බන්ධ සියලු දෙනාට දඬුවම් දෙන්න - සජිත්

වන අලියෙකු පුලුස්සා ඝාතනය කළ සැකකරු සොයා යුද හමුදා ඔත්තු සේවයත් එක්වෙයි