ලෝක තෙල් මිල ගිනි ගනී- ඩීසල් 45%කින් හා පෙට්‍රල් 30%කින් ඉහළට – CPCයෙන් ජනපතිට හදිසි කැඳවීමක්

මැදපෙරදිග අර්බුදයෙන් ගෝලීය තෙල් වෙළඳපොළ අස්ථාවරයි; ජනපති සමඟ හදිසි සාකච්ඡාවක් ඉල්ලයි මැදපෙරදිග කලාපයේ උද්ගත වී ඇති ආතතිකාරී තත්ත්වය හේතුවෙන් ගෝලීය තෙල් වෙළඳපොළ දැඩි අස්ථාවරතාවකට ලක්ව ඇති අතර, එහි බලපෑම ශ්‍රී ලංකාවට අවම කර ගැනීම සඳහා ගත යුතු ඉදිරි පියවර සම්බන්ධයෙන් ජනාධිපති අනුර කුමාර දිසානායක මහතා සමඟ හදිසි සාකච්ඡාවක් ඉල්ලා ඇති බව ලංකා ඛනිජ තෙල් සංස්ථාවේ (CPC) නිලධාරියෙකු ප්‍රකාශ කළේය.

CPC සභාපති D. J. රාජකරුණා මහතා සඳහන් කළේ ගෝලීය තෙල් වෙළඳපොළේ පවතින තත්ත්වය ශ්‍රී ලංකාවට බරපතළ බලපෑම් ඇති කළ හැකි බැවින්, එහි වර්ධනය වන අවදානම පිළිබඳ මහජනතාව දැනුවත් වීම අත්‍යවශ්‍ය බවයි. ඔහුගේ ප්‍රකාශයට අනුව, මෙම මාසය ආරම්භයේ පැවති මිල ගණන් සමඟ සසඳන විට ඩීසල් මිල සියයට 45කින් සහ පෙට්‍රල් මිල සියයට 30කින් ඉහළ ගොස් තිබේ.

එමෙන්ම බොරතෙල් මිල ද ශීඝ්‍රයෙන් ඉහළ යමින් පවතින අතර, ඉන්ධන ආනයනය මත සම්පූර්ණයෙන්ම රඳා පවතින ශ්‍රී ලංකාවට එය දැඩි පීඩනයක් එල්ල කරන බවද ඔහු පැවසීය.

“පවතින තත්ත්වයට මුහුණ දීම සඳහා ගත යුතු ක්‍රියාමාර්ග පිළිබඳව ජනාධිපතිවරයා සමඟ හදිසි සාකච්ඡාවක් ඉල්ලා තිබෙනවා. ඉන්ධන පරිභෝජනය සීමා කිරීම පිළිබඳවත් අවධානය යොමු කළ යුතුයි,”

යනුවෙන් රාජකරුණා මහතා සඳහන් කළේය.

දේශීය වෙළඳපොළේ ක්‍රියාත්මක අනෙකුත් ඉන්ධන බෙදාහරින්නන් ද වත්මන් ගෝලීය මිල ගණන් යටතේ ඉන්ධන අලෙවි කිරීමේදී මුහුණ දෙන අභියෝග පිළිබඳව දැනුම් දී ඇති බවද ඔහු පැවසීය.

මේ අතර, රොයිටර් පුවත් සේවය වාර්තා කළේ මැදපෙරදිග, යුරෝපය සහ අප්‍රිකානු කලාපවල භෞතික බොරතෙල් මිල මෙම සතියේ මාස දෙකක ඉහළම මට්ටමට ළඟා වී ඇති බවයි.

සැපයුම් බාධා සහ භූදේශපාලනික ආතතීන් හේතුවෙන් ගැනුම්කරුවන් විකල්ප සැපයුම් සොයා යාමත් සමඟ බොරතෙල් බැරලයක මිල ඇමෙරිකානු ඩොලර් 110කට ආසන්න මට්ටමකට ඉහළ ගොස් ඇතැයි එම වාර්තාවේ සඳහන් වේ.

ලබන වසරේ මාර්තු දක්වා පවතින දේශගුණික පෙරළිය- ඔක්තෝබර් - දෙසැම්බර් අතර අතිප්‍රබල මට්ටමකට

තවද, එල් නිනෝ කාලගුණික තත්ත්වයන් නිසා ඇති වූ වියළි කාලගුණය හේතුවෙන් ජල විදුලි උත්පාදන ධාරිතාව පහළ ගොස් ඇති අතර, ඒ වෙනුවට තාප විදුලි නිෂ්පාදනය සඳහා භාවිත කරන ඉන්ධන සඳහා ඉල්ලුම තවදුරටත් ඉහළ ගොස් ඇති බව රාජකරුණා මහතා පෙන්වා දුන්නේය.

“මෙය අප මුහුණ දෙන තවත් බරපතළ අභියෝගයක්. විදුලි උත්පාදනය සඳහා වැඩි ඉන්ධන ප්‍රමාණයක් නිකුත් කිරීමට මේ වන විට අපට සිදුව තිබෙනවා,” යැයි ඔහු වැඩිදුරටත් සඳහන් කළේය.