කැනඩාවෙන් ලෝකයටම බලපාන අතිවිශේෂ නිවේදනයක් - 200,000කට ස්ථිර පදිංචිය දෙන්න මෙගා ප්ලෑන් එකක්

කැනඩාවේ දැනට පදිංචිව සිටින සුදුසුකම් සපුරාලන තාවකාලික පදිංචිකරුවන් 200,000ක් දක්වා පිරිසකට 2027 වසර අවසානය වන විට ස්ථිර පදිංචිය (Permanent Residency – PR) ලබාදීමට කැනේඩියානු රජය සැලසුම් කර තිබේ.

කැනඩාවේ 2026 ෆෙඩරල් අයවැය සහ 2027–2029 ආගමන විගමන මට්ටම් සැලැස්ම යටතේ ක්‍රියාත්මක කිරීමට යෝජිත මෙම වැඩපිළිවෙළේ ප්‍රධාන අරමුණ වන්නේ රට තුළ දැනටමත් සේවය කරන ශ්‍රමිකයන් රඳවා ගැනීම, ශ්‍රම වෙළඳපොළේ අවශ්‍යතා සපුරාලීම සහ ආගමන විගමන අයදුම්පත් ගොඩගැසීම හේතුවෙන් ඇති වී තිබෙන ප්‍රමාදයන් අවම කිරීමයි.

කැනඩාවේ ආගමන විගමන, සරණාගත සහ පුරවැසි කටයුතු දෙපාර්තමේන්තුව (IRCC) සඳහන් කරන පරිදි, මෙම වැඩසටහන ප්‍රධාන කාණ්ඩ දෙකක් යටතේ ක්‍රියාත්මක කිරීමට අපේක්ෂිතය.

1. ශ්‍රමිකයන් සඳහා ස්ථිර පදිංචිය මෙම කාණ්ඩය යටතේ කැනඩාවේ දැනටමත් ජීවත් වන සුදුසුකම් ලත් පුද්ගලයන් 100,000ක් දක්වා පිරිසකට සහ ඔවුන්ගේ පවුල්වල සාමාජිකයන්ට ස්ථිර පදිංචිය ලබාදීම සලකා බැලේ.

ප්‍රාදේශීය ශ්‍රම වෙළඳපොළේ අවශ්‍යතා සපුරාලීමට හැකි ශ්‍රමිකයන් හඳුනා ගැනීම සඳහා ෆෙඩරල් රජය පළාත් සහ ප්‍රදේශීය පාලන ආයතන සමඟ සහයෝගයෙන් කටයුතු කිරීමට නියමිතය. මෙහිදී Provincial Nominee Program (PNP) යටතේ සුදුසුකම් ලබන පුද්ගලයන්ට ද අවස්ථා හිමිවිය හැකිය. එමෙන්ම පහත සඳහන් වැඩසටහන් යටතේ දැනටමත් අයදුම් කර ඇති ඇතැම් පුද්ගලයන්ට ද මෙම වැඩපිළිවෙළ හරහා ප්‍රතිලාභ ලබාගැනීමට අවස්ථාව සැලසිය හැකිය. Atlantic Immigration Program Start-up Visa Program Agri-Food Pilot Home Care Worker Pathways

2. මානුෂීය සහ පවුල් නැවත එක් කිරීමේ කාණ්ඩය ඉතිරි ස්ථාන 100,000 මානුෂීය සහ පවුල් නැවත එක් කිරීම සම්බන්ධ අවස්ථා සඳහා වෙන් කිරීමට සැලසුම් කර ඇත

 විශේෂයෙන්ම, ස්ථිර පදිංචිය පිළිබඳ තීරණයක් ලැබෙන තෙක් වසර ගණනාවක් බලා සිටින පුද්ගලයන්ට මෙහිදී අවධානය යොමු කෙරේ. ඊට අමතරව, මානුෂීය සහ දයානුකම්පිත පදනම් මත සුදුසුකම් ලබන අයදුම්කරුවන්, යුක්රේන සහ හොංකොං ජාතිකයන් සඳහා ක්‍රියාත්මක විශේෂ ආගමන මාර්ග මෙන්ම පවුල් නැවත එක් කිරීමේ වැඩසටහන් යටතේ සිටින පුද්ගලයන් ද මෙම කාණ්ඩයට ඇතුළත් වේ.

වැඩසටහනේ අරමුණ සහ අරමුදල් කැනේඩියානු රජය පෙන්වා දෙන්නේ, රටේ විවිධ ප්‍රදේශවල දැනටමත් පදිංචි වී සමාජයට හා ආර්ථිකයට දායක වන පුද්ගලයන් රට තුළ රඳවා ගැනීම මෙම වැඩසටහනේ ප්‍රධාන අරමුණක් බවයි.

ඒ සමඟම, පවතින ශ්‍රම හිඟය පියවීම සහ ආගමන විගමන අයදුම්පත් සඳහා බලා සිටින කාලය අවම කිරීම ද අපේක්ෂා කෙරේ. මෙම වැඩසටහන ක්‍රියාත්මක කිරීම සඳහා වසර හතරක කාලයක් තුළ කැනේඩියානු ඩොලර් මිලියන 302.3ක මුදලක් වෙන් කිරීමට ද රජය යෝජනා කර තිබේ.

අයදුම්කරුවන් දැනගත යුතු වැදගත් කරුණ මෙම වැඩපිළිවෙළ මූලික වශයෙන් ඉලක්ක කර ඇත්තේ දැනටමත් කැනඩාවේ ජීවත් වන පුද්ගලයන්ය. එබැවින් කැනඩාවෙන් පිටත සිටින සියලුම අයදුම්කරුවන්ට මෙම අවස්ථාව ස්වයංක්‍රීයව හිමි නොවේ.

එසේම, පුද්ගලයන් 200,000කට ස්ථිර පදිංචිය ලබාදීමේ සැලසුමක් තිබීමෙන් සියලුම තාවකාලික පදිංචිකරුවන්ට PR හිමිවන බව අදහස් නොවේ. අදාළ ආගමන විගමන වැඩසටහන්වල සුදුසුකම් සහ අනෙකුත් අවශ්‍යතා සපුරාලීම අනිවාර්ය වේ.

ඒ අනුව, කැනඩාවේ දැනට රැකියාවල නිරතව සිටින හෝ වෙනත් තාවකාලික පදිංචි තත්ත්වයක් යටතේ ජීවත් වන පුද්ගලයන්ට මෙම නව වැඩපිළිවෙළ පිළිබඳ ඉදිරි නිල නිවේදන සහ IRCC මාර්ගෝපදේශ පිළිබඳව අවධානයෙන් සිටීම වැදගත් වේ.

පළාත් 4ක පාසල්වලට සඳුදා විශේෂ නිවාඩුවක් -නිවාඩු වෙනුවට සෙනසුරාදා පාසල් පැවැත්වේ