‘රාමායණය’ ලොව පුරා තිරගත වෙයි - පළමු දිනයේම උපයාගත් මුදල මෙන්න

බොලිවුඩ් සිනමාවේ දැවැන්ත නිර්මාණයක් ලෙස ඉහළ බලාපොරොත්තු මධ්‍යයේ තිරගත කිරීම ආරම්භ කළ ‘රාමායණ’ (Ramayana) චිත්‍රපටය පළමු දිනයේදී ඉන්දියාව තුළ ඉන්දීය රුපියල් කෝටි 64.85ක ශුද්ධ ආදායමක් උපයාගෙන තිබෙනවා.

නිතේෂ් තිවාරි විසින් අධ්‍යක්ෂණය කරන ලද මෙම චිත්‍රපටය නොවැම්බර් 5 වැනිදා ලොව පුරා තිරගත කිරීම ආරම්භ කළේ දීපවාලි උත්සවයට සමගාමීවයි.

කෙසේ වෙතත්, චිත්‍රපට ක්ෂේත්‍රයේ විශ්ලේෂකයන් පුරෝකථනය කර තිබූ පළමු දින ඉන්දීය රුපියල් කෝටි 100ක ආදායම් ඉලක්කය සපුරා ගැනීමට එයට හැකි වී නැහැ.

භාෂා අනුව ලැබූ ආදායම

පළමු දිනයේදී ඉන්දියාව තුළ පැවති දර්ශන වාර 25,200කින් චිත්‍රපටය උපයාගත් ශුද්ධ ආදායම ඉන්දීය රුපියල් කෝටි 64.85ක්.

එම ආදායමට වැඩිම දායකත්වය ලබාදී ඇත්තේ හින්දි භාෂාවෙන් ප්‍රදර්ශනය කළ දර්ශන වාරවලින් වන අතර එමගින් ලැබී ඇති ආදායම ඉන්දීය රුපියල් කෝටි 47.50ක්.

අනෙකුත් භාෂාවලින් ලැබූ ආදායම පහත පරිදියි. - කන්නඩ – රුපියල් කෝටි 7.25 - තෙළිඟු – රුපියල් කෝටි 6.00 - දෙමළ – රුපියල් කෝටි 2.60 - මලයාලම් – රුපියල් කෝටි 1.50 ඒ අනුව ඉන්දියාව තුළ චිත්‍රපටයේ දළ ආදායම රුපියල් කෝටි 77.50ක් වන අතර, විදේශීය වෙළෙඳපොළෙන් ලැබූ දළ ආදායම රුපියල් කෝටි 50ක්. එම ආදායම් දෙකම සමඟ ‘රාමායණ’ චිත්‍රපටයේ පළමු දිනයේ ලොව පුරා දළ ආදායම ඉන්දීය රුපියල් කෝටි 127.50ක් ලෙස සටහන් වී තිබෙනවා.

ශ්‍රද්ධා කපූර්ගේ නර්තනයෙන් හැඩවුණු ‘ඊතා’ - දුක් කම්කටොලු මැද ජීවිතය ජයගත් නර්තන ශිල්පිනියකගේ කතාව

රන්බීර්ගේ ‘ඇනිමල්’ චිත්‍රපටයත් අභිබවා යයි

මෙම ආදායම රන්බීර් කපූර්ගේ 2023 වසරේ තිරගත වූ ‘ඇනිමල්’ චිත්‍රපටයේ පළමු දින ඉන්දීය ආදායම වූ රුපියල් කෝටි 63.80 ද අභිබවා යාමක්. එමෙන්ම ශාරුක් ඛාන්ගේ ‘පතාන්’ චිත්‍රපටයේ පළමු දින ආදායම වූ රුපියල් කෝටි 57ක සීමාව ද පසුකර තිබෙනවා.

නමුත් ‘ජවාන්’ චිත්‍රපටය පළමු දිනයේ උපයාගත් රුපියල් කෝටි 75ක ආදායම අභිබවා යාමට ‘රාමායණ’ චිත්‍රපටයට හැකි වී නැහැ.

දැවැන්ත නළු නිළි පිරිසක්

ඉන්දීය රුපියල් කෝටි 4,000ක පමණ දැවැන්ත පිරිවැයකින් නිෂ්පාදනය කර ඇති ‘රාමායණ’ චිත්‍රපටය ඉන්දීය සිනමා ඉතිහාසයේ අතිදැවැන්ත නිර්මාණයක් ලෙස සැලකෙනවා.

රන්බීර් කපූර් රාම කුමරුගේ චරිතයට පණ පොවන අතර, සායි පල්ලවි සීතාගේ චරිතයට පණ පොවනවා.

යෂ් රාවණාගේ චරිතයට එක්ව සිටිනවා. මීට අමතරව සනී ඩියෝල්, රවී ඩුබේ සහ ලාරා දත්තා ඇතුළු ජනප්‍රිය නළු නිළියන් රැසක් ද මෙහි රංගනයෙන් දායක වනවා.

චිත්‍රපටය ලොව පුරා ප්‍රචාරය කිරීමේ වැඩසටහනේ කොටසක් ලෙස ඔක්තෝබර් 27 වැනිදා ඇමරිකාවේ ලොස් ඇන්ජලීස් නුවරදී විශේෂ දර්ශනයක් ද පවත්වා තිබෙනවා.

කෙසේ වෙතත්, පළමු දිනයේදී ලොව පුරා රුපියල් කෝටි 127.50ක ආදායමක් උපයාගත් මෙම දැවැන්ත සිනමා නිර්මාණය ඉදිරි දිනවලදී තවත් වාර්තා පිහිටුවනු ඇතිද යන්න පිළිබඳව සිනමා ලෝලීන්ගේ අවධානය යොමුව තිබෙනවා.

දෙමළ සිනමාවේ ආදායම් වාර්තාව අලුත් වෙයි - රජිනිකාන්ත්ගේ ‘Jailer 2’ WART වර්තා බිදදමයි