බැංකු ගිණුම් වලින් සල්ලි හොරකම් කරන මහා ජාවාරම හෙළිවෙයි..

පිළිකා රෝගීන්ගේ බැංකු ගිණුම් වෙත ජනතාව පරිත්‍යාග කරන මුදල් කොල්ලකන ජාවාරමක් පිළිබඳව තොරතුරු හෙළිවී ඇත. 

කිසියම් කණ්ඩායමක් විසින් පිළිකා රෝගීන්ගේ බැංකු ගිණුම් වෙත ජනතාව පරිත්‍යාග කරන මුදල් වංචා සහගතව එම බැංකුවලින් ලබාගැනීමේ වැඩපිළිවෙළක් රට පුරා ක්‍රියාත්මක වෙමින් තිබෙන බවට තොරතුරු හෙළිවී ඇත.

අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන කොට්ඨාසය ඒ පිළිබඳව පුළුල් විමර්ශනයක් ආරම්භ කර ඇති බව  කොළඹ ප්‍රධාන මහෙස්ත්‍රාත් ප්‍රසන්න අල්විස් මහතා වෙත දැනුම්දී තිබුණි.

එම අපරාධ කොට්ඨාසය අධිකරණයට දන්වා සිටියේ, පිළිකා රෝගයෙන් පීඩාවිඳින කඩුවෙල ප්‍රදේශයේ පුද්ගලයෙකු වෙනුවෙන් රාජ්‍ය බැංකුවකට බැරවූ රුපියල් ලක්ෂ 38ක මුදලක් කිසියම් පිරිසක් විසින් ඔහුගේ බැංකු ගණුමෙන් වංචා සහගතව ලබාගැනීමේ සිද්ධියකට අදාළව ලද පැමිණිල්ලක් සම්බන්ධයෙන් සිදුකළ විමර්ශනයකට අනුව මෙම කරුණු හෙළිවූ බවයි.

අදාළ පිළිකා රෝගීන් මුදල් ඉල්ලා අන්තර්ජාලය ඔස්සේ සිදු කරන ලද ඉල්ලීම් කෙරෙහි ප්‍රතිචාර දක්වන එම වංචනික පුද්ගලයින් කණ්ඩායමක් එම පිළිකා රෝගීන්ට මූල්‍ය ප්‍රතිලාභ එකතු කරදෙන බව පවසා එම රෝගීන්ට අදාළ බැංකු ගිණුම් අංකයන්, ජාතික හැඳුනුම්පත් අංකයන්, දුරකථන අංකයන් ලබාගන්නා බවට තොරතුරු හෙළිවී ඇති බවද එම කොට්ඨාසය අධිකරණයට දැන්වීය.

එම තොරතුරු ලබා ගන්නා පුද්ගලයන් මෙරට ප්‍රසිද්ධ දුරකථන සමාගමක් වෙත ගොස් ඉහතකී තොරතුරුවලට අදාළව නව සිම්පත් ලබාගන්නා බවත් එසේ ලබාගත් සිම්පත් භාවිත කරමින් එම රෝගීන්ගේ බැංකු ගිණුම්වලට පරිගණක තාක්ෂණික ක්‍රමවේදයන් ඔස්සේ ඇතුල්වී එම ගිණුම්වල තිබෙන සියලු මුදල් වංචනිකව ලබාගන්නා බවට කරුණු හෙළිවී ඇති බවද මෙම සිද්ධිය සම්බන්ධයෙන් කරුණු දක්වමින් එම කොට්ඨාසය අධිකරණය හමුවේ පැවසීය.

කඩුවෙල ප්‍රදේශයේ පදිංචි පිළිකා රෝගියාගේ බැංකු ගිණුමේ තිබූ මුදල් වංචනිකව සොරා ගත් කණ්ඩායමේ එක් පුද්ගලයකු මේ වනවිට හඳුනාගෙන ඇති බවද ඔහු අත්අඩංගුවට ගෙන අධිකරණයට ඉදිරිපත් කිරීමට අවශ්‍ය පියවර ගන්නා බවද එම කොට්ඨාසය අධිකරණයට දැනුම්දී තිබේ. මේ සම්බන්ධයෙන් සිදුකරන විමර්ශන සඳහා අදාළ දුරකථන සමාගමෙන් හා රාජ්‍ය බැංකුවකින් වාර්තා ලබා ගැනීමට නියෝගයක් ලබාදෙන ලෙසට එම කොට්ඨාසය කළ ඉල්ලීමකට අධිකරණයෙන් අවසර හිමි විය.