කෙන්යාව සලිත කරමින් අලි ඇතුන් 15ක් මරුට - තක්කාලි වගාවේ කෘමිනාශකයක් ගැන සැකයක්

By Malith Madushan Jul 31, 2026 07:53 AM GMT

Malith Madushan

in International

Report

කෙන්යාවේ ඇම්බෝසෙලි ජාතික වනෝද්‍යානයට ආසන්න ප්‍රදේශයකදී අලි ඇතුන් 15 දෙනෙකු මියයාමට හේතුව තක්කාලි වගාවලට යොදන ලද කෘමිනාශකයක් බවට සැක පළ වී තිබේ.

කෙන්යා වනජීවී සේවය (Kenya Wildlife Service - KWS) සඳහන් කරන්නේ, මියගිය අලි ඇතුන්ගේ සිරුරු වලින් ලබාගත් සාම්පලවල සිදුකළ මූලික රසායනාගාර පරීක්ෂණවලදී සයනයිඩ් (Cyanide) අඩංගු බවට හඳුනාගෙන ඇති බවයි.

මෙම සිද්ධියට අදාළව අලි ඇතුන් 10 දෙනෙකු අංශභාග ලක්ෂණ පෙන්වා දින දෙකක් ඇතුළත මියගොස් ඇති අතර, අනෙක් අලි පස් දෙනා සොයා ගන්නා අවස්ථාවේදීත් මියගොස් සිටි බව වාර්තා වේ.

සිද්ධිය සම්බන්ධයෙන් වැඩිදුර පරීක්ෂණ ක්‍රියාත්මක වන අතර, මේ වනවිට වනජීවී නිලධාරීන් මෙය කිසියම් අරමුණකින් සිදුකළ ක්‍රියාවක් බවට සැක නොකරන බව සඳහන් කර ඇත. එමෙන්ම, අලි ඇතුන් විසින් ආහාරයට ගත් විෂ සහිත ද්‍රව්‍ය හේතුවෙන් ජනතාවට ක්ෂණික අවදානමක් නොමැති බවට වනජීවී බලධාරීන් ජනතාව දැනුවත් කර තිබේ.

මෙම සිදුවීමත් සමඟ ජාතික වනෝද්‍යානය ආසන්න ප්‍රදේශවල කෘෂිකාර්මික කටයුතු ව්‍යාප්ත වීම පිළිබඳව අවධානය යොමුවී ඇත. ආහාර සහ ජලය සොයා අලි ඇතුන් බොහෝවිට වගාබිම් වෙත පැමිණීම හේතුවෙන් මිනිස්-වනජීවී ගැටුම් ඇතිවීමේ අවදානමද ඉහළ ගොස් තිබේ.

ඇම්බෝසෙලි පරිසර පද්ධතිය ලෙස හඳුන්වන මෙම ප්‍රදේශය කෙන්යාව සහ ටැන්සානියාව අතර දේශසීමා ආසන්නයේ පැතිරුණු විශාල භූමි ප්‍රදේශයක් වන අතර, එය ලෝක ප්‍රසිද්ධ වනජීවී කලාපයකි.

දශක ගණනාවකට පසු මෙම ප්‍රදේශයෙන් මෙතරම් විශාල අලි මරණ සංඛ්‍යාවක් වාර්තා වූ පළමු අවස්ථාව මෙය බව නිලධාරීන් පවසයි. මීට පෙර මෙම කලාපයේ අලි දඩයම් මර්දනය කිරීමේ වැඩසටහන් සාර්ථකව ක්‍රියාත්මක කර තිබුණි.

මියගිය අලි ඇතුන් අතර විවිධ වයස් කාණ්ඩවල සහ පිරිමි හා ගැහැණු සතුන් සිටීම විශේෂත්වයක් වන අතර, එමඟින් මෙම මරණ එක් අලි පවුලකට හෝ විශේෂ කණ්ඩායමකට පමණක් සීමා නොවන බව පෙනී යයි.

කෙන්යා වනජීවී සේවය සඳහන් කළේ, මෙම අලි මරණ 2026 ජූනි 24 සිට ජූලි 24 දක්වා මාසයක පමණ කාලයක් තුළ සිදුව ඇති බවයි. අලි ඇතුන්ගේ ගමන් මාර්ග නිරීක්ෂණය කරන ඇම්බෝසෙලි අලි සංරක්ෂණ ආයතනයේ දත්ත අනුව, 2025 වනවිට ඇම්බෝසෙලි පරිසර පද්ධතිය තුළ අලි ඇතුන් 2,000කට වැඩි සංඛ්‍යාවක් ජීවත් වී ඇත.