පිස්සු හැදෙන සෙල්ලමක් - ඇමරිකානු වෙළෙඳපොළ විනාඩි 12ක් ඇතුළත ඩොලර් ට්‍රිලියනයකින් උඩට පනී

ඉරානය සමඟ සටන් විරාම ගිවිසුමක් පිළිබඳ පුවත් පළවීමත් සමඟ එක්සත් ජනපද කොටස් වෙළෙඳපොළ අද දිනයේදී තියුනු ලෙස ඉහළ ගොස් තිබේ.

වෙළෙඳාම ආරම්භ වී මිනිත්තු කිහිපයකින්ම වෙළෙඳපොළ වටිනාකම ඩොලර් ට්‍රිලියන 1කට ආසන්න ප්‍රමාණයකින් ඉහළ ගිය බව විදෙස් මාධ්‍ය වාර්තා කරයි. එය වෙළෙඳපොළ තුළ දැඩි ආයෝජන ප්‍රවේශයක් ඇතිවූ අවස්ථාවක් ලෙස සටහන් වී ඇත.

වෙළෙඳ දත්ත අනුව, Nasdaq දර්ශකය 3%කට ආසන්නව ඉහළ ගොස් ඇති අතර Dow Jones Industrial Average ද නව වාර්තාගත ඉහළ මට්ටමකට ළඟා වී තිබේ. S&P 500 ද ශක්තිමත් වර්ධනයක් පෙන්වා ඇත.

මැදපෙරදිග භූදේශපාලනික ආතතීන් අඩුවීමත් සමඟ තෙල් මිල පහත වැටීම ආයෝජක විශ්වාසය ඉහළ නැංවීමට ප්‍රධාන හේතුවක් වී ඇති බව විශ්ලේෂකයෝ පෙන්වා දෙති. තෙල් මිල පහත වැටීම උද්ධමන පීඩනය අඩු කරනු ඇතැයි අපේක්ෂා කිරීමද වෙළෙඳපොළ ඉහළ යාමට දායක වී තිබේ.

ඒ අනුව බලශක්ති කොටස් අංශයේ පහත වැටීමක් වාර්තා වුවද, තාක්ෂණික කොටස් ඇතුළු අනෙකුත් ප්‍රධාන අංශවල දැඩි ඉහළ යාමක් දැකිය හැකිව තිබේ.

එක්සත් ජනපද ෆෙඩරල් සංචිතය ඉදිරියේදී ගනු ලබන පොලී අනුපාත තීරණයද වෙළෙඳපොළ දිශාවට බලපෑම් කළ හැකි ප්‍රධාන සාධකයක් ලෙස ආර්ථික විශේෂඥයන් පෙන්වා දෙයි.