ලංකාවේ හසලක ගාමිණී රුසියා-යුක්‍රේනයෙන් යුද්ධයෙන් යළි උපදී.. ලොවම කැළඹූ සිදුවීම මෙන්න.

ඒ 1991 ජූලි මස 15 වැනිදා රාත්‍රියයි. ගණ අඳුර උදාවත්ම එල්.ටී.ටී.ඊ.යේ අලිමංකඩ කඳවුර අත්පත් කර ගැනීමේ සටනට අවතීරණය වී සිටියේය.

මේ සඳහා කොටි සෙබළුන් 5,000කට ආසන්න සංඛ්‍යාවක් යොදවා තිබූ අතර එල්.ටී.ටී.ඊ. සටන්කරුවන් කඳවුර වටකරමින් දැවැන්ත මෝටාර් ප්‍රහාරයක් එල්ල කරන්නට විය.

ඒ අතර තවත් කොටි සෙබළු කළුවර මැදින් වෙල්යාය හා හිස් මුඩු බිම් ඔස්සේ බිම දිගාවෙමින් කඳවුර වටකරන්නට වූහ.

පිපිරුම් හඬ හා වෙඩි හඬ මධ්‍යයේ හමුදා සෙබළුන්ද RPG හා RCL වැනි ප්‍රබල ප්‍රහාර කොටි ත්‍රස්තයන් වෙත එල්ල කරද්දී හමුදා කඳවුරේ පිරිසගේ අවධානය යොමු වූයේ වෙඩි ප්‍රහාර සමඟ මුළු පරිසරයම වෙළාගෙන තිබූ දුම්රොටු අතරින් කඳවුර දෙසට ඇදෙන කොටි බුල්ඩෝසරය වෙතය.

ඒත් සමඟ හමුදා කඳවුරෙන් ඒ දෙසට එල්ල වන ප්‍රහාර තවත් දැඩිවිය. කොටි බුල්ඩෝසරයේ නැඟුණු කොටි සෙබළුද කඳවුර ඉලක්ක කරමින් වෙඩි තබන්නට විය.

මුළු ප්‍රදේශය පුරාම දරුණු සටන් ඇවිළී තිබිණි.

දුම්රොටු අතරින් ඉදිරියට එන කොටි බුල්ඩෝසරය කඳවුරේ ඉදිරි ආරක්ෂක වළල්ලේ රැකවරණයට යොදා සිටි සෙබළ ගාමිණිගේ නෙත ගැටුණේ ඔය අතරය.

කළු පැහැති කොටි බුල්ඩෝසරය වෙඩි හඩින් මතුවන දුම්රොටු කඩාගෙන ඇදෙන්නේ හමුදා කඳවුර තුළට කඩා වදින්නට බව සෙබළ ගාමිණීට සිතෙන්නට ඇත.

ඔහු වහා සිය අත්දෙකට අත්බෝම්බ දෙකක් අරගෙන ඒවායේ “පින්” කටෙන් කඩා දැම්මේය.

බුල්ඩෝසරයට මීටර 10ක් පමණ සමීපව සිටි ගාමිණී බුල්ඩෝසරය දෙසට දිව ගියේ සෑම දෙසකින්ම බුල්ඩෝසරයට එල්ලවන ප්‍රහාරද නොතකාය.

කෙසේ හෝ බුල්ඩෝසරයේ පිටුපස තිබූ ඉනිමගේ එල්ලීමට ඔහුට හැකිවිය.

අත්බෝම්බ දෙක කොටි බුල්ඩෝසරය තුළට දමා යළි කඳවුර වෙත දිව එන්නට ඔහුට අවශ්‍ය වන්නට ඇත.

ඉණිමගෙන් ඉහළට නැඟගත් ඔහු බුල්ඩෝසරයේ වූ කවුළුවකින් අත්දෙකේ තිබූ බෝම්බ එය තුළට විසිකළේය.

ඒ සමඟම ඇති වූයේ දරුණු පිපිරීමකි. පාලනයෙන් ගිලිහුණු බුල්ඩෝසරය ඒ අසල තිබූ ගොඩනැඟිල්ලක ගැටී නතර විය.

එහෙත් ගාමිණීට පෙරළා කඳවුරට ඒමට හැකියාවක් නොවීය.

කොටින්ගේ අරමුණු ඉටු නොවීය. පසුව කරන ලද සෝදිසියේදී කොටි බුල්ඩෝසරය තුළ තිබී කොටි ත්‍රස්තයන් හතර දෙනකුගේ මළසිරුරු හමුවිය

. ඒ අසල වැටී තිබූ සෙබළ ගාමිණීගේ සිරුරද සොයා ගැනීමට හැකිවූ අතර ඔහුගේ සිරුර පුරා තුවාල සිදුවී තිබිණි.

සෙබළ ගාමිණී කුලරත්නගේ වීරක්‍රියාව නිසා කොටින්ට අලිමංකඩ කඳවුර අත්පත් කර ගැනීමට නොහැකි විය.

ඒ ඔහු කළ වීර ක්‍රියාව කාගේත් ප්‍රශංසාවටත් ඇගයීමටත් ලක්විය.

වෙඩි නොවදින ගණකම් තහඩුවලින් හා RPG ප්‍රහාර වැළැක්විය හැකිසේ ශක්තිමත් දැලකින් ආවරණය කර ඇති කොටි බුල්ඩෝසරය අලිමංකඩ කඳවුරේ ඉදිරි ආරක්ෂක වළල්ල විනාශ කිරීම සඳහා යොදවා තිබූ බව පසුව කළ විමර්ශනයේදී හෙළිවිය.

කිසිදු නිලධාරියකුගේ විධානයකින් තොරව තම සහෝදර හමුදා සෙබළුන් විශාල පිරිසකගේ ජීවිත ආරක්ෂා කර ගැනීම සඳහා සිය ජීවිතය පූජාකළ මෙවන් නිර්භීත සෙබළු ලෝක හමුදා ඉතිහාසයේද නැති තරම්ය.

එම වීර ක්‍රියාව නිමිත්තෙන් සෙබළ කුලරත්නට සොල්දාදුවකුට ලබාගත හැකි ඉහළම පදක්කම වන පරම වීර විභූෂණයෙන්ද ඔහු පිදුම් ලැබීය.

රුසියානු හමුදා යුක්රේනය යටත් කර ගැනීම සඳහා සියලු දිශාවන්ගෙන් පහර එල්ල කරමින් සිටියදී සිය මවුබිම රැක ගැනීම සඳහා නිර්භයව සටන් කරන යුක්රේන විරුවන් ගැනද නිතර මාධ්‍ය හරහා අසන්නට ලැබේ.

ඒ අතරින් එක් විශේෂ චරිතයක් ගැන පසුගිය දිනවල විශේෂයෙන් කතාබහට ලක්වනු දක්නට ලැබිණි.

ඔහුගේ නම විටලි ෂාකුන්ය. ඔහු කළ වීර ක්‍රියාවට උපහාර වශයෙන් ෂාකුන් ජාතික වීරයකු ලෙස නම් කිරීමට යුක්රේන ජනාධිපති වොලොදිමිර් සෙලෙන්ස්කි ක්‍රියා කළේය.

ෂාකුන් එරට නාවුක හමුදාවට සම්බන්ධ සෙබළෙකි.

ඔහුගේ වයස අවුරුදු 25ක් බවද සඳහන් වේ.

මෙම සිද්ධිය සිදුවූ දා එනම් පසුගිය පෙබරවාරි 24 වැනිදා ඔහුට පැවැරී තිබූ රාජකාරිය වූයේ කර්සන් නමැති නගරයේ ඇති හෙනිචෙස්ක් නමැති විශාල පාලමක් මුර කිරීමයි.

ඒ වනවිට රුසියානු සෙබළු කර්සන් නගරය අල්ලා ගැනීම සඳහා ඒ දෙසට පැමිණෙමින් සිටියහ.

ඔවුන්ට නගරයට ඇතුළු වීම සඳහා තිබූ ප්‍රධාන මාර්ගයක් වැටී තිබුණේ හෙනිචෙස්ක් පාලම හරහාය.

පාලම මුර කිරීම සඳහා සිටියේ ෂාකුන් පමණක් නොවේ.

තවත් භටයෝ කිහිපදෙනෙක්ද එහි ඔහු සමඟ සිටියහ.

රුසියානු හමුදා නගරය අල්ලා ගැනීම සඳහා වේගයෙන් ළඟාවෙමින් සිටි තත්ත්වය තුළ පාලම මුරකරමින් සිටි සෙබළුන් ඉක්මනින් තීරණයක් ගත යුතු විය.

එහිදී ඔවුන්ගේ තීරණය වූයේ පාලමට බෝම්බ සවි කර එය පුපුරුවා හැරිය යුතු බවයි.

ඔවුහු වහ වහා ඒ සඳහා පියවර ගත්හ. ඔවුන් මෙම කටයුත්තෙහි නිරතව සිටියදී රුසියානු හමුදා ඒ වෙත වඩාත් සමීප වූ අතර සෙබළු සියලු දෙනා පාලමෙන් ඉවත්ව ආරක්‍ෂිත ස්ථානයක් වෙත ගියහ.

නමුත් ෂාකුන්ට පමණක් පාලමෙන් ඉවත් වීමට කාලයක් නොලැබිණි.

ඔහු සිය සගයන්ට කෙටි පණිවුඩයක් එවූ අතර එහි ඔහු සඳහන් කර තිබුණේ තමා පාලම පුපුරුවා හරින බවය.

ඊට ටික වේලාවකට පසු ෂාකුන්ගේ සගයන්ට මහා පිපිරීමක හඬ ඇසී තිබිණි.

ෂාකුන් මේ ආකාරයෙන් පාලම පුපුරුවා හැර තිබුණේ ඒ සමඟ තමාද මියයන බව දැන දැනමය. රුසියානු හමුදාවල ගමන අඩාල කිරීම සඳහා ඔහු සිය ජීවිතය පූජා කළේය.

කෙසේ හෝ වේවා මෙම ඉතා වැදගත් නගරය ආරක්‍ෂා කර ගැනීම සඳහා දිවි පුදා උත්සාහ කළ ෂාකුන් ජාතික වීරයකු ලෙස නම් කිරීමට තමා පියවර ගන්නා බව ජනාධිපති සෙලෙන්ස්කි ප්‍රකාශ කළේය.

මෙම ගෞරව නාමය හැඳින්වෙන්නේ ‘යුක්රේනයේ වීරයා’ (Hero of Ukraine) යනුවෙනි.

එය සිවිල් වැසියකුට යුක්රේනය තුළ පිරිනැමෙන ඉහළම සම්මානයයි.