නාගපට්ටිනම්-කන්කසන්තුරය යාත්‍රා සේවයට ඉන්දියාවෙන් තවත් වසරක මුදල් දෙන්න සුදානම් වෙයි

නාගපට්ටිනම් සහ කන්කසන්තුරය අතර ක්‍රියාත්මක මගී යාත්‍රා සේවාව අඛණ්ඩව පවත්වාගෙන යාම සඳහා ඉන්දියාව තවත් වසරකට රුපියල් මිලියන 300ක පමණ මූල්‍ය සහායක් ලබාදීමට තීරණය කර තිබේ. කොළඹ පිහිටි ඉන්දීය මහ කොමසාරිස් කාර්යාලය සිකුරාදා නිකුත් කළ නිවේදනයක මේ බව සඳහන් කර ඇත.

මෙය මෙම යාත්‍රා සේවාව සඳහා ඉන්දියාව අඛණ්ඩව තුන්වන වසරට ලබාදෙන මූල්‍ය සහාය වන අතර, 2024 අගෝස්තු මාසයේදී සේවාව යළි ආරම්භ කිරීමෙන් පසු මෙම සහාය ලබාදී තිබේ.

මහ කොමසාරිස් කාර්යාලය සඳහන් කළේ, වසරකට ආසන්න වශයෙන් ශ්‍රී ලංකා රුපියල් මිලියන 300ක මුදලක් Viability Gap Funding (VGF) ක්‍රමවේදය යටතේ ලබාදෙන බවයි. සේවාවේ ගාස්තු දැරිය හැකි මට්ටමක පවත්වාගෙන යාම සහ එහි මෙහෙයුම් කටයුතු තිරසාරව පවත්වාගෙන යාම මෙම මූල්‍ය සහායේ ප්‍රධාන අරමුණ බවද එම නිවේදනයේ සඳහන් වේ.

ඒ සඳහා ප්‍රධාන ලොජිස්ටික් හා මෙහෙයුම් වියදම් ආවරණය කිරීමට සහාය ලබාදෙන අතර, පසුගිය වසරේ ක්‍රියාත්මක කළ කොන්දේසිවලට සමාන කොන්දේසි යටතේ එය ලබාදීමට නියමිතය.

AC නැතුවත් ගෙදර සිසිලස රැකගන්න ලංකාවෙන් එක්සත් ජාතීන්ට අලුත් යෝජනාවක්

2024 අගෝස්තු මාසයේ සේවාව යළි ආරම්භ කිරීමෙන් පසු මේ දක්වා මගීන් 52,000කට ආසන්න පිරිසක් මෙම යාත්‍රා සේවය භාවිත කර තිබේ. එමගින් ඉන්දියාව සහ ශ්‍රී ලංකාව අතර සංස්කෘතික, ආර්ථික හා සමාජීය සබඳතා වර්ධනයට දායකත්වයක් ලැබී ඇති බව ඉන්දීය මහ කොමසාරිස් කාර්යාලය පවසයි.

දෙරට අතර මුහුදු මාර්ග සම්බන්ධතාව යළි ශක්තිමත් කිරීමේ වැදගත් පියවරක් ලෙස මෙම යාත්‍රා සේවය හඳුන්වාදී ඇති අතර, 2024 දෙසැම්බර් මාසයේ ශ්‍රී ලංකා ජනාධිපතිවරයාගේ ඉන්දීය සංචාරයේදීත්, 2025 අප්‍රේල් මාසයේ ඉන්දීය අග්‍රාමාත්‍යවරයාගේ ශ්‍රී ලංකා සංචාරයේදීත් දෙරට අතර වැඩිදියුණු කළ මුහුදු සම්බන්ධතා පිළිබඳ එකඟ වූ දැක්ම සමඟ මෙම සහාය අඛණ්ඩව ලබාදීම සම්බන්ධ වන බවද එම කාර්යාලය සඳහන් කරයි.

ඉදිරි සැලසුම් යටතේ කන්කසන්තුරය වරාය ප්‍රතිසංස්කරණය කිරීම සඳහා ඉන්දියාවේ සමස්ත ඇමෙරිකානු ඩොලර් මිලියන 65ක ප්‍රදාන ආධාර වැඩසටහන යටතේ කටයුතු සිදුකිරීමට නියමිතය.

එමෙන්ම, ඉන්දියාව සහ ශ්‍රී ලංකාව අතර මුහුදු සම්බන්ධතා තවදුරටත් පුළුල් කිරීම සහ ආර්ථික හා ජනතාව අතර සබඳතා ගැඹුරු කිරීම සඳහා නව යාත්‍රා මාර්ග සහ සේවා හඳුන්වාදීම පිළිබඳවද ඉදිරියේදී අවධානය යොමු කිරීමට නියමිත බව ඉන්දීය මහ කොමසාරිස් කාර්යාලය වැඩිදුරටත් සඳහන් කරයි.

ටෙලිග්‍රෑම් භාවිතා කරන්නන්ට අනතුරු ඇඟවීමක් - ඔබේ මුදල් නැතිවෙන්න කලින් දැනුවත් වෙන්න