ගාල්ලෙන් විශාලතම භූගත ආයුධ ගබඩා 03ක් බලන්න සුපිරි අවස්ථාවක්...අලුත්ම අත්දැකීම විදින්න ගාල්ලට යන්න (PHOTOS)

දීර්ඝ කාලයක් තිස්සේ ජනතාවට විවෘත නොකර වසා දමා තිබූ ගාලු කොටුවේ පැරණි යුද අට්ටාල හෙවත් වෙඩි බෙහෙත් සහ පතොරම් ගබඩා ජනතාවට නැරඹීම සඳහා විවෘත කළ බව නාගරික සංවර්ධන හා නිවාස අමාත්‍යාංශය ප්‍රකාශ කළා.

ඒ අග්‍රාමාත්‍ය මහින්ද රාජපක්ෂ මහතාගේ උපදෙස් පරිදි නාගරික සංවර්ධන අධිකාරිය මඟින් ප්‍රතිසංස්කරණය කිරීමෙන් අනතුරුවයි.

අග්‍රාමාත්‍ය මහින්ද රාජපක්ෂ මහතා විෂය භාර අමාත්‍යවරයා වශයෙන් මෙසේ උපදෙස් ලබා දී තිබුණේ ජනාධිපති ගෝඨාභය රාජපක්ෂ මහතාගේ “සෞභාග්‍යයේ දැක්ම” ප්‍රතිපත්ති ප්‍රකාශය අනුව සිදුකෙරෙන ගාල්ල කොටුව ප්‍රතිසංස්කරණ ව්‍යාපෘතිය මඟින් අවසන් කරන ලද ව්‍යාපෘති ජනතාවට දැකබලා ගැනීමට පහසුකම් සලසන ලෙසයි.

අතීතයේ ශ්‍රී ලංකාව ආක්‍රමණය කරමින් යටත් විජිත රාජ්‍යයක් ලෙස පාලනය කළ පෘතුගීසි, ලන්දේසි සහ ඉංග්‍රීසි ජාතිකයන් ශ්‍රී ලංකාව තුළ බලය තහවුරු කරගැනීම සඳහා ඉදිකළ ගාලු කොටුවේ පැරණි ප්‍රදීපාගාරය පාමුල මෙන් ම තවත් ස්ථාන කිහිපයක මෙම වෙඩි බෙහෙත් සහ පතොරම් ගබඩා යුධ සැලසුම් උපක්‍රමවලට අනුව පොළව මට්ටමේ ඉදිකළ විශාල ආරක්ෂිත බංකර තුළ ගොඩනගා තිබීම විශේෂත්වයක්.

ගොඩනඟා තිබූ මෙම අවි ආයුධ ගබඩා කළ බංකරවලින් පැරණිම බංකරය වූයේ වසර 433 ක් පැරණි ලන්දේසීන් විසින් නිර්මාණය කරන ලද බංකරයයි.

දෙවැනි පැරණි බංකරය ලෙස වසර 362 ක් පැරණි පෘතුගීසින් විසින් නිර්මාණය කරන ලද බංකරය හැඳින්විය හැකි අතර වසර 226 ක් පැරණි ඉංග්‍රීසින් විසින් නිර්මාණය කරන ලද බංකරය තෙවන පැරණි බංකරය ඇතුළත් වේ.

ආක්‍රමණික හමුදා විසින් එම බංකර 03 හඳුන්වනු ලබන්නේ ක්ලිපන්බර්ග් යුද අට්ටාලය, ඊලොස් යුද අට්ටාලය සහ තාරකා යුද අට්ටාලය යන නම් වලින්.

පොදු මහජනතාවට විවෘත කරන ලද එම බංකර තුළ ප්‍රදර්ශනය කරනු ලැබුවේ, පෘතුගීසි, ලන්දේසි හා ඉංග්‍රීසි හමුදාවන්ට අයත් අවි ආයුධ සහ යුද උපකරණවල අනුරූ සමූහයයි.

මේ අනුව දකුණු ලකේ අඟනගරය වූ ගාල්ලට පැමිණෙන දෙස් විදෙස් සංචාරකයින්ට මෙතැන් සිට ලංකාවේ අතීතය විදහා දක්වන මෙම සුවිශේෂී ස්ථානය දැකබලා ගැනීමට අවස්ථාව උදාවී තිබේ.

එහි ඡායාරූප කිහිපයක් පහතින් නරඹන්න.