රනිල්ගෙන් සජිත්ට සුබ පැතුම් - දේශපාලන කරළිය උඩුයටිකුරු කළ විශේෂ ලිපිය මෙන්න

ලෝක කම්කරු දිනය නිමිත්තෙන් අද (01) සමගි ජන බලවේගය සංවිධානය කරන මැයි දින රැළියට හිටපු ජනාධිපති රනිල් වික්‍රමසිංහ මහතා විසින් සුභාසිංසන පණිවිඩයක් නිකුත් කර ඇත.

එම රැළිය විපක්ෂනායක සජිත් ප්‍රේමදාස මහතාගේ ප්‍රධානත්වයෙන් අද පස්වරුවේ මාලිගාවත්ත පී.ඩී. සිරිසේන ක්‍රීඩාංගණයේදී පැවැත්වීමට නියමිතය.

හිටපු ජනාධිපතිවරයා සිය පණිවිඩයෙන් පෙන්වා දී ඇත්තේ, වර්තමාන රජය යටතේ හොරකම්, වංචා, දූෂණ සහ තර්ජන වැඩිවී ඇති අතර පසුගිය කාලය එවැනි සිදුවීම් මනාව ප්‍රකාශ වූ කාලයක් ලෙස සැලකිය හැකි බවයි. ගල් අඟුරු වංචාව සහ මහා භාණ්ඩාගාරයේ අමෙරිකානු ඩොලර් ලක්ෂ 25ක මංකොල්ලය වැනි සිදුවීම් ඒ අතර ප්‍රධාන බවද සඳහන් කර තිබේ.

එසේම ජනතාවට පොරොන්දු වූ සහන ලබාදීමට රජයට මෙතෙක් නොහැකි වී ඇති බවත්, ජීවන වියදම ඉහළ ගොස් ජනතාව දැඩි අර්බුදයකට මුහුණ දී ඇති බවත් ඔහු අවධාරණය කරයි. එවැනි තත්ත්වයකදී ආණ්ඩුවේ පාර්ශව සුවපහසු ලෙස කටයුතු කරන බවටද චෝදනා කර ඇත.

හිතුවක්කාරී ලෙස පවත්වාගෙන යන පෙර පාසල්වලට වැට බඳී - ඇමතිනි සරෝජාගෙන් දැඩි තීරණයක්

පාර්ලිමේන්තු ප්‍රජාතන්ත්‍රවාදය ද බරපතල පීඩනයකට ලක්ව ඇති බවත්, විපක්ෂයට ජනතාව වෙනුවෙන් හඬ නැගීමට අවකාශය සීමා වී ඇති බවත් එම පණිවිඩයේ සඳහන් වේ. එසේම, විපක්ෂ ජයග්‍රහණය පිළිබඳ භීතිය හේතුවෙන් පළාත් පාලන මැතිවරණ පවත්වන්නේ නැති බවද ඔහු පෙන්වා දී ඇත.

මෙම පසුබිම යටතේ “පච මදිවට හොරු” යන පාඨය වර්තමානයට ඉතාමත් සුදුසු බවත්, එය ජනතා මට්ටමට ගෙන යාම වැදගත් බවත් හිටපු ජනාධිපතිවරයා සඳහන් කරයි. එමෙන්ම පළාත් පාලන ආයතන මගින්ද එම පාඨය ක්‍රියාත්මක කිරීම සුදුසු බවද ඔහු පෙන්වා දී ඇත.

එම සුභාසිංශණ පණිවිඩය පහතින්,

ජනතා විමුක්ති පෙරමුණ ප්‍රමුඛ මාලිමා රජයේ නියම ස්වරූපය පෙන්වමින් හොරකම්, වංචා, දූෂණ, තර්ජන ගර්ජන මනාව ඔප්පු කළ කාලපරිච්ඡේදයක් ලෙස පසුගිය වසර සැලකිය හැකිය. ගල් අඟුරු වංචාව, මහා භාණ්ඩාගාරයේ ඇමරිකානු ඩොලර් ලක්ෂ 25 ක මංකොල්ලය ඒ අතරින් මෑත කාලයේ සිදුවූ මහා පරිමාණ හොරකම් කිහිපයකි.

ජනතාවට පොරොන්දු වූ සහන කිසිවක් ලබාදීමට අද වන තෙක් මාලිමා රජයට හැකි වී නැත. ජීවන වියදම අහස උසට ගොස්ය. ජනතාව දුක් විඳින අවස්ථාවේදී ආණ්ඩුවේ පාර්ශව සැප විඳිමින් සිටිති.

තවත් පැත්තකින් මේ වනවිට පාර්ලිමේන්තු ප්‍රජාතන්ත්‍රවාදයට මරු පහරක් එල්ල කර පවතී. සමගි ජන බලවේගය ප්‍රමුඛ විපක්ෂ පාර්ලිමේන්තු කණ්ඩායමට ජනතාව වෙනුවෙන් හඬ නැගීමට ඉඩක් නොදීම බරපතල තත්ත්වයකි. හැමවිටම තර්ජනයෙන් සියල්ල පාලනය කිරීමට වෙර දරයි. පවතින වාතාවරණය අනුව විපක්ෂය ජයග්‍රහණය කරනු ඇතැයි බියෙන් පළාත් සභා ඡන්දය පවත්වන්නේ නැත.

ආණ්ඩුක්‍රම ව්‍යවස්ථාව මගින්ම ජනතා මුදල් පාලනය කිරීමේ බලය පාර්ලිමේන්තුවට දී තිබියදීත් මහා භාණ්ඩාගාරයේ ඇමරිකානු ඩොලර් ලක්ෂ 25 ක හොරකම පිළිබඳ පාර්ලිමේන්තු විවාදයක් පැවැත්වීමට මුලින් ඉඩ දුන්නේ නැත. වෙස්ට්මිනිස්ටර් පාර්ලිමේන්තු ක්‍රමය යටතේ මෙවැනි තත්ත්වයක් ඇති වූයේ ප්‍රථම වතාවටය.

මුදල් අමාත්‍යංශ ලේකම්වරයා පාර්ලිමේන්තු කාරක සභාව හමුවට පැමිණීම ද මුලින් ප්‍රතික්ෂේප කළේය. ප්‍රජාතන්ත්‍රවාදයට එරෙහි මේ තීරණ අවසන් මොහොතේ වෙනස් වූයේ දිගින් දිගටම එල්ල වූ ජනතා විරෝධය හේතුවෙනි.

තවත් පැත්තකින් ජනතා විමුක්ති පෙරමුණ ප්‍රමුඛ මාලිමා රජය බෞද්ධ අයිතිවාසිකම් සහමුලින්ම උල්ලංඝනය කරමින් සිටී. කතෝලික පාසල් පිළිබඳව 1962 දී ආණ්ඩුව සහ කතෝලික සභාව අතර ඇතිකරගත් සම්ප්‍රදායන් සියල්ල කඩකරලාය. කිසිඳු ආගමක් ගැන රජයේ සැලකිල්ලක් නැත.

වර්ෂ 1977 සිට ජේ. ආර්. ජයවර්ධන, රණසිංහ ප්‍රේමදාස යන මහත්වරුන්ගේ නායකත්වයෙන් ක්‍රියාත්මක කළ සංවර්ධන වැඩසටහන් සියල්ල මේ වනවිට ඇණ හිට පවතී. අද නව රැකියා බිහි වන්නේ නැත. කර්මාන්ත, සංචාරක, ඉදිකිරීම් ඇතුළු සියලු ක්ෂේත්‍ර කඩාවැටී අවසානය.

මේ පසුබිම යටතේ “පච මදිවට හොරු” පාඨය වර්තමානයේ ඉතාම උචිතම තේමාවයි. සමගි ජන බලවේගය තෝරාගත් ඒ පාඨය බිම් මට්ටමටම ගෙන යනු ඇතැයි අපේක්ෂා කරමි. ප්‍රාදේශීය සභා, නගර සභා සහ මහ නගර සභා ඇතුළත් පළාත් පාලන ආයතන මගින් මේ පාඨය ක්‍රියාවට නැංවීම ඉතාම සුදුසුය.

එසේම එක්සත් ජාතික පක්ෂය සහ සමගි ජන බලවේගය එකට ගමනක් යාම සඳහා සාකච්ඡා කිරීමට පත් කළ කමිටුවේ වැඩකටයුතු ඉදිරියට ගෙන යමු යයි ද යළිත් සිහිපත් කරමි. සමගි ජන බලවේගයේ මැයි රැලිය සර්ව ප්‍රකාරයෙන්ම සාර්ථක වේවායි ප්‍රාර්ථනා කරමි.

රනිල් වික්‍රමසිංහ

viii වැනි විධායක ජනාධිපති

එක්සත් ජාතික පක්ෂ නායක

අද මේ ලග්න හිමියන්ට හදිසි ධන යෝග - ඔබේ ලග්නයත් ඒ අතරද?