පළාත් සභා මැතිවරණය පැවැත්වීම කල් දැමීමට තීරණය කළේ කවුද ?එම තීරණය සාධාරණද?

කොවිඩ් 19 වසංගත තත්ත්වය, නව මැතිවරණ ක්‍රමයක් සකස් වන තෙක් හා මහා සංඝරත්නය විසින් ඉදිරිපත් කරන ලද විරෝධතා සැළකිල්ලට ගනිමින් පළාත් සභා මැතිවරණය පැවැත්වීම කල් දැමීමට ඊයේ (28) රැස්වූ පක්ෂ නායක හමුවේ දී තීරණය කළ බව පරිසර අමාත්‍ය මහින්ද අමරවීර මහතා ප්‍රකාශ කළේය.

අමාත්‍යවරයා මෙම අදහස් පළ කළේ අද දින (29) පරිසර අමාත්‍යාංශයේ දී පැවැති මාධ්‍ය හමුවක් අමතමිණි.

අද (29) සිට ආරම්භ වන සිරිපා වන්දනා සමය හේතුවෙන් සමනළ කන්ද ආශ්‍රිත ප්‍රදේශය තුළ කැළිකසල, පොලිතින් හා ප්ලාස්ටික් අපද්‍රව්‍ය බැහැර කිරීම වැලැක්වීමට කටයුතු කරන ලෙස අමාත්‍යවරයා සිරිපා කරුණා කරන බැතිමතුන් වෙතින් ඉල්ලීමක් කලේය. ප්ලාස්ටික් හා පොලිතීන් බැහැර කරන පුද්ගලයින්ට එරෙහිව නීතිය ක්‍රියාත්මක කරන ලෙස පරිසර පොලිසියට දැනුම් දුන් බවත් අමාත්‍යවරයා සඳහන් කලේය.

එහිදී මාධ්‍යවේදීන් පළාත් සභා මැතිවරණය පැවැත්වීම සම්බන්ධයෙන් අමාත්‍යවරයාගෙන් කරුණු විමසා සිටියේය.

පළාත් සභා අහෝසි කළ යුතුයි යනුවෙන් මතයක් රට තුළ පවතිනවා. තවත් අය කියනවා පළාත් සභා තිබිය යුතුයි කියළත්. පළාත් සභා මැතිවරණය මෙම අවස්ථාවේ පැවැත්වීම උචිත නැති බව අපි ශ්‍රී ලංකා නිදහස් පක්ෂය වශයෙන් පෙන්වා දුන්නා.

ඒකට හේතුව තමයි කොවිඩ් 19 වසංගත තත්ත්වය හා ඒ නිසාම රට තුළ පවතින ආර්ථික ගැටළු. අනික් කරුණ තමයි අපි කරුණු ඉදිරිපත් කළා මැතිවරණයක් පැවැත්විය යුත්තේ නව මැතිවරණ ක්‍රමයක් යටතේ බව. ඒ වගේම මේ රජයට හිතවත් කණ්ඩායම් මෙන්ම මහා සංඝරත්නයත් පළාත් සභා මැතිවරණය කල් දාන ලෙස බලපෑම් කර තිබෙනවා.මෙම කරුණු සියල්ලම ඊයේ රැස්වූ පක්ෂ නායක සාකච්ඡාවේ දී අවධාරණය වුනා.

ඒ අනුව තමයි අවසාන තීන්දුව වශයෙන් ප්‍රකාශයට පත් කලේ පළාත් සභා මැතිවරණය දින නියමයක් නැතිව කල් දමන්නට.

පළාත් සභා අහෝසි කරනවා නම් ඒක පහසු දෙයක් නොවෙයි. පළාත් සභා මැතිවරණය නොපැවැත්වුනාට තවමත් පළාත් සභා ක්‍රියාත්මකයි. පළාත් සභා පිහිටුවන ලද්දේ 13වන ආන්ඩුක්‍රම ව්‍යවස්ථා සංශෝධනය යටතේ. ලෝකයේ සමහර රටවල් ඒ දෙස බලා සිටිනවා. ශ්‍රී ලංකාව තිබෙන්නේ ලෝකය තුළ මිසක් ලෝකය තිබෙන්නේ ශ්‍රී ලංකාව තුළ නොවෙයි. ඒ නිසා අපිට ලෝකය අමතක කර තීන්දු තීරණ ගන්නත් බැහැ. ඒ නිසා පළාත් සභා අහෝසි කිරීම කියලා අලුතින් යුද්ධයක් පටන් ගන්නත් අවශ්‍ය නැහැ.

ඒ වගේම පොදු ජන පෙරමුනේ පසුපෙළ ඉන්න කිහිප දෙනෙක් ශ්‍රී ලංකා නිදහස් පක්ෂයට හැමදාම තඩි බානවා. විවේචනය කරනවා. දොස් කියනවා. අපේ ප්‍රාදේශීය සංවිධායකවරුන්ට හිරිහැර කරනවා. අපි මේ ගැනත් ඊයේ පක්ෂ නායක රැස්වීමේ දී කරුණු ඉදිරිපත් කලා. පොදු පෙරමුණේ ඉහළ නායකයෝ කිසි විටෙක

ශ්‍රී ලංකා නිදහස් පක්ෂයට හිංසා වන පරිදි කටයුතු කරන්නේ නැහැ.ඒ සියලු දෙනා අපේ පක්ෂයට ගරු කරනවා. සමහර දිස්ත්‍රික්කවල ඡන්දෙන් අංක එකට එන්න බලාගෙන ඉඳලා හතරට පහට ගියපු අය තමයි ඔය විවේචන කරන්නේ. අපිට කලකිරීමක් නැහැ. කළකිරීම තියෙන්නේ ඒ අයටයි. ඒ නිසා තමයි අපිට හා අපේ පක්ෂයට පහර දෙන්නේ.

නමුත්ජනාධිපතිතුමා මෙන්ම අගමැතිතුමා , ජාතික සංවිධායක බැසිල් රාජපක්ෂ මහතාත් අපේ ගැටලු සම්බන්ධව අවධානය යොමු කර විසඳුම් ලබා දෙන්නට එකග වුනා. යැයි ද අමාත්‍යවරයා මෙහිදි සඳහන් කලේය.