ලිංගික ප්‍රචණ්ඩත්වය යුධ උපක්‍රමයක් ලෙස? පලස්තීන කාන්තාවන් මුහුණ දෙන බිහිසුණු ඉරණම හෙළිවේ

එක්සත් ජාතීන්ගේ විශේෂඥ මණ්ඩලයක්, පලස්තීන ජනතාවට එරෙහිව ලිංගික හා ස්ත්‍රී පුරුෂ භාවය පදනම් කරගත් ප්‍රචණ්ඩත්වය භාවිතා කිරීම පිළිබඳව දැඩි කනස්සල්ල පළ කර තිබේ.

විශේෂඥයින් සඳහන් කරන්නේ, එවැනි ක්‍රියාමාර්ග පලස්තීන ප්‍රජාව බියගන්වමින් සහ පීඩාවට පත් කරමින් ඔවුන් දණගැස්වීමට භාවිතා වන මෙවලමක් බවයි. මෙම ප්‍රචණ්ඩත්වය පලස්තීනුවන්ගේ දෛනික ජීවිතයේ කොටසක් බවට පත්ව ඇති අතර, මනෝවිද්‍යාත්මක බිය ඇති කිරීමත්, ඔවුන්ගේ නිවෙස්වලින් පිටව යාමට බලපෑම් කිරීමත් මෙහි අරමුණ බවද ඔවුන් පෙන්වා දෙයි. 

මුරපොලවල්, බන්ධනාගාර, නිවාස වැටලීම් සහ ඊශ්‍රායල පදිංචිකරුවන් සමඟ ඇති ගැටුම් වැනි විවිධ අවස්ථාවලදී මෙවැනි සිදුවීම් වාර්තා වී ඇති බවද සඳහන් වේ.

තවද, ලිංගික ප්‍රචණ්ඩත්වය සමාජය තුළ ලැජ්ජාව සහ අපකීර්තිය ඇති කරමින් සමාජීය සබඳතා බිඳදමන ක්‍රියාවලියක් ලෙස භාවිතා වන බවද, එය වක්‍රව ජනතාව පාලනය කිරීමේ උපක්‍රමයක් බවට පත්ව ඇති බවද වාර්තාව පෙන්වා දෙයි.

ගාසා තීරයේ ප්‍රජනක සෞඛ්‍ය සේවා පහසුකම් ක්‍රමානුකූලව විනාශ කිරීම හේතුවෙන් ගැබිනි කාන්තාවන් සහ කාන්තා ළමුන් දැඩි ලෙස පීඩාවට පත්ව ඇති බවද විශේෂඥයින් අනාවරණය කරයි. මෙය පලස්තීනුවන්ගේ අනාගත පරම්පරාවන්ට හා ප්‍රජනන හැකියාවට දිගුකාලීන බලපෑම් ඇති කළ හැකි බවටද ඔවුන් අනතුරු අඟවයි.

මෙවැනි ක්‍රියාකාරකම් ජාත්‍යන්තර නීතියේ බලය දුර්වල කරමින් ප්‍රචණ්ඩත්වයේ චක්‍රය තවත් උග්‍ර කරන බවද විශේෂඥයින් පෙන්වා දෙයි.

එමනිසා, පලස්තීනුවන්ට එරෙහි සියලු ආකාරයේ ලිංගික හා ස්ත්‍රී පුරුෂ භාවය පදනම් කරගත් ප්‍රචණ්ඩත්වය වහාම නතර කරන ලෙසත්, වගකිවයුතු පුද්ගලයින්ට එරෙහිව නීතිමය පියවර ගන්නා ලෙසත් එක්සත් ජාතීන්ගේ විශේෂඥයින් ඉල්ලා තිබේ.