ගුරුවරයෙක් කොවිඩ් ආසාදිතව මිය යයි
Sithumi
කෑගල්ල ශික්ෂණ රෝහලේ දැඩි සත්කාර ඒකකයේ ප්‍රතිකාර ලබමින් සිටි පාසලක ක්‍රීඩා ගුරුවරයෙක් කොවිඩ් ආසාදනය වීමෙන් ජීවිතක්ෂයට පත්වු බව දිස්ත්‍රික් සෞඛ්‍ය සේවා අධ්‍යක්ෂ වෛද්‍ය කුමාර් වික්‍රමසිංහ මහතා පවසයි. වෛද්‍ය කුමාර් වික්‍රමසිංහ මහතා පවසා සිටියේ, දින ගණනාවක් දැඩි සත්කාර ඒකකයේ ප්‍රතිකාර ලබමින් සිට අදාළ ගුරුවරයා ජීවිතක්ෂයට පත්වු බවය. එමෙන්ම මේ වන විට රඹුක්කන ප්‍රදේශයේ පාසලක විදුහල්පතිවරයෙකු ද කොරෝනා ආසාදිතව දැඩි සත්කාර ඒකකයේ ප්‍රතිකාර ලබන බව වෛද්‍ය කුමාර් වික්‍රමසිංහ මහතා පැවසීය
. “අද දවසේ ඉතාමත් අවාසනාවන්ත කෑගල්ල නගරයේ ප්‍රධාන පාසලක ක්‍රීඩා ගුරු උපදේශකවරයෙක් කොවිඩ් -19 රෝගී තත්ත්වයෙන් මියගියා. අපි එතුමාව දවස් ගණනාවක් දැඩි සත්කාර ඒකකයේ රඳවාගෙන ප්‍රතිකාර කරා. ඒ වගේම රඹුක්කන ප්‍රදේශයේ පාසලක විදුහල්පතිවරයෙකුත් ඉතාම අසාධ්‍ය තත්ත්වයේ දැඩි සත්කාර ඒකකයේ ප්‍රතිකාර ලබනවා. අපි ජනතාවගෙන් ඉල්ලා සිටින්නේ හැකි පමණ සංචරණය සීමා කරලා, සෞඛ්‍යාරක්ෂිතව වැඩ කටයුතු කරන ලෙසයි. මේ වන විට කෑගල්ල දිස්ත්‍රික්කයේ කොවිඩ් -19 රෝගීන් සඳහා අතරමැදි ප්‍රතිකාර මධ්‍යස්ථාන 6ක් පමණ සුදානම් කර තිබෙනවා. අපි පෙරේදා සිට අපි කිතුල්ගල රෝහලටත් රෝගීන් භාර ගැනීම ආරම්භ කළා. මේ සෑම ස්ථානයක්ම රෝගීන්ගෙන් පිරී ගොස් තිබෙනවා. තත්ත්වය මෙසේ පවතින නිසා අපි ජනතාවට කියනවා නැවත නැවතත් පරිස්සමින් තමන්ගේ කටයුතු කරගන්නා ලෙසය.“
