කොවිඩ් එන්නත්කරණ වැඩපිළිවෙල ගැන PHIලා අනතුරු අඟවයි

කොවිඩ් මර්දන එන්නත්කරණ වැඩපිළිවෙලට දිගින් දිගටම දේශපාලන බලපෑම් එල්ල කළහොත් වෘත්තිය ක්‍රියාමාර්ගයකට යාමට සිදුවන බව මහජන සෞඛ්‍ය පරීක්ෂකවරුන්ගේ සංගමය අනතුරු අඟවයි. එවැනි පසුබිමක සෞඛ්‍ය අමාත්‍යාංශය ජනතාවගෙන් ඉල්ලා සිටින්නේ කොවිඩ් එන්නත ලබාදීමේ සාමාන්‍ය ක්‍රමවේදයට පිටින් යමින් විවිධ පාර්ශ්ව හරහා එන්නත ලබාගැනීමට උත්සාහ නොකරන ලෙසය. කොළඹ සහ ගම්පහ දිස්ත්‍රික්කයන්හි කොවිඩ් අධිඅවදානමක් සහිත ග්‍රාම නිලධාරී වසම්වල වයස අවුරුදු 30ට වැඩි සියල්ලන්ට කොවිෂීල්ඩ් එන්නත ලබාදීම අදත් සිදුකෙරුණි.

 ඊයේ දිනය තුළ 24,374 දෙනෙකුට එන්නත ලබාදී ඇති අතර ඒ අනුව සමස්ත එන්නත්ලාභීන් ගණන 466,350ක් බව වසංගත රෝග විද්‍යා අංශය සඳහන් කළේය. මේ අතර, කොවිඩ් ආසාදිත තවත් මරණ 07ක් දෙමළගම, අනුරාධපුර, කුරුණෑගල, ගම්පහ, රුක්ගහවිල, කොළඹ 05 සහ පන්නිපිටිය යන ප්‍රදේශවලින් ඊයේ වාර්තා වීමත් සමග මෙරට සමස්ත කොවිඩ් මරණ සංඛ්‍යාව 471 දක්වා ඉහළ ගියේය. ඉන් මරණ 458 ක්ම සිදුව තිබෙන්නේ කොවිඩ් දෙවන රැල්ල තුළදීය. ගතවූ පෙබරවාරි මාසයේ දින 28ක කාලය තුළ පමණක් කොවිඩ් ආසාදිත මරණ 155 ක් වාර්තා වී තිබෙන බව දත්ත අනුව පෙනීයයි.