රට තුළ නැති දෙයක් මවා පාන්නට අන්තවාදීන් දගලයි?

කොවිඩ් මළ සිරුරු ආදාහනය කිරීමට විරුද්ධව කතා කරමින් රට තුළ නැති දෙයක් මවා පාන්නට අන්තවාදීන්ට උවමනාවක් ඇති වී තිබෙන බව ග්‍රාමීය නිවාස හා ඉදිකිරීම් සහ ගොඩනැගිලි ද්‍රව්‍ය කර්මාන්ත ප්‍රවර්ධන රාජ්‍ය අමාත්‍ය ඉන්දික අනුරුද්ධ මහතා පැවසීය.

මෙම කාරණය සම්බන්ධයෙන් තම ධර්මය තුළින් ජනතාවට හරි දේ කියා දෙන්නැයි සෑම ආගමකම නායකයින්ගෙන් අප ඉල්ලා සිටින බවත්, එසේ කිරීම තුළින් රට තුළ නැති දෙයක් මවා පාන්නට දේශපාලඥයින්ට නොහැකි වන බවත් ඇමතිවරයා වැඩිදුරටත් සඳහන් කළේය.

අමාත්‍යවරයා මේ බව කියා සිටියේ “ඔබට ගෙයක් - රටට හෙටක්”ජාතික නිවාස වැඩසටහන යටතේ ගම්පහ දිස්ත්‍රික්කයේ, දිවුලපිටිය ප්‍රාදේශීය ලේකම් කොට්ඨාශයේ නව නිවාස 2 ක් ජනතා අයිතියට පත් කිරීමේ අවස්ථාවට අද (26) දින සහභාගී වෙමිනි.

දිවුලපිටිය ප්‍රාදේශීය ලේකම් කොට්ඨාශයේ බටහිර ගොඩිගමුව සහ දික්ලන්ද ප්‍රදේශවලදී මෙම නිවාස විවෘත කිරීම් සිදුකරන ලදි.

ජනාධිපති ගෝඨාභය රාජපක්ෂ මහතාගේ ‘සෞභාග්‍යයේ දැක්ම’ප්‍රතිපත්ති ප්‍රකාශය අනුව, අග්‍රාමාත්‍ය මහින්ද රාජපක්ෂ මහතාගේ උපදෙස් මත, ග්‍රාමීය නිවාස හා ඉදිකිරීම් සහ ගොඩනැගිලි ද්‍රව්‍ය කර්මාන්ත ප්‍රවර්ධන රාජ්‍ය අමාත්‍යංශය විසින් “ඔබට ගෙයක් - රටට හෙටක්” ජාතික නිවාස වැඩසටහන ක්‍රියාත්මක කරනු ලබයි.මේ ආකාරයෙන් මෙම වැඩ සටහන ඉදිරියේදීත් ග්‍රාමසේවා වසම් 14,022 ක තුළම ක්‍රියාත්මක වේ.