ළඟම කෙනෙක් අහිමි වෙන දුක මං දන්නවා” – ඇමතිනිය සංවේදීව වෙයි
Sithumi
කොරෝනා වෛරසය ආරක්ෂා වෙන ලෙස තමන් නැවත වතාවක් ජනතාවගෙන් ඉල්ලා සිටින බව වසංගත රෝග හා කොවිඩ් රෝග පාලන කටයුතු රාජ්‍ය අමාත්‍ය වන වෛද්‍ය සුදර්ශනි ප්‍රනාන්දුපුල්ලේ මහත්මිය පවසා සිටිනවා.
රෝගය කෙතරම් කලමණාකරණය කරගත්තත් රෝගය වැළැඳීමට ඉඩ ඇති බව පවසන අමාත්‍යතුමිය සඳහන් කර සිටියේ මුව ආවරණ නිතරම පළඳින ලෙසත්, මීටරයක පරතරය තබාගන්නා ලෙසත්, අත් පිරිසුදුව තබාගෙන සෞඛ්‍යාරක්ෂිත ක්‍රමවේදයන් අනුගමනය කරන ලෙසයි. අත්‍යවශ්‍ය කටයුත්තකට හැර නිවසෙන් පිටතට නොයන ලෙස පැවසූ අමාත්‍යවරිය වැඩිදුරටත් සඳහන් කර සිටියේ එම කටයුත්ත සෙනඟ අඩුවෙනකන් සිට කරගන්නා ලෙසයි.
මෙම රෝගය වළක්වා ගත හැක්කේ ජනතාවට පමණක් බවත්, ආණ්ඩුව කෙතරම් නීතිරීති ගෙනාවත්, ආණ්ඩුව මොන දේ කළත් ආණ්ඩුව මෙය කළ නොහැකි බවද අමාත්‍යවරිය පවසා සිටියා. තවදුරටත් අදහස් දක්වමින් අමාත්‍යවරිය පවසා සිටියේ, “තමන්ගේ නිවසට ලෙඩ රෝග ගේන්න එපා, විෂ බීජය ගේන්න එපා.
බැරිවෙලාවත් ගෙදරට විෂ බීජය ගෙනාවොත් තමන්ගේ මහලු අම්මා තාත්තාට මේක අවදානමක් වෙන්න පුළුවන්, මිය යන්න පුළුවන්. තමන්ගේ ගර්භනී සහෝදරියට, භාර්යාවට අවදානමක් වෙන්න පුළුවන්, මිය යන්න පුළුවන්. තමන්ගේ ගෙදර ඉන්නවා නම් දියවැඩියාව තියෙන, පිළිකා තියෙන, වකුගඩු රෝගයක් තියෙන ඒ අයට මාරාන්තික වෙන්න පුළුවන්.” මෙවැනි දෙයක් සිදුවුවහොත් එයින් ඇති වෙන දුක වේදනාව ජීවිතය පුරාවට ඇතිවන්නේ තමන්ගේ පවුලේ අයට සහ තමන්ටම බවත් අමාත්‍යවරිය පවසා සිටි අතර වෙන අයට එම පාඩුව නොදැනෙන බවද සඳහන් කළා.
“එහෙම වේදනාවක් විඳපු කෙනෙක් හැටියට මං දන්නවා, තමන්ගේ කෙනෙක් නැති වුණාම, අහිමි වීමේ වේදනාව.. ඒ නිසා පවුලේ අයව ආරක්ෂා කරගන්න වගකීමෙන් වැඩ කරන්න” යැයිද අමාත්‍යවරිය විසින් සංවේදීව ජනතාවගෙන් ඉල්ලීමක් කළා.
සිව්දෙසින් ගලා එන තොරතුරු සැමට කලින්, එසැනින් දැන ගන්න ගගන whatsApp,වෙත පිවිසෙන්න.... |
