පුෂ්පිකා පොලිසි යයි.... කිරුළ නැවත හිමි වන ලකුණු!!!!

විවාහක රු රජිණ තරගයේ දී කිරුළ අහිමිවූ පුෂ්පිකා ද සිල්වා මහත්මිය පොලිසියේ පැමිණිල්ලක් සිදු කර තිබෙනවා. අදාළ තරගයෙන් තමන් ජයග්‍රහණය කර සුළු වෙලාවකින් කිරුළ ආපසු ලබා ගැනීමෙන් තමන්ගේ කිර්ති නාමයට හානි සිදුව ඇති බව පවසමින්. අදාල සිද්ධිය පිලිබඳ වීඩියෝ දර්ශනයක් මේවන විට සමාජ මාධ්‍ය ඔස්සේ වෛරල් වෙමින් ඇති බැවින් සමාජය හමුවේ තමන් අපකීර්තියට පත්ව ඇති බවයි ඇය පවසන්නේ. කෙසේ වෙතත් පුෂ්පිකා ද සිල්වා මහත්මිය මේ සම්බන්ධයෙන් වන්දි ලබා ගැනීමට හැකිද යන්න පිළිබඳව තමන්ගේ නීතිඥවරුන්ගේ අදහස් ලබාගෙන ඇති බව සඳහන්.

විවාහක රු රජිණ තරගය කොළඹ දී ඊයේ දිනයේදී පැවතී අතර එහිදී විවාහක රු රැජින බවට තරගයෙන් ජයග්‍රහණය කරන්නේ පුෂ්පිකා ද සිල්වා මහත්මිය බවට ප්‍රකාශයට පත් කර මොහොතකින් එය උදුරා එම තරගයෙන් දෙවන ස්ථානය ලබා ගත් අයට කිරුල පළඳවනු ලබනවා. එයට හේතුව ලෙස සඳහන් කර ඇත්තේ පුෂ්පිකා ද සිල්වා මහත්මිය විවාහක වී දික්කාසද වූ බවට චෝදනා කරමින්. කෙසේ වෙතත් පුෂ්පිකා ද සිල්වා මහත්මිය දික්කාසද වී ඇති බවට විසිඳු ලිඛිත ලියවිල්ලක් ඉදිරිපත් නොකිරීම හේතුවෙන් නැවතත් කිරුළ ඇය වෙත ලබා දීමට සංවිධායක මඩුල්ල තීරණය කර තිබෙනවා. --------------------------

කිරුල උදුරුගත් රූ රැජින පුෂ්පිකාගේ විශේෂ ප‍්‍රකාශය මෙන්න.. ඔටුන්න ඇදලා හිසටත් තුවාලයි. 2020 වර්ෂයේ විවාහක රූ රැජින ලෙස කිරුළ ජයග්‍රහණය කර ඉතා සුළු ඒ මොහොතකින් එම කිරුළ උදුරා ගැනීමට ලක් වූ පුෂ්පිකා ද සිල්වා තම සමාජ ජාල ගිණුමේ එකී සිදුවීම ගැන මෙම සටහන තබා තිබේ. ආයුබෝවන්!මා හිතවත්, ආදරණීය, ගෞරවණීය, බුද්ධිමත් ශ්‍රී ලාංකික සහ ලෝකවාසී ජනතාවනි, සිදුවූ අනපේක්ෂිත සිදුවීම සම්බන්ධයෙන් ඔබ මගේ ප්‍රතිචාරය අපේක්ෂා කරන බව මම දැනටමත් දනිමි. කියන්නට බොහෝ දේ තිබුනත්, අත්‍යවශ්‍ය කාරණා පමණක් මෙහි සටහන් කරමි.

පළමුව, 2020 වර්ෂයේ විවාහක රූ රැජිණ කිරුල ජයග්‍රහණය කිරීම සඳහා මා තෝරාගත් විනිශ්චය මණ්ඩලයට මගේ ගෞරවය සහ ස්තුතිය පුද කරමි.දෙවනුව, මා සිතන ආකාරයට ලංකාවේ නොව ලෝකයේ ම රූ රැජිණ ඉතිහාසයේ පලවෙනි වරට එසේ අපහාසාත්මක ලෙස, සියල්ලන් ඉදිරියේ මගේ කිරුල උදුරා ගනු ලැබුවත්, මේ ලියන මොහොතේ ත් මම මගේ හිස කෙලින් තබාගෙන, පෙර සේ ම අභිමානයෙන් ආඩම්බරයෙන් සිටින බව කියමි. මම, මම ම වන අතර, මට මෙය තවත් එක සිදුවීමක් පමණි.

ලෝක විවාහක රූ රැජිණ, එසේ මගේ හිසින් මගේ කිරුල උදුරා ගනිද්දී මගේ හිස් කබලට සිදු වූ තුවාල වල වේදනාව, කිරුල අහිමි වෙද්දී සිතට දැනුන වේදනාව යන දෙකටම වඩා, “.. අම්මිගෙ ඔලුව තුවාල වෙලා නේද..? රිදෙනවද අම්මි?” යැයි මගේ කුඩා පුතු අසන විට දැනෙන වේදනාව මට දරාගත නොහැකි ය. එහෙත්, මෙය තනි ගැහැණියක් වූ මා වෙනුවෙන් මුලු ලෝකයක ගැහැණුන් මෙන්ම පිරිමින් ද, පක්ෂ පාට ජාති ආගම් කුල මල භේද පසෙක ලා හඬ අවදි කරන ඓතිහාසික මොහොතකි. ඔබ සියලු දෙනාගේ මේ ආදරය මට යෝධ ශක්තියක් වන බව කියමි.

අනික් අතට මම දික්කසාද ගැහැණියක් නො වෙමි. මේ ලියන මොහොතේ ත් මා දික්කසාද ගැහැණියක් නොවන බව ඉතා වගකීමෙන් කියමි. මම දික්කසාද නම්, මගේ දික්කසාද ලියවිලි ඉදිරිපත් කරන ලෙස මම ඔවුන්ට අභියෝග කරමි. මම මගේ දරුවා සමග සිටින බව මම ලෝකයෙන් සඟවා නැත. එ සේ සිටින්නට මට පෞද්ගලික හේතු ද ඇත. නමුත්, වෙන් ව සිටීම එකකි. දික්කසාදය යනු වෙනම එකකි. මම තවම දික්කසාද නො වූ තැනැත්තියක් වෙමි. මේ තරඟාවලියේ ආරම්භයේදී ම මා ඊට නුසුදුසු නම් මා එයින් ඉවත් කරන්නට ඔවුන්ට ඉඩ තිබුණි. අවශේෂ තරඟ ඉසව් එකින් එක පසුකර මා මෙතෙක් දුර එනතෙක් ඔවුන් සිටියේ නින්දේ නො වේ.

මම 2011 ශ්‍රී ලාංකික රූ රැජිණ වූයෙමි. ඉන් දස වසරකට පසු ඊයේ රාත්‍රී විනිශ්චය මණ්ඩලයේ තීරණයෙන් විවාහක රූ රැජිණ කිරුල පැලඳුවෙමි. ඒ මොහොතේ ම මම ලංකාවේත් ලෝකයේ ත් සිටින ඔබ සියලු දෙනාගේ හදවතේ විවාහක රූ රැජිණ බවට පත් වූයෙමි. ඉදින්, සංකේතාත්මක ඒ කිරුල මගේ හිසෙන් උදුරා ගත්ත ද, මම ඒ සිදුවූ අසාධාරණය සහ අපහාසය වෙනුවෙන් අවශ්‍ය නීතිමය ක්‍රියාමාර්ග වෙත දැනටමත් අවතීර්ණ වී ඇති බව, ඔබට දැනුම් දෙමි. “අවසාන වශයෙන්, සැබෑ රැජිණක් යනු, අනෙක් ගැහැණියගේ කිරුල උදුරාගන්නා ගැහැණියක් නො ව, අනෙක් ගැහැණිය ගේ ඔටුන්න රහසේ සකසන ගැහැණියක් බව කියමි”!!! පුෂ්පිකා ද සිල්වා– කිරුල උදුරාගන්නා ලද පලමු ශ්‍රී ලාංකික විවාහක රූ රැජිණ