ලොව කළඹන කොරෝනා නව ප‍්‍රභේදය ලංකාවට ආසන්න වෙයි.. ලංකාවටත් රතු එළියක්

එංගලන්තයේ ව්‍යාප්ත වෙමින් තිබෙන කොරෝනා නව වෛරස් ප‍්‍රභේදය ආසාදනය වූ පුද්ගලයින් 06 දෙනෙකු ඉන්දියාවෙන් හමුවී තිබෙනවා. එම ආසාදිතයින් 06 දෙනාම, බි‍්‍රතාන්‍යයේ සිට ඉන්දියාවට පැමිණ නිරෝධායනයට යොමුව සිටි පුද්ගලයින් බවයි විදෙස් වාර්තා පවසනවා.

අදාළ ආසාදිතයින් 06 දෙනාගේ ආශ‍්‍රිතයින් ද, නිරෝධායනයට යොමු කිරීමට ඉන්දීය සෞඛ්‍ය අංශ පියවර ගෙන තිබෙනවා.

එංගලන්තයෙන් කොරෝනා වෛරසයේ නව ප‍්‍රභේදය ආසාදනය වූ රෝගීන් හමුවීමත් සමග එරටින් ගුවන් යානා ගෙන්වා ගැනීම තාවකාලිකව අත්හිටුවීමට ඉන්දියාව පසුගියදා කටයුතු කළා. එහෙත්, නොවැම්බර් මස අගභාගය වනවිටත්, පුද්ගලයින් 33,000 ක පමණ පිරිසක් බි‍්‍රතාන්‍යයේ සිට ඉන්දියාවට ගුවන් මගින් පැමිණ තිබෙනවා.

එම පිරිසෙන් 114 දෙනෙකුට පමණ කොරෝනා වෛරසය ආසාදනය වී ඇති බවයි මේවනවිටත් තහවුරු වී ඇත්තේ. එහෙත්, ඔවුන්ට ආසාදනය වී ඇත්තේ කොරෝනා වෛරසයේ නව ප‍්‍රභේදය දැයි තහවුරු කර ගැනීම සඳහා මේවනවිටත් පරීක්ෂණ කි‍්‍රයාත්මකයි. එම පරීක්ෂණ අතරතුර නව වෛරස් ප‍්‍රභේදය ආසාදනය වූ පුද්ගලයින් 06 දෙනා හඳුනාගෙන තිබෙනවා.

පවතින තත්ත්වය අනුව නව වෛරස් ප‍්‍රභේදය සම්බන්ධයෙන් දැඩි අවදානයෙන් පසුවන බවයි ඉන්දීය සෞඛ්‍ය අංශ පවසන්නේ. ඉන්දියාව දැනටමත් ලොව දෙවන වැඩිම කොරෝනා ආසාදිතයින් පිරිසක් වාර්තා වන රට වනවා.

එබැවින් තවත් කොරෝනා රැල්ලක ව්‍යාප්තිය පාලනය සඳහා ගතයුතු සෑම කි‍්‍රයාමාර්ගයක්ම ගන්නා බව ඉන්දීය සෞඛ්‍ය අංශ පැවසුවා. ලබන ජනවාරි මාසයේ මුල් භාගය වනවිට ඉන්දියානුවන් මිලියන 300 කට පමණ කොරෝනා මර්ධන එන්නත ලබාදීම එරට සෞඛ්‍ය බලධාරීන්ගේ අරමුණයි.

මේ අතර රජයේ වෛද්‍ය නිලධාරීන්ගේ සංගමය පැවසුවේ ශ‍්‍රී ලංකාවට ද කොරෝනා වෛරසයේ නව ප‍්‍රභේදය පැමිණීමේ අවදානමක් පවතින බවයි. එමෙන්ම ශ‍්‍රී ලංකාව තුළ දැනට ව්‍යාප්ත වන වෛරසයේ විකෘති ප‍්‍රභේද ඇතිවීමේ අවදානමක් ද පවතින බව ඔවුන් පෙන්වා දුන්නා.

මේ අතර කොරෝනා වෛරසයට එරෙහි දේශීය ඖෂධ සම්බන්ධයෙන් පරීක්ෂණ තවදුරටත් සිදුවන බව දේශීය වෙදකම ප‍්‍රවර්ධන රාජ්‍ය අමාත්‍ය සිසිර ජයකොඩි පවසනවා. ඔහු කියා සිටියේ ඖෂධ 37 ක් සම්බන්ධයෙන් මේවනවිටත් සායනික පරික්ෂණ ආරම්භ කර ඇති බවයි.

ලොව පුරා ඖෂධ සමාගම් මේවනවිටත් කොරෝනා වෛරසයට එරෙහි සාර්ථක එන්නතක් පිළිබඳ පරීක්ෂණ සිදුකරමින් ඇති අතර මෙතෙක් ප‍්‍රතිඵල පෙන්වා ඇති එන්නත් කිහිපයක් දැනටමත් රටවල් කිහිපයක් භාවිත කරමින් සිටිනවා.