සංචරණ සීමා නොතකා සාද පැවැත්වීම නිසා තවත් කම්හලකින් කොරෝනා පොකුරක්...ඉදිරියේදී අනතුරු ඇගවීමක්.

ඒකල කර්මාන්ත ශාලාවක කරනු ලැබූ පී සී ආර් පරීක්ෂාවකදී කොවිඩ් 19 ආසාදිතයන් 39 දෙනෙකු සොයා ගත් බව ජා-ඇල ප්‍රාදේශීය සභා පරිපාලන මහජන සෞඛ්‍ය පරීක්ෂක එස්. ඩබ්ලිව්. එම්. වයි. විජේසිංහ මහතා පවසනවා.

ඊයේ(28)) මෙම කර්මාන්ත ශාලාවේ පී සී ආර් පරීක්ෂණ 133ක් සිදු කර ඇති අතර අද (29 ) ඔවුනගෙන් 39 දෙනකු කොවිඩ් 19 ආසාදනය වුවන් බව සෞඛ්‍ය අංශ තහවුරු කර ගත් බව විජේසිංහ මහතා අවධාරණය කළා.

එම ආසාධිතයන්ගෙන් බහුතරය ජා-ඇල ප්‍රදේශයේ පදිංචි කරුවන් වන අතර ගම්පහ දිස්ත්‍රික්කයේ හා අනුරාධපුර ප්‍රදේශයේ පදිංචි පුද්ගලයන්ද මෙම ආසාධිතයන් අතර සිටින බව පරිපාලන මහජන සෞඛ්‍ය පරීක්ෂකවරයා සඳහන් කළා.

විශේෂයෙන් ප්‍රදේශයේ පුද්ගලයන් තම සංචරණ කටයුතු සීමා නොකර නත්තල් උත්සව සමයේ සාද පවත්වමින් කටයුතු කිරීම මෙම තත්ත්වය ව්‍යාප්ත වීමට හේතුවක් වු බවත්, මේ නිසා ප්‍රදේශයක් ලෙස ජනතාව මීට වඩා සැලකිලිමත් ව කටයුතු නොකලහොත් ජන ජීවිතය වඩාත් පීඩාකාරී වනු ඇතැයිද ජා-ඇල පරිපාලන මහජන සෞඛ්‍ය පරීක්ෂක එස්. ඩබ්ලිව්. එම්. වයි. විජේසිංහ මහතා වැඩිදුරටත් කියා සිටියා.