මාලිමාවෙන් රංජන්ට පාර්ලිමේන්තු වරමක්? - (VIDEO)
Wayomi
අද (20) උදෑසන ජාතික ජන බලවේගයේ මහර ආසනයේ සුරිය පාළුව උතුර මැතිවරණය කාර්යාලය විවෘත කිරීම සඳහා ජනතා විමුක්ති පෙරමුණේ පාර්ලිමේන්තු මන්ත්‍රී විජිත හේරත් සහභාගී විය.
එහිදී මාධ්‍යවේදීන් විසින් පාර්ලිමේන්තු මන්ත්‍රී විජිත හේරත් ගෙන් ගැටළුවක් යොමු කර සිටියා.
ඒ, පසුගියදා නාමයෝජනා භාරදීම සඳහා ජනාධිපති අපේක්ෂකයින් මැතිවරණ කොමිසමට පැමිණි අවස්ථාවේදී අනුර දිසානායක මහතා නාමල් රාජපක්ෂ මහතාට අතට අත දෙමින් සුහද පිළිසඳරක යෙදෙන වීඩියෝ පටයක් සමාජ මාධ්‍ය හරහා සංසරණය වීම, රන්ජන් රාමනායක විසින් පැවසූ “හැමෝම යාලුවෝ” යන කතාව තහවුරු කිරීමක්ද යන වගයි.
එහිදී ඔහු ඊට ප්‍රතිචාර දක්වමින් විජිත හේරත් මන්ත්‍රීවරයා පවසා සිටියේ, ජාතික ජන බලවේගය විසින් මේ වන තෙක් ඉතාම සාමකාමීව තම මැතිවරණ ව්‍යාපාරය කරගෙන යන බවත් මැතිවරණය ජයග්‍රහණය කිරීමෙන් අනතුරුවත් ප්‍රජාතන්ත්‍රවාදී ලෙස සහ සාමකාමී ලෙස කටයුතු කිරීමට බලාපොරොත්තු වෙන බවත්ය.
එමෙන්ම මාධ්‍යවේදීන් වැඩිදුරටත් විමසා සිටියේ හිටපු පාර්ලිමේන්තු මන්ත්‍රී රංජන් රාමනායක ජාතික ජන බලවේගයට සුභ පැතීම පිළිබඳ ජාතික ජන බලවේගය මතය කුමක්ද යන වගයි.
පිළිතුරු දක්වමින් විජිත හේරත් කියා සිටියේ රන්ජන් රාමනායක යනු විටෙක මේ රටේ දූෂිත ක්‍රමය වෙනුවෙන් තනිව සටන් කළ පුද්ගලයෙක් බවත් ඔහු ජාතික ජන බලවේගයට සුබ පතයි නම් එම සුබ පැතුම් මහත් ගෞරවයෙන් යුතුව පිළිගන්නා බවත්, රන්ජන් රාමනායකගේ එම සිදුවීමෙන් මේ රටේ දූෂණය තනි පුද්ගලයකු ලෙස සටන් වැද නැවැත්විය නොහැකි බවට ඔප්පු වූ බැවින් ඒ සඳහා මහජන බලයක් අවශ්‍ය බවත්ය.
එමෙන්ම රන්ජන් රාමනායකගේ ප්‍රජා අයිතිය සම්බන්ධයෙන් මාධ්‍යවේදීන් විමසූ අවස්ථාවේදී මන්ත්‍රීවරයා පවසා සිටියේ රන්ජන් රාමනායක යනු දූෂිතයෙක් හෝ මැරයෙක් නොවන බවත් ඇත්ත කතා කළ නිසා සිරගතවූ පුද්ගලයෙක් බැවින් ඔහුගේ ප්‍රජා අයිතිය ලබාදීම සම්බන්ධව ජාතික ජන බලවේගයට වගකීමත් ඇති බව විශ්වාස කරනා බවත්ය.
