ශ්‍රී ලංකා - නවසීලන්ත තීරණාත්මක ගැටුම අද

මෙවර පන්දුවාර විස්සයි20 ලෝක කුසලානයේ සුපිරි අට දෙනාගේ වටයේ ශ්‍රී ලංකාව සහභාගි වන දෙවන තරගය නවසීලන්තයට එරෙහිව අද පැවැත්වීමට නියමිතව තිබේ.

 ඒ අද (25) රාත්‍රී 7ට කොළඹ ආර් ප්‍රේමදාස ක්‍රීඩාංගණයේදීය.

 ඒ වගේම අවසන් පූර්ව වටය පිළිබඳ බලාපොරොත්තු රඳවා ගැනීමට නම් ශ්‍රී ලංකාව මෙම තරගය අනිවාර්යයෙන්ම ජය ගතයුතුව තිබේ.

   ශ්‍රී ලංකා ක්‍රිකට් ආයතනය නිවේදනය කළේ මෙම තරගයේද සියලු ප්‍රවේශපත් අලෙවි වී අවසන් ඇති බැවින් ප්‍රේමදාස ක්‍රීඩාංගණයේ පිවිසුම් දොරටු පස්වරු 4ට විවෘත කෙරෙන බවයි.

මෙවර විස්සයි20 ලෝක කුසලාන ක්‍රිකට් තරගාවලියේ සුපිරි අට දෙනාගේ වටයේ ශ්‍රී ලංකා පිල සහභාගි වූ පළමු තරගය එංගලන්තය හමුවේ ලකුණු 51කින් පරාජය පත්විය.

මේ හේතුවෙන් ශ්‍රී ලංකාව අවසන් පූර්ව වටයට බලාපොරොත්තු රඳවා ගැනීමට නම් නවසීලන්තයට එරෙහිව අද පැවැත්වෙන තරගය අනිවාර්යෙන්ම ජය ගත යුතුව තිබේ .

මෙම තරගය වෙනුවෙන් දෙපිලම ඊයේ කොළඹ ආර් ප්‍රේමදාස ක්‍රීඩාංගණයේදී පුහුණුවීම්වල නිරත විය .

ක්‍රිකට් ලෝලීන්ට දැනුම්දීමක් - T20 ලෝක කුසලාන අවසන් පූර්ව සහ අවසන් මහා තරගවල ප්‍රවේශ පත්‍ර අද සිට

ශ්‍රී ලංකාව සහ නවසීලන්තය අතර මේ දක්වා පන්දුවාර විස්සයි20 තරග 28ක් පවත්වා ඇති අතර ඉන් තරග 16ක් නවසීලන්තය ජය ගනිද්දී ශ්‍රී ලංකාව තරග 9ක් ජය ගෙන තිබේ.

ශ්‍රී ලංකාව සහ නවසීලන්තය අතර පන්දුවාර විස්සයි20 ලෝක කුසලාන තරග 6ක් පවත්වා තිබේ.

  ඉන් තරග 3ක් නවසීලන්තය ජය ගත් අතර ශ්‍රී ලංකාව තරග 2ක් ජය ගැනීමට සමත් විය.

  පොලීසිය සදහන් කළේ අද පැවැත්වෙන ශ්‍රී ලංකාව සහ නවසීලන්තය තරගය වෙනුවෙන් විශේෂ රථ වාහන සැලැස්මක් ක්‍රියාත්මක කෙරෙන බවයි.

මෙම තරගය නැරඹීමට විශාල ප්‍රේක්ෂක පිරිසක් පැමිණෙනු ඇතැයි අපේක්ෂා කරන බැවින් ඊට අදාළව විශේෂ රථ වාහන සැලැස්මක් ක්‍රියාත්මක කිරීමට පොලීසිය මේ වන විට තීරණය කර තිබේ.