ලිට්‍රෝ, ලාෆ් ගෑස් ගැන ඇමති වසන්තගෙන් හදිසි දැනුම්දීමක්

එළඹෙන මාර්තු 12 වැනිදා සිට ලිට්‍රෝ ගෑස් සිලින්ඩර් වැඩි ප්‍රමාණයක් වෙළෙඳපොළට නිකුත් කිරීමට බලාපොරොත්තු වන බව වෙළෙඳ අමාත්‍ය වසන්ත සමරසිංහ මහතා ප්‍රකාශ කළේය.

කෙසේ වෙතත්, ඉකුත් දින කිහිපය මෙන්ම අද (20) දිනත් දිවයිනේ ප්‍රදේශ ගණනාවක ලිට්‍රෝ හා ලාෆ්ස් ගෑස් හිඟයක් දක්නට ලැබුණි. ඇතැම් ප්‍රදේශවල පාරිභෝගිකයන් ගෑස් මිලදී ගැනීම සඳහා දිගු පෝලිම්වල රැඳී සිටිනු දක්නට ලැබුණු අතර, ගෘහස්ථ පාරිභෝගිකයන් මැසිවිලි නැගූහ.

ගෑස් මිල ඉහළට.. බගන්තලාවේ මිනිස්සු අසරණ වෙයි

ලිට්‍රෝ ගෑස් සමාගම නිවේදනය කළේ, අවශ්‍ය පරිදි ප්‍රමාණවත් තොග පවත්වා ගැනීම සඳහා නව ඇණවුම් සිදු කර ඇති බවත්, ඒ අනුව පෙබරවාරි මාසය අවසන් වීමට පෙර ගෑස් නෞකා තුනක් දිවයිනට පැමිණීමට නියමිත බවත්ය. මේ අනුව අද උදෑසන වන විටත් ප්‍රදේශ කිහිපයකට නව ගෑස් තොග ලැබී තිබුණි.

මේ අතර පාරිභෝගික කටයුතු පිළිබඳ අධිකාරියේ සභාපති හේමන්ත සමරකෝන් මහතා පවසා ඇත්තේ, ලාෆ්ස් ගෑස් සමාගම විසින් පෙබරවාරි 26 වැනිදා සිට ගෑස් වෙළෙඳපොළට නිකුත් කිරීමට නියමිත බව අදාළ සමාගම තමන්ට දැනුම්දී ඇති බවයි.

ගෑස් හිඟය හේතුවෙන් ජනතාවට ඇති වූ අපහසුතාවයන් සමනය කිරීම සඳහා රජය හා සමාගම් දෙකම ක්‍රියාත්මක වන බවත්, ඉදිරි දිනවලදී තත්ත්වය ස්ථාවර වනු ඇතැයි බලාපොරොත්තු වන බවත් අමාත්‍යවරයා සඳහන් කළේය.

ගෑස් හිඟය අහම්බයක් නෙවෙයි.. විගණන වාර්තාවෙන් බරපතළ අනාවරණයක්