සිසුවෙකුගේ පියා සමඟ අනියම් සම්බන්ධයක පැටලී කප්පම් ඉල්ලූ ගුරුවරිය අත්අඩංගුවේ!
Shehan
ඉන්දියාවේ බැංගලෝරයෙන් වාර්තා වන පුවතකට අනුව, සිසුවෙකුගේ පියෙකු සමඟ අනියම් සම්බන්ධයක් පවත්වා ඔහුගෙන් කප්පම් ලබා ගැනීමට උත්සාහ කළ ගුරුවරියක් අත්අඩංගුවට ගෙන තිබේ.
මෙලෙස අත්අඩංගුවට ගෙන ඇත්තේ 25 හැවිරිදි ගුරුවරියක වන අතර, එම ක්‍රියාවට සහාය වූ තවත් දෙදෙනෙකු ද අත්අඩංගුවට ගෙන ඇති බව වාර්තා විය.
බටහිර බැංගලෝරයේ තම බිරිඳ සහ දියණියන් තිදෙනා සමඟ ජීවත් වන වෙළෙන්දෙකු වන සතිෂ්, 2023 දී ඔහුගේ බාල දියණිය පාසලට ඇතුළත් කර ඇත.
එහිදී මෙම පුද්ගලයා අදාළ ගුරුවරිය හමුවී ඇති අතර, පසුව ඔවුන්ගේ ඇසුර සමීප සම්බන්ධතාවයක් බවට පත්ව ඇති බව විමර්ශනවලදී හෙළි වී තිබේ. ඔවුන් දෙදෙනා දුරකථනය ඔස්සේ කෙටි පණිවුඩ සහ වීඩියෝ ඇමතුම් හුවමාරු කරගෙන ඇති අතර, අවසානයේ ඔවුන්ගේ හමුවීම් ඉතා පෞද්ගලික ඒවා බවට පරිවර්තනය වී ඇත.
නමුත්, සැකකාර ගුරුවරිය තවත් දෙදෙනෙකු සමඟ එක්ව මෙම පුද්ගලයා එවූ ඉතා පෞද්ගලික ඡායාරූප සහ වීඩියෝ ඔහුගේ පවුලේ ඥාතීන්ට පෙන්වන බවට තර්ජනය කර ඇති බව අනාවරණය වී ඇත.
එහිදී ඔවුන් කප්පම් ලෙස රුපියල් ලක්ෂ 20ක මුදලක් ඉල්ලා ඇති අතර, එම මුදල රුපියල් ලක්ෂ 15 දක්වා අඩු කර ගැනීමට එම පුද්ගලයාට හැකි වී තිබේ.
මේ සම්බන්ධයෙන් එම පුද්ගලයා පොලිසියට පැමිණිලි කර ඇති අතර, එම පැමිණිල්ල මත ක්‍රියා කළ පොලිසිය විසින් සැකකාර ගුරුවරිය සහ අනෙක් සැකකරුවන් දෙදෙනා අත්අඩංගුවට ගෙන ඇති බව වාර්තා විය.
