සාමාන්‍ය පෙළ සිසුන්ට විශේෂ නිවේදනයක්

අධ්‍යයන පොදු සහතික පත්‍ර (සාමාන්‍ය පෙළ) විභාගයට පාසල් අයදුම්කරුවන් ලෙස පෙනී සිටින සිසුන් සඳහා අවශ්‍ය වන තොරතුරු සහතික කිරීමේ පත්‍රිකාව පුද්ගලයින් ලියාපදිංචි කිරීමේ දෙපාර්තමේන්තුවේ නිල වෙබ් අඩවියෙන් සෘජුවම බාගත කිරීමේ පහසුකම සලසා ඇති බව පුද්ගලයින් ලියාපදිංචි කිරීමේ කොමසාරිස් ජනරාල් ජගත් හේරත් මහතා ප්‍රකාශ කර ඇත.

මෙම නව පහසුකම හඳුන්වාදීම මඟින් සිසුන්ට සහ පාසල් පරිපාලන අංශවලට අවශ්‍ය ලේඛන ලබාගැනීම වඩාත් කාර්යක්ෂම හා පහසු වන අතර, දිස්ත්‍රික් හෝ ප්‍රාදේශීය කාර්යාල වෙත පැමිණීමේ අවශ්‍යතාවද සැලකිය යුතු ලෙස අවම වනු ඇතැයි අපේක්ෂා කෙරේ.

සාමාන්‍ය පෙළ විභාගය සඳහා ජාතික හැඳුනුම්පතක් ලබාගැනීමේ අයදුම් කිරීමේදී මෙම තොරතුරු සහතික කිරීමේ පත්‍රිකාව අත්‍යවශ්‍ය ලේඛනයක් ලෙස භාවිතා කෙරේ. එබැවින් පාසල් අයදුම්කරුවන් අදාළ පත්‍රිකාව නිවැරදි ලෙස බාගත කර, අවශ්‍ය තොරතුරු පරීක්ෂා කර, පාසලේ විදුහල්පතිවරයා හෝ බලයලත් නිලධාරියෙකුගේ සහතිකය ලබාගෙන නියමිත ක්‍රමවේදයට අනුව ඉදිරිපත් කළ යුතු බව දැනුම් දී ඇත.

‍රටම හෙල්ලූ එයාර්බස් නඩුව - කපිල චන්ද්‍රසේනගේගේ බිරිදට විවෘත වරෙන්තුවක්

ජගත් හේරත් මහතා වැඩිදුරටත් සඳහන් කර ඇත්තේ, මෙම සේවාව ඩිජිටල්කරණ වැඩසටහනේ තවත් වැදගත් පියවරක් වන අතර, ජනතාවට වේගවත්, විනිවිදභාවයෙන් යුතු සහ කාර්යක්ෂම රාජ්‍ය සේවාවක් සැපයීම එහි ප්‍රධාන අරමුණ බවයි.

එමෙන්ම අන්තර්ජාලය ඔස්සේ ලේඛන ලබාගැනීමේ හැකියාව හේතුවෙන් කාලය හා වියදම ඉතිරි වන අතර, සේවා ලබාගැනීමේදී ඇතිවන අනවශ්‍ය ප්‍රමාදයන් ද අවම කරගත හැකි බව ද ඔහු පෙන්වා දී ඇත.

අදාළ පත්‍රිකාව බාගත කිරීමේදී නිවැරදි තොරතුරු පමණක් භාවිතා කළ යුතු අතර, ලේඛනය සම්පූර්ණ කිරීමෙන් පසු එහි සඳහන් උපදෙස් අනුව ඉදිරි කටයුතු සිදුකිරීම වැදගත් බව ද දෙපාර්තමේන්තුව අවධාරණය කරයි.

යම් ගැටලුවක් මතු වුවහොත් පුද්ගලයින් ලියාපදිංචි කිරීමේ දෙපාර්තමේන්තුවේ නිල සන්නිවේදන මාර්ග ඔස්සේ අවශ්‍ය උපදෙස් ලබාගත හැකි බව ද දැනුම් දී ඇත.

මෙම නව පහසුකම මඟින් සාමාන්‍ය පෙළ විභාගයට සූදානම් වන දහස් සංඛ්‍යාත පාසල් සිසුන්ට අවශ්‍ය ලේඛන කඩිනමින් සහ පහසුවෙන් සකස් කර ගැනීමට හැකිවන අතර, විභාග කටයුතු වඩාත් විධිමත් ලෙස ඉදිරියට ගෙන යාමට ද එය මහත් රුකුලක් වනු ඇතැයි අපේක්ෂා කෙරේ.